Rut notomu hante Boas
2
1 Naria hadua tauna to nahugi, hangana Boas. Hia ee mai ompi Elimelekh balailo Naomi.2 Hangkani tempo, Rut nangulika Naomi, “Rau'a olu i bone mopahiruru wuli jelai toro posangkiara to nabelo rarara.”
Nehono Naomi, “Raumokole, ana.” 3 Rau mpuumi Rut i bone pade nopahiruru wuli jelai to narona i posangkiara tauna. Popahiruruana wuli jelai ee mai nambela bone Boas ompi Elimelekh.
4 Karata Boas lako ngata Betlehem, iulikanara to posangkina, “PUE mampodohe komi!”
Nehonora, “PUE mui mantiroiko.”
5 Boas nampekune mandoro to nampodoora to posangki ee, “Bangkele lako rimadi mairia?”
6 Nehono mandoro ee, “Hia mai to Moab to nampodohe Naomi nanculi lako Moab. 7 Nehabimi he bona rapaliu'ihawo mopahiruru jelai to narona i talikuara to posangki. Lako karatana hampepulo duu ei mai, moma'i naria nentuu.”
8 Napu ee, Boas nangulika Rut, “Epe ana, wetumoko rau mopahiruru jelai i bone ntanina pade wetumoko moencu lako hei. Nemoko ma'awa lako to pobagoku bangkele. 9 Koinaami bone to laisangki mairia. Tukuramo bangkele lauria. Laibohakuramo to pobago balailo bona nemoko ragenora. Ane mabai wuumu, koimoko humpii gumba pade inumi ue to ihalaura to pobago.”
10 Lauparia, notingkodumi Rut hampena lencena narapa i tana pade nangulika Boas, “Kakonona moma'a mahipato mamparata ahi raramu, apa aku ei to rata moto'akuwo. Molelau na'ahidi raramu pade laipeilimu'a.”
11 Boas nanguli, “Iepekumi humawee kareba nangkambelai ingkumu hi panianamu hinungkai kamate balailomu hampena laipalahimu tina pade tuamamu pade ngata pangoteamu rau dohera tauna to moma laincanimu. 12 Kuperapi hi PUE Alatala to Israel bona Hia moto mampabalahi ingkumu pade mampawaikako tomomu to mahipato, apa naratako nengkanaolu hi Hia.”
13 Lauparia, Rut nanguli, “Mpuu-mpuu nabohe towemu hi aku tuama, habana laipakasanamu pade laipakanonemu raraku nau moma'a nahibali hante batua-batuamu bangkele lauria.”
14 Tariinapi pangkonia, neulikami Boas hi Rut, “Maimoko olu mangkoni. Lomemi rotimu rara anggur to naonco ei.” Noncunami Rut i humpiira to posangki ee, pade Boas nampadokoka'i jelai to laihole moma nampake lana. Aji, nangkonimi Rut duuna nabohu, naria muidipi labina. 15 Hangka rau muipi Rut nopahiruru, Boas nangulika to pobagona, “Ane maria jelai to nahawuena i humpii jelai to laipou lauria, palelemi napahiruru. Nemo'i mikamaro. 16 Mitungkai mei mowutu hodi-hodi jelai to isangkimi pade mirona bona mamalahawo natima. Nemo'i mitagi.”
17 Lauparia, Rut nopahiruru jelai i bone ee duu ngkinuwia. Pade lai'ihena, hapangkoloaa kadea jelaina. 18 Napu ee laikenina jelai ee rau i rara ngata. Laipahiloina panianana to laipahiruruna ee pade laipopehuwuna mui labi jelai to ikonina laiwaikana panianana.
19 Nepekunemi panianana, “I rimadako nopahiruru welau ei he, hampena nadea gagadi lairatamu? Laitiroimi tauna to nampeiliko.”
Lauparia Rut nampetumui hi hema'i nopahiruru, iulina, “Hanga tumpu bone popahiruruaku ee, Boas.”
20 Napu ee Naomi nangulika maniana, “PUE mantiroi tauna etu! PUE moma naria nangkalingani towe to laitipa-Na hi hira to natuwu bo to namate.” Iulina mui Naomi, “Tauna etu ompi mohutadipi. Hia hadua to kana mampatolohitab.”
21 Nehono Rut, “Iulikana mui'a, ‘Nemoko ma'awa lako hi to pobagoku duura mahudu mosangki boneku.’ ”
22 Lauparia Naomi nangulika Rut maniana, “Iweemile ana! Kabelona dohera to pobagona bangkele motoko, bona nemoko ragenora i bone ntanina.” 23 Aji, Rut nopahiruru dohera to pobago bangkele moto oa'i, duuna posangkia jelai bo gando nahudu. Rut no'oha dohe panianana moto'i duuna tempo posangkia ee mai nahudu.