Buku nangkambelai Yunus
Yunus nampalaika pekio PUE
1
1 Nololitami PUE hi Yunus, ana Amitai, iwei, 2 “Koiko olu i ngata bohe to ikahangai Niniwea, mupaingaira tau-tauna i ria, apa laincani-Ku humawee gaura to nadaa.” 3 Naupawee moma'i nadota Yunus rau Niniwe, molelau laipalaikana pekio PUE, pade raumi i Yafo, apa noliwo'i meongko rau Tarsisb. Karatana i ngata Yafo, lairatana hangu kapala to meongko rau Tarsis. Aji, laibayarinami hudakana hi tumpu kapala bona mamala'i rau Tarsis, ma'awa lako hi PUE. 4 Lentongo tahi, ngkali nantawirimi ngolu bohe to laipakatu PUE. Lauparia, balumba bohe namparumpa kapala ee mai hampena ke nono mapengka. 5 Humawee to pobago i rara kapala ee mai nawulunga pade hore-hore nohambaya hi puera. Laitadira humawee to laikenira i rara kapala ee mai bona mangaa'i. Naupawee, Yunus naleta moto'i i kamara to mali nauna.
6 To nopajala kapala ee mai namparata Yunus naleta, lailikena'i pade iulikana, “Naleta motodako iko ei mai. Pemata pade pohambayako hi Puemu, baka Naepe, bona momata mamate.”
7 Alaana humaweera i rara kapala ee mai noneulika, “Maita mocabu lot, bona tancani hema to nobabei hala hampe namparata hilaka eita.” Hangka nocabu lotra, nambela hi Yunus. 8 Lauparia pekunera'i, “Nakono ane iko laipohaba hilaka ei mai? Napa bagomu, lako rimako, rima ngatamu pade to napako?”
9 Nehono Yunus, “Aku ei mai to Ibrani. Nepue'a hi PUE, Alatala to nangkami langi, to nobabei tahi hante lorena.”
10 Nangepe lauria natetambaikimi kawulungara, pade iulira, “Napadikona to laibabeimu eie?” Laincanirami ane Yunus ee mai nalai lako PUE, apa laikewokanaramo.
11 Napu ee laipekunerami Yunus, “Kikuako bona mentuumi balumba ei?” Apa kaboo-boheami balumba ee mai.
12 Nehono Yunus, “Ongko'amo pade tene'amo i tahi, bona mentuumi balumba ei mai. Apa laincaniku ane aku to laipopuuna hampe naria'i balumba bohe ei mai namparumpa komi.”
13 Molelau, to pobago i rara kapala eera mai nampehimukui nowohe kapala ee rau i lorena, naupawee moma ibukura habana balumba ee mai kaboo-bohea. 14 Napu ee nongarera hi PUE, iulira, “Oo PUE, kiperapi hi Iko bona nemo kami Mupalele mamate habana molali inoha tauna ei mai, pade nemokawo Mupakoloi kami kahalaa mampatehi tauna to moma nahala hi kami, apa Iko PUE to nobabei humaweena ewa to laipodota-Mu.” 15 Napu ee laiongkorami Yunus, laitenera i tahi pade nentuudi balumba bohe ee mai. 16 Nampahilo lauria, tau-tauna ee mai naeka mpuura hi PUE, aji laihamalera binata halaku kurban, pade notipara hi PUE.
17 Rara dota PUE, Yunus laiome hamaa bau bohe pade no'oha'i i rara ntai bau ee mai tolu eo tolu mengi kahaena.