Buku nangkambelai Rut
Elimelekh humancou noencu rau i Moab
1
1 Tempo to pobotuhidipi noparenta i Israel, nawali oro mpai i ria. Tempo ee nariara to hancamoko hante rodua anara balailo, neongko lako ngata Betlehem i Yehuda rau i Moab pade natida i ria nawali to rata. 2 Hanga tauna ee mai Elimelekh. Hanga bangkelena Naomi. Hanga anara Mahlon pade Kilyon. Hira ee mai to Efrata lako ngata Betlehem i Yehuda. Karatara i Moab, natidaramo i ria. 3 Bahangkua kahaena lako hee, namatemi Elimelekh balailo Naomi, hampena bangkele ee mai naboli hante rodua anana. 4 Rodua anana ee nampobangkele toronaa to Moab. Mahlon nampobangkele Rut, Kilyon nampobangkele Orpa. Maria hampulu mpaera natida i hee. 5 Pade namate muiramo Mahlon pade Kilyon, hampena Naomi nakarontoa balailona pade rodua anana.
Naomi pade Rut nanculi rau Betlehem
6 Bulana Naomi i Moab, iepena kareba ane PUE nampatiroi to Israel pade nampawaikara pangkoni. Alaana nangkanimpumi Naomi hante rodua maniana manculi rau i Israel. 7 Neongkomi Naomi hante rodua maniana. Lentongo dala, rara pomakoara rau Yehuda, 8 iulikanara rodua maniana ee, “Panculimo komi rau hi tinami. Kuperapi hi PUE bona Napotowe moto komi, ewa pampotowemi'a pade hi hira balailota to namateramo nampoilodokata. 9 PUE motomi mei mampawaika komi balailo bou to mampakaolu komi.”
Napu ee laiekinaramo. Naupawee noaura maniana ee nakeo, 10 iulira, “Moma! Kituku motoko manculi rau hi ompi-ompimu.”
11 Lauparia Naomi nangulikara, “Panculimo komi ana. Momami naria bununa mituku'a. Apa momami mei maria anaku to mipobalailo. 12 Aji, panculimo komi. Natua gaga'amo mobalailoki. Naupa mamala'adapa mobalailoki ngkawengia lauria, ba moanaki'a ana balailo, 13 natantu amimi momara mipopea hampera mabohe pade mipobalailo.a Nemo mei lauria napohaba pade momamo komi mobalailoki hante to ntanina. Nemo anaku. Nelabipi kapaina to lairataku lako to lairatami, habana PUE nampobali'a.”
14 Pangepera lauria, noauki lauramo nakeo, pade ne'ekimi Orpa hi panianana nehabi manculi, naupawee Rut batena nantuku panianana moto'i. 15 Naomi nangulika Rut, “Lagomu nanculimi rau hi ompi-ompina pade hi pue-pue ntanina i ngatana. Panculimoko mantuku'i.”
16 Nehono Rut, “Nemo mupahuru'a manculi pade mutagi'a mantukuko, apa rima karauamu, i hee mui karauaku. Rimako moturu, i hee mui'a moturu. Ompimu, ompiku. Alatalamu, Alatalaku. 17 I rimako mamate, i hee mui'a mamate pade i hee'amo ratana. Ane maria to mampopogaata, PUE moto mei to mampahuku'a. Kamatea aga to mamala mampopogaata.” 18 Pangepena panguli Rut lauria, nengkaomi Naomi kabohe rara Rut mantuku'i, aji, momami napa iulina.
19 Nomakoramo duura narata i ngata Betlehem. Pehuara i rara ngata, nadea tauna nakonce pade bangkele-bangkele nanguli, “Ba Naomidi lauria?”
20 Nehono Naomi, “Nemo'apa mikio Naomib. Kio'amo Marac, habana to Nabaraka nobabei nadea to napai i rara katuwuaku. 21 Hante pale nakahina'a rau, hante pale ngkaloa'a laipopanculi PUE. Nemo'a mikio Naomi, apa PUE nampahuku'a pade laiparumpai-Na'a hante nadea kahehaa.”
22 Weemi mai Naomi nanculi lako Moab nodohe hante Rut maniana to Moab ee mai. Karatara i ngata Betlehem tempo pamulana eo posangkia jelaid.