Kareba Belo to laitulihi Markus
Yohanes to Pediu
1
1 Eimi Kareba Belo nangkambelai Yesus Kristus, Ana Alatala. 2 Kareba Belo ei nopamula lako peboha Alatala to laitulihi rara buku Nabi Yesaya, Alatala nangulika Ana-Na iwei,“Hilo, Aku nantudu huro-Ku mampoilodoka-Ko
bona mopahadia dala-Mu.”
3 “Naria to nongare i tongo mpada to nabai,
pahadiaka dala Pue,
pakanoro dala to Napomakoi.”
4 Nopaganai peboha Alatala lauria, Yohanes to Pediu narata i tongo mpada to nabai nongare noparata lolita Alatala iwei, “Komi kana mancoro lako dohami pade radiu, bona Alatala mampa'ampuni dohami.” 5 Lauparia narataramo tauna lako humawee ngata i tana Yudea pade humawee todea Yerusalem rau hi Yohanes nampangaku doha-dohara hi Alatala, pade Yohanes nampadiura i Ue Yordan.
6 Yohanes nampake waru to laibabei lako wulu unta pade pampou peko lako kuliba. Koniana hokoa pade ue wani. 7 Hia nangkarebai hi tau-tauna, iulina, “Maria mei hadua Tauna to marata mapu aku. Hia nelabi baraka-Na lako hi aku. Motungka pade mobole kaloro hapatu-Na aga, moma'a mahipato. 8 Aku nampadiu komi hante ue, Hia mei mampadiu komi hante Inoha to Nagaha.”
Yesus laidiu Yohanes
9 Tempo ee mai, naratami Yesus lako ngata Nazaret to i tana Galilea pade laidiu Yohanes i Ue Yordan. 10 Bula Yesus nehuwu lako rara ue, ngkali laihilo-Na langi natebea pade Inoha to Nagaha nanau ewa hamaa tonci bangkebodo nentuu hi Hia. 11 Napu ee mai laiepe to nololita lako huruga nanguli hi Yesus iwei, “Ikomi Ana towea-Ku, to laipokagoe-Ku.”
Pehori i tongo mpada to nabai
12 Napupi Yesus laidiu Yohanes, Inoha to Nagaha nangkeni-'I rau i tongo mpada to nabai. 13 Opo mpulu eo opo mpulu mengi Yesus i tongo mpada ee. I ria-'I laipehori Magau Heta pade i po'ohaa-Na ee nadea binata-binata to naila, pade malaeka-malaeka Alatala nantulungi-'I.
Yesus i Galilea
14 Laihokopi Yohanes, Yesus rau i tana Galilea, nangkarebai Kareba Belo nangkambelai poparentaa Alatala, 15 pade iuli-Na, “Naratami tempona Alatala moparenta halaku Magau. Kancoromo pade parahayami Kareba Belo ei.”
Yesus nangkio ana-ana guru-Na to pamulana
16 Tempo Yesus nomako i wiwi Rano Galilea, laihilo-Na rodua tauna. Hira ee mai Simon pade tuaina to laikahangai Andreas, bulara notene jala i rano apa hira ee mai bagora nojala bau. 17 Yesus nangulikara, “Mai komi. Tuku-'Amo bona komi Kupakawali to pojala manuhia.” 18 Dungku laipalahirami jalara pade rauramo nantuku Yesus.
19 Bulara nomako i wiwi rano, Yesus nampahilo Yakobus pade Yohanes, ana Zebedeus, noncuna i rara duanga bulara notampala jala. 20 Pangkahilo-Nara, dungku laikio-Naramo. Lauparia Yakobus pade Yohanes nampalahi tuamara i rara duanga hante tau-tauna to nampobagokara pade rauramo nantuku Yesus.
Yesus i rara hou pepuea i ngata Kapernaum
21 Naratami Yesus hante ana-ana guru-Na i ngata Kapernaum. Tempo eo Pentuua, Yesus nehua i rara hou pepuea to Yahudi pade nopatudu nangkambelai lolita Alatala. 22 Nahera purara nangepe popatudu-Na, apa Hia nopatudu halaku tauna to nabaraka, moma ewa to nataualu buku Taurat.
23 Tempo ee i rara hou pepuea ee mai, naria hadua tauna to laipehua anudaa. Tauna ee nongare, iulina, 24 “He Yesus to Nazaret! Napa uruhia-Mu hante kami? Tumai-Ko mampakaropu kami? Incani kami hema-Ko! Iko to Nagaha lako Alatala.”
25 Naupawee Yesus nangkamaro anudaa ee, iuli-Na, “Kalino pade palaimoko lako tauna etu!” 26 Anudaa ee namparidi-ridi tauna ee pade hante nongare nalaimi lako woto tauna ee.
27 Humawee tauna to naria i hee nahera pade nonepekune, iulira, “Napa to nadupa ei? Ei mai patudu bou. Hia nojarita hante baraka. Laiparenta-Na anudaa pade hira nanturuhi parenta-Na.” 28 Lauparia, kareba nangkambelai Yesus dungku notolele i humangkulili tana Galilea.
Yesus nampakauri paniana Simon to bangkele pade tau ntanina
29 Pehuwu Yesus hante to pantuku-Na lako hou pepuea, rau-'Imi i hou Simon pade Andreas. Netuku muirahawo Yakobus hante Yohanes rau hingkani-ngkani hante hira. 30 Tempo ee paniana Simon to bangkele noturu habana nangkarani. Nariara tauna nangkewoka Yesus ane paniana Simon bulana nangkarani. 31 Pangepe-Na lauria, Yesus nehua i rara poturua, laikakamu-Na pale paniana Simon pade laipopemata-Na'i. Ngkali naurimi pangkaranina pade raumi nopahadia pangkonira.
32 Lau ngkawengiapi, nadea tauna narata hi Yesus nangkeni to nadua pade to laipehua anudaa bona Yesus mampakaurira. 33 Humawee tauna i ngata ee mai nahiromu i tingoo womo hou ee. 34 Yesus nampakauri humawee tauna to nengila hakira, pade nampopalai anudaa to nampehuaira tauna. Anudaa-anudaa ee mai momara laipaliu Yesus nojarita, apa laincanira-'I.
Yesus nopatudu i ngata-ngata ntanina
35 Hampepulo kanailena, nalimaudipi, nematami Yesus pade rau hawalikuna. Yesus rau i kalinoana pade nohambaya i ria. 36 Poma nahae lako hee, Simon pade dohe-dohena nampali Yesus. 37 Hangka lairatara-'I, iulira, “Humawee tauna nampali-Ko.”
38 Yesus nangulikara, “Kitamo rau i ngata-ngata ntanina to namohu lako ngata ei mai, bona Aku mui mangkarebai Kareba Belo i ria. Apa eemi patuju-Ku narata i dunia.” 39 Lauparia Yesus rau i humawee ngata i tana Galilea, pade nangkarebai Kareba Belo i hou-hou pepueara pade nampopalai anudaa-anudaa to nampehuaira tauna.
Yesus nampakauri hadua tauna to nohaki kusta
40 Naria hadua tauna to nohaki kusta narata notingkodu i tingoo Yesus, pade nerapi hi Hia, iulina, “Pue, ane madota-Ko, mamala'a Mupakauri.”
41 Na'ahi rara Yesus nampanaa tauna ee mai, laidama-Nami pade iulika-Na'i, “Madota-'A mampakauriko. Kaurimoko!” 42 Napu Yesus nanguli iwee, hampiniri mata narontomi haki kustana pade naurimi. 43 Lauparia Yesus nantudu tauna ee manculi, pade palingai-Na'i, iuli-Na, 44 “Nemo mpuu mei hema mukewoka bewa kaurimu. Naupawee, koimoko pade pahiloi wotomu hi imam, popewaimi kurban ewa to laiparentakanata Musa rara Buku to Nagaha bona humawee tauna mampahilo ane nauri mpuumoko.”
45 Naupawee tauna ee mai rau nangkewo i rima-rima bewa kaurina, hampena momami namala Yesus nehua kancaa-ncaa i rara ngata. Alaana Yesus rau no'oha i hawaliku ngata i kalinoana. Naupawee, tau-tauna lako i rima-rima narata oa hi Hia.