Rut laipobangkele Boas
4
1 Raumi Boas noncuna i humpii womo pehuaa rara ngata. Bulana noncuna, noliumi ompi mohu Elimelekh to laiulina he. Laipopehanina'i pade iulina, “Ompi! Maitamo olu moncuna i hei. Naria paraluuku.” Nehani mpuumi tauna ee mai noncuna hante Boas. 2 Napu ee Boas nampelihi hampulu dua totua ngata, pade iulina, “Maimo komi olu moncuna i hei.”Noncuna mpuuramo i hee, 3 pade iulikana ompi mohuna ee mai, “Napobalumi Naomi tana ompita Elimelekh, apa nanculimi lako Moab. 4 Aji, laipekiriku, kana ku'ulikako. Ane madotako, muolimi tana ee mai i tingoora totua pade tau ntanina to noncuna ei. Ane momako madota, mu'ulika mui'a bona kuncani, apa roduata aga to mahipato mangoli tana ee. Pamulana iko olu. Ane momako madota pade akudi.”
Nehono ompina ee mai, “Ane wetu, aku to mangoli.”
5 Iulina Boas, “Ane muolipi tana ee mai lako hi Naomi, kana mupobangkele mui Rut to Moab bangkele Mahlon, bona gaguna to mate ee mai, mulina motohawo to mangkami.”
6 Nehono ompina ee mai, “Ane wetu, moma'a madota motolohi, apa ane kutolohi'i mei, tana ee mai moma'i nakami muliku. Aji kuharumakaka ikomi motolohi, apa aku moma'a mamala.”
7 Kabiahaara to Israel owi ane maria tauna mobalu ba mohula napa to naria hi hira, bona mampakaroho kabotuara ee mai, to nobalu ba nohula kana moloncu hamika hapatuna pade nawaika hi tauna to nangoli. Weemile ada to laibabeira to Israel nampakaroho kabotuara.
8 Lauparia ompina to mahipato motolohi ee nangulika Boas, “Ikomi mangoli.” Napu ee lailoncunami hapatuna pade laiwaikana Boas.
9 Boas nangulikara totua ngata hante humawee tauna to naria i hee, “Komimi welau ei mai mawali habi, ane humawee gagu Elimelekh, Kilyon pade Mahlon, laiolikumi lako hi Naomi. 10 Wee mui Rut to Moab ee mai, bangkele Mahlon, kupobangkelemi bona gagu to mate ee mai, mulina moto to mangkami, pade hangana moma'i maronto lako lentongo ompi-ompina pade humawee tauna rara ngata. Komi purami welau ei mai mawali habi.”
11 Nehonora totua ngata pade humawee tauna to i humpii womo pehuaa ngata ee, “Kamimi habina. Mohambaya kami bona PUE mantiroi bangkele to mehua rara houmu etu mahibali hante Rahel pade Lea, to nampoanaka nadea ngana hi Yakub, tumpulokota to Israel. Mabelomi katuwumu i ngata Efrata, pade hangamu mei rancani i ngata Betlehem. 12 Kiperapi bona mulimu to Nawaikako PUE lako hi bangkele ee mei mahibali hante muli Peres, anara Tamar pade Yehuda.”
13 Naliu ee, Boas nampobangkele Rut. PUE nantiroi Rut, hampena notianami pade laipoanakana hadua ngana balailo. 14 Bangkele-bangkele rara ngata nangulika Naomi, “Raunemi PUE to nampawaikako welau ei mai hadua ngana balailo to mampiarako i eo katuaamu. Mohambaya kami bona ngana ei mei mawali to mohanga i Israel. 15 Hiami to mampakagoe raramu pade mampiarako duu katuaamu. Habana maniamu to nampotoweko nampoanaka'i. Maniamu ei mai neliupi kabelona hi iko lako papitu ngana balailo.”
16 Ialana Naomi ngana ee mai laitingkuna, pade hiami to nampiara'i. 17 Tongki-tongkira bangkele nanguli, “Naria laumihawo hadua ngana balailo hi Naomi.” Laikahangairami ngana ee mai, Obed. Hiami tuama Isai to nampoanaka Daud.
Ulu jadi Daud
18 Eimile muli Peres:
Peres nampoanaka Hezron,
19 Hezron nampoanaka Ram,
Ram nampoanaka Aminadab,
20 Aminadab nampoanaka Nahason,
Nahason nampoanaka Salmon,
21 Salmon nampoanaka Boas,
Boas nampoanaka Obed,
22 Obed nampoanaka Isai,
pade Isai nampoanaka Daud.