Yohanes to Pediu
3
1 Ba maria tolu mpulu mpae hinungkai panculira Yusuf lako Mesir, nopamulami Yohanes to Pediu nopatudu i tongo mpada to nabai i Yudea, 2 iulina, “Kancoromo komi lako doha, habana namohumi tempona Alatala moparenta halaku Magau.” 3 Yohanes eimi kakonona to laiuli nabi Yesaya rara Buku to Nagaha iwei,“Naria to nongare i tongo mpada to nabai,
Pahadiaka dala Pue,
pakanoro dala to Napomakoi.”
4 Yohanes nampake waru to laibabei lako wulu unta pade pampou peko lako kuliba. Koniana hokoa pade ue wani.
5 Tempo ee, narataramo hi Yohanes tauna lako ngata Yerusalem, lako humawee ngata i tana Yudea pade lako humpii Ue Yordan. 6 Napurapa nangaku doha-dohara, laidiunaramo Yohanes i Ue Yordan.
7 Naupawee hangka Yohanes nampahilo nadea to Farisi pade to Saduki narata mingki radiu, iulikanaramo, “He, komi muli ule to narahua! Iulimi komi, ane radiudamo komi mamala komi mampetiboka pehuku Alatala to parami madupa? 8 Moingkumohawo hante ingku to nabelo. Etumi tanda ane mpuu-mpuu nancoromo komi lako doha-dohami. 9 Nemo mipekiri pade miuli rara bongomi, ‘Moma kami Nahuku Alatala, apa kami ei muli Abraham.’ Bona mincani, ane Napodota Alatala, watu-watu ei mamala Napajadi muli Abraham.
10 Nahadiami baliu i puu kau. Humawee kau to moma nabelo wuana, ratowo pade ratene i rara apu.
11 Aku nampadiu komi hante ue halaku tanda ane nancoromo komi lako doha-dohami. Naupawee, Hia to marata mei nelabipi baraka-Na lako hi aku. Moloncu hapatu-Na aga, moma'a mahipato. Hia mei mampadiu komi hante Inoha to Nagaha pade apu. 12 Wera i rara mpale-Nami, Napake mowiri humawee pae-Na hampe magaha opana. Napakagaha mei poihea-Na pade Napalimpuru pae-Na to naihi Naboli i gampiri-Na, naupawee opana Napapuhi i rara apu to moma naria kamateana.”
Yesus laidiu Yohanes
13 Tempo ee neongkomi Yesus lako tana Galilea rau i Ue Yordan nampotomuka Yohanes bona nadiu-'I. 14 Naupawee Yohanes nampatagi-'I, iulina, “Aku to kakonona mahipato Mudiu. Napa pade ntani Ikodi narata hi aku?”
15 Naupawee, Yesus nampahonoi'i, “Palelemi mawali iwee welau ei. Habana hante lauria, kita nopaganai dota Alatala.” Lauparia, neturuhimi Yohanes hi Yesus.