Kareba Belo to laitulihi Markus
Popailodoa
Mantuku panguli to Karahitee owi, buku ei laitulihi hadua balailo to ikahangai Markus. Markus ee, nampodohe Petrus i rara pomakoana nangkeni Kareba Belo. Napa to laiepena lako hi Petrus, eemi to laitulihina i rara buku ei.
Ane tabaha buku ei, laibahata napa to ibabei Yesus pade napa to laipatuduka-Na hi to nantuku-'I. Yesus nampopotolele Kareba Belo to nanguli ane nopamulami Alatala noparenta halaku Magau i dunia (1:14-15). Yesus nabaraka nampakauri to nadua pade nampopalai anudaa to nampehuai tauna. To pangkeni to Yahudi nampaewa-'I pade noliwo mampatehi-'I (3:6). Naupawee momara petiboka-Na, molelau laikewoka-Na amiramo ane Hia kana rapatehi (8:31; 9:31; 10:33-34), pade laitungkai-Na laumi rau i Yerusalem, apa naria patuju-Na mampopewai woto-Na rapatehi, mampatolohi doha manuhia (10:45). Napupi laipatehi, natuwu nculi-'I.
Patuju Markus notulihi buku ei, mampakanoto ane Yesus ee Magau to Pepakahalama pade Ana Alatala (hilo 1:1, 11, 24; 3:11; 5:7; 8:29; 9:7; 14:61-62; 15:39). Patujuna mui, mobawaita mantuku Yesus nau napa mamparumpata (hilo 8:34-38; 10:29-31).
Ihi buku ei
1. Pamula bago Yesus (1:1-13)
2. Yesus nopatudu pade nampahiloi baraka-Na i tana Galilea hampena totua-totua ngata to Yahudi noliwo mampatehi-'I (1:14–3:6)
3. Kadolaa bago Yesus i tana Galilea (3:7–6:13)
4. Yesus nopatudu pade nampopahiloi baraka-Na i ngata-ngata to i humangkulili tana Galilea hampe ana guru-Na nangaku ane Hiami Magau to Pepakahalama (6:14–8:30)
5. Yesus nangkewo nangkambelai kamate-Na (8:31–10:52)
6. Yesus nopatudu i ngata Yerusalem (11:1–13:37)
7. Yesus laihoko pade laipatehi (14:1–15:47)
8. Yesus natuwu nculi (16:1-20)