Pehori i tongo mpada to nabai
4
1 Napu ee Yesus laikeni Inoha to Nagaha rau i tongo mpada to nabai bona napehori Magau Heta. 2 Nahudupi Yesus nopuaha opo mpulu eo opo mpulu mengi, naoromi tai-Na. 3 Lauparia, nehupami Magau Heta hi Hia pade nangulika-'I, “Ane Ana Alatala-Ko, tudumi watu-watu ei mawali roti.”4 Yesus nampahonoi'i, “Naria laitulihi rara Buku to Nagaha, ‘Moma wuwu roti to nampakatuwu manuhia. Manuhia mui natuwu lako butu lolita Alatala.’ ”
5 Napu ee Magau Heta nangkeni Yesus rau i Yerusalem pade nampopokangkore-'I i lolo wumu Hou Alatala, 6 pade laiulikana-'I, “Ane Ana Alatala-Ko, pengkanawumo-Ko rau i tana, apa naria laitulihi rara Buku to Nagaha nangkambelai Iko, ‘Alatala mantudura malaeka-Na mamparade-Ko hante palera bona paa-Mu moma mambela watu.’ ”
7 Yesus nampahonoi'i, “Naria mui laitulihi rara Buku to Nagaha, ‘Nemoko mampehori baraka Pue Alatalamu.’ ”
8 Napu ee Magau Heta nangkeni Yesus rau i lolo bulu to nelabi kalangkona pade nampahiloika-'I humawee poparentaa i dunia hante nengila kahugiana bo karambana, 9 pade Magau Heta ee nangulika Yesus, “Humawee lauria kuwai hi Iko purami ane madota-Ko motingkodu mepue hi aku.”
10 Nehono Yesus hi hia, “Petibomoko Magau Heta! Habana naria laitulihi rara Buku to Nagaha, ‘Iko kana mepue hi Pue Alatalamu pade hi Hiako aga meturuhi.’ ”
11 Lauparia, Magau Heta nampalahi Yesus, pade bahangkua dua malaeka Alatala narata nangkeni to laiparaluu Yesus.
Yesus i Galilea
12 Pangepe Yesus ane laihokomi Yohanes to Pediu, raumi Yesus i tana Galilea. 13 Narata i Galilea, rau-'I i ngata Nazaret. Napu ee neongko-'Imi lako Nazaret rau-'I no'oha i ngata Kapernaum to i wiwi Rano Galilea, i pongataara to Zebulon pade to Naftali. 14 Yesus rau no'oha i ria nopaganai lolita Alatala to laiparata nabi Yesaya owi, iwei,
15 “Tana to Zebulon pade to Naftali,
dala rau i Rano Galilea, i dipo Ue Yordan,
to i tana Galilea, po'ohaara to moma Yahudi.
16 Ilodo tau-tauna to no'oha i ria natuwu i rara kalimauana,
naupawee tempo ei mai laihilorami baa to nabohe.
Ilodo baraka kamatea nampabungura,
naupawee tempo ei mai baa ee mai nampakabaara.”
17 Nopamula lako heemi Yesus noparata hi tau-tauna iwei, “Kancoromo komi lako dohami habana namohumi tempona Alatala moparenta halaku Magau.”
Yesus nangkio ana-ana guru-Na to pamulana
18 Tempo Yesus nomako i wiwi Rano Galilea, laihilo-Na rodua tauna to ntali tuai. Hira ee mai, Simon to laikahangai mui Petrus pade tuaina to laikahangai Andreas, bulara notene jala i rano apa hira ee mai bagora nojala bau. 19 Yesus nangulikara, “Mai komi. Tuku-'Amo bona komi Kupakawali to pojala manuhia.” 20 Dungku laipalahirami jalara pade rauramo nantuku Yesus.
21 Napu ee Yesus nopadola pomakoa-Na pade laihilo-Na mui to ntali tuai ntanina. Hira ee mai ana Zebedeus, hangara Yakobus pade Yohanes. Bulara notampala jala rara duanga hante Zebedeus tuamara, Yesus nangkiora. 22 Dungku palahirami duanga bo tuamara pade rauramo nantuku Yesus.
Yesus nopatudu pade nampakauri nadea tauna
23 Yesus noliliko i humawee ngata to i Galilea, nopatudu i hou-hou pepuea, nangkarebai Kareba Belo nangkambelai bewa Alatala moparenta halaku Magau, pade nampakauri to nohaki bo to napungku. 24 Alaana, kareba nangkambelai Yesus notolele duu narata i propinsi Siria hampena laikenira hi Hia nadea to nohaki pade napepa iepera. Nariara to laipehua anudaa, to nohaki lilimpuanga, pade to napungku. Humaweera laipakauri Yesus. 25 Nadea mpuu tauna nantuku-'I tempo ee mai. Tauna eera mai narata lako tana Galilea, lako Dekapolis, lako ngata Yerusalem, lako tana Yudea pade lako dipo Ue Yordan.