Rut pade Boas i poihea jelai
3
1 Moma nahae lako hee, Naomi nangulika Rut, “Anaku, ba mabelo laupi ane kupalikako balailomu bona mabelo katuwumu. 2 Hilo, iko nopahiruru jelai pade gando humpiira bangkele to nobago i bone Boas. Boas etu mai moma'i doo, ompita moto'i. Ngkawengia lauria rau'i mei mowiri jelai i poihea. 3 Aji, paniumoko, wongiimi wotomu hante lana wongi, pakemi warumu to nabelo pade koimoko i poiheana. Naupawee, nemo hampe nancani karatamu i ria kapomana mapu mangkoni bo manginu. 4 Ane rau moturupi, muhilo belo rima poturuana. Karapamoko, hungke kumu to i paana pade poturumoko i humpii paana. Nakewokadamoko mei napa to kana mubabei.”5 Nangepe lauria, iulina Rut, “Kubabeidimi humawee to laiulimu etu.” 6 Napu ee mai, raumi Rut i poihea jelai, pade laibabeina humawee to laiuli panianana.
7 Napupi Boas nangkoni bo nanginu, nasanami rarana pade raumi noturu i humpii potobua jelai. Poma nahae, nenongkomi Rut rau nampamohuki'i, laihungkena kumu i paa Boas pade noturumi i hee mai.
8 Ntongo bengi nekaliwoi Boas. Nakonce'i hangka laincanina naria bangkele noturu i humpii paana. 9 Nepekune'i, “Hemako?”
Nehono bangkele ee mai, “Akudi, Rut, batuamu. Kuperapi bona muwole kapimu mampakaolu batuamu ei, apa ikomi hadua ompi mohu kami to kana mampatolohi kami.”
10 Nehono Boas, “PUE mantiroiko ana, apa welauria laipahiloimu belo raramu hi panianamu nelabi muipi lako to pamulana. Kakonona mamala mupali balailo to nanguraradapa, belo to nahugi ba to nakahiahi. Naupawee, moma'i laibabeimu lauria. 11 Wetumoko maeka ana, habana humawee to laiulimu etu mai kubabeikako, apa humawee tauna i ngata kami nangincani ane iko ei mai bangkele to nabelo. 12 Nakono aku ei mai ompi mohumi to kana mampatolohi komi, naupawee nariadipi hadua ompiku to nelabi kamohuna hi komi. 13 Heimoko olu ngkawengia ei. Hampepulodimi kupekune ompiku ee. Ane madota'i mampatolohiko, natolohimoko. Ane moma'i madota, motipa'a rara hanga PUE to natuwu, akudimi motolohiko. Aji, poturumoko duu parabaa i hei.”
14 Aji noturumi Rut i humpii paa Boas duu parabaa. Poma'i nabaa belo nematami, apa Boas nampalingai'i bona nemo maria tauna to mangincani ane naria bangkele noturu i poiheana jelai. 15 Kapomana Rut nanculi, iulina Boas, “Kakamu kae to ipohabeamu etu pade wolemi.” Laiwolenami Rut kae to ipohabeana, pade Boas nokahini rompulu kilo jelai i rarana, laiongkokana i lolo winga Rut. Napu ee raumi Boas i rara ngata.
16 Karatana Rut i hou, nepekunemi panianana, “Bewa ana?”
Lauparia laipetumuinami Rut humawee to laibabei Boas hi hia. 17 Pade iulina mui, “To rompulu kilo jelai ei mai laiwaikana'a, apa iulina, ‘Momako mamala manculi hi panianamu hante pale ngkaloa.’ ”
18 Pangepena lauria, panianana nanguli, “Karodomoko hei ana, mopea bewa mei kahuduana uruhia ei. Apa Boas ee rau mei moma'i maoha rarana kapomana uruhia ei mahudu welau ei mui.”