PUE nampopahiloi hi Yunus bewa kabohe towe-Na hi tau ntanina
4
1 Nahodo mpuu'i Yunus apa nagigi gagami rarana nampahilo humawee lauria. 2 Nohambaya Yunus hi PUE, iulina, “Oo PUE, apa moma iuliku amimi wengi, kariakudipi i ngataku? Etumile wei pade nalai'a rau Tarsis, apa laincaniku ane Iko Alatala to nabohe towe-Mu pade pohabara-Mu. Neliu ahi rara-Mu pade belo-Mu, pade nancoho rara-Mu hante humawee hilaka to laipoliwoi-Mu. 3 Aji, welau ei mai PUE, alami inohaku, aginalau mamate'amo.”4 Naupawee PUE nololita, “Yunus, momako mahipato mahodo!”
5 Lauparia nehuwumi Yunus lako ngata Niniwe, rau i mali mataeo. Laipatunana bamaru i ria, pade noncunami nengkanaolu nopea napa to mawali i ngata Niniwe. 6 Napu ee mai rara dota PUE Alatala, natuwumi hampuu kau to nampakaolu Yunus, bona masana rarana. Nagoe mpuu'i Yunus habana kau to natuwu ee mai. 7 Hangkabaa naratami tantadu to laipakatu Alatala, nokikiri puu kau ee mai duuna nalau. 8 Neinopi eo, Alatala nopakatu ngolu to napane lako mataeo hampena nadua woo Yunus lai'ino eo. Keni kalentena, nadungka'i pade mingki mamatemi, iulina, “Aginalau mamate'amo.”
9 Naupawee nololitami Alatala hi Yunus, “Momako mahipato mahodo habana kau etu.”
Iulina Yunus, “Mahipato moto'a mahodo, duuku mamate.”
10 Napu ee PUE nololita, “Laipotowemu kau etu mai, to moma'i hodia laipobuhehamu pade laipatuwumu, to natuwu hamengi, namate rarana hamengi mui. 11 Natantu amimi Kupotowe Niniwe, ngata bohe etu mai, apa kadea tauna no'oha i ria nelabi lako hatu rompulu ncobu dua. Moma laincanira uma pale ngkana bo uma pale ngkai, pade nadea mui ewuara.”