Kancoro to Niniwe
3
1 Napu ee nololita PUE hi Yunus karongkanina, iwei, 2 “Koimoko i Niniwe, ngata bohe etu mai. Ulikaramo napa to laibohaka-Kuko.” 3 Lauparia rau mpuumi Yunus i ngata Niniwe ewa peboha Alatala.Ngata Niniwe ee nabohe mpuu. Kaluona tolu eo rapomakoi.
4 Nehuami Yunus i rara ngata ee, haeo ntua'i nomako pade nongare iwei, “Opo mpulu eopi maropomi ngata Niniwe.” 5 Todea ngata Niniwe namparahaya peboha Alatala ee. Laibotuhira bona humawee tauna mopuaha, pade humaweera belo totua bo ngana mampake waru dua rara halaku tanda ane nancororamo lako doha-dohara. 6 Pangepena magau Niniwe kareba ee, nehompomi lako poncunaa kamagauana. Lailoncuna waru kamagauana, laihambeina hante waru dua rara pade noncunami i lolo awu apa nancoromi lako doha-dohana.
7 Magau ee pade to laipemabohe rara kamagauana nantudu tauna moparata hi todea iwei, “Manuhia, japi, bimba, kebe pade ewua ntanina moma mamala mangkoni napa-napa bo manginu ue. 8 Manuhia pade ewua kana mampake waru to laipake tempo kamatea pade merapi mpuu-mpuu hi Alatala. Humawee tauna kana mancoro lako ingkura to nadaa, nemopa maheke hi to ntanina. 9 Baka mobali rara Alatala lako hodo-Na, pade momatamo Nahuku bona nemota mamate.”
10 Hangka laihilo-Na Alatala nobalimi ingkura to nadaa pade nancororamo, laihoho-Nami rara-Na nampoliwoira hante hilaka. Etu pade momami laibabei-Na to laipoliwoi-Na.