Kareba Belo to laitulihi Yohanes
Lolita Alatala to nawali manuhia
1
1 Pamulana ntoto, kapomana dunia laipajadi, naria amimi Hia to laiuli Lolita. Lolita ee mai nodohe hante Alatala pade Lolita ee mai Alatala motomi. 2 Lako pamulana Lolita ee mai nodohe hante Alatala. 3 Hante Lolita eemi Alatala nopajadi hangu hangaa. Lako humawee to laipajadi Alatala moma naria hangua to laipajadi-Na ane moma hante Lolita ee mai. 4 Lolita eemi to nampawai katuwua. Katuwua ee mai nampakabaa pampekiri manuhia. 5 Baa ee mai newanta i kalimauana pade kalimaua moma namala nampadagi'i.6 Naria hadua tauna laihuro Alatala, hangana Yohanes. 7 Yohanes ee mai narata halaku habi to nampahilo mata baa ee mai pade laikarebaina, bona hante pohabina humawee tauna meparahaya. 8 Yohanes moma'i baa ee mai, hia wuwu hadua habi to nangkarebai baa ee mai. 9 Baa ee mai baa to nakono, to narata i rara dunia nampakabaa humawee manuhia. 10 Lolita ee mai nariami i dunia, pade Hia to nopajadi dunia, naupawee manuhia i dunia ei moma nangincani-'I. 11 Hia narata i ngata-Na moto, naupawee tau-tauna to hangata-Na momara nadota nantarima-'I. 12 Naupawee butu tauna to nantarima-'I pade neparahaya hi Hia, laiwaika-Na baraka bona mawali ana-ana Alatala. 13 Hira nawali ana-ana Alatala moma habana laipoanaka manuhia ba lako dota rara hadua balailo, naupawee Alatala moto tumpu dota nopajadira ana-Na. 14 Hia to laiuli Lolita ee mai nawali manuhiami, pade no'oha doheta i rara dunia. Laihilo kamimi kabohe baraka-Na. Alatala Tuama to nampawaika-'I kabohe baraka ee mai, apa Hiami Ana-Na hadudua-Na to naponu hante towe pade kakonoa. 15 Yohanes nampakanoto hi todea hema kakonona Lolita ee mai, hante nongare'i nanguli, “Eimi Tauna to laipatujuku, panguliku iwei: Mapu aku, marata mei Hia to neliupi pobunu-Na lako aku, apa Hia naria amimi kapomana'a laiote.” 16 Neliu mpuu kabohe towe-Na, moma-'I naria nentuu nampawaikata rahi. 17 Musa nampawaikata patudu Taurat lako Alatala, naupawee Yesus Kristus nampawaikata kabohe towe pade kakonoa lako Alatala. 18 Moma hema haduaa tauna to nariami nampahilo Alatala. Wuwu Ana hadudua Tuama aga, to batena moto oa-'I natida hingkani-ngkani hante Tuama. Hiami to nangkewo nangkambelai hema Alatala ee mai hi manuhia.
Yohanes to Pediu nangkewo hema'i kakonona
19 Hira to pangkeni to Yahudi i Yerusalem, nampahuro bahangkua dua imam pade to Lewi rau hi Yohanes mepekune hi hia iwei, “Hemako kakonona?”
Lauparia Yohanes nangulikara nangkambelai hema'i kakonona, iwei, 20 “Moma'a Magau to Pepakahalama to laitipa Alatala.” Lauria laiuli poona Yohanes hi hira.
21 Laipekunekira mui'i, “Ane wee, hemako kakonona? Elia?”
Nehono Yohanes, “Moma.”
Padolara mui nepekune, “Ba ikomidi nabi bohe to marata ee mei, ba moma?”
Nehono Yohanes, “Moma.”
22 Lauparia iulikara'i, “Ane wetu, kewoka kami hemako kakonona, bona kikewokara to nampahuro kami. Hema mpuuko kakonona?”
23 Yohanes nehono, ane hiami to laiuli nabi Yesaya owi iwei, “Naria tauna to nongare i tongo mpada to nabai, ‘Pakanoro dala to Napomakoi Pue!’ ”
24 Hira to laihuro ee mai nariara bahangkua dua to Farisi. 25 To Farisi eera mai nepekune hi Yohanes, “Ane momako Magau to Pepakahalama to laitipa Alatala, moma muiko Elia, ba nabi bohe to marata ee mei, napa pade nediuko?”
26 Nehono Yohanes hi hira, “Aku nampadiu tauna hante ue, naupawee i lentongomi naria hadua Tauna to moma incanimi. 27 Tauna eemi to marata mapu aku. Mobole kaloro hapatu-Na aga, moma'a mahipato.” 28 Humawee lauria nadupa i Betania to i dipo Ue Yordan. I heemi Yohanes nediu.
Yohanes nanguli ane Yesus ee mai Ana Alatala
29 Kanailena Yohanes nampahilo Yesus narata hi hia. Iulina Yohanes, “Hilo, Hia etumi Ana Bimba Alatala to mampakaronto doha manuhia. 30 Hiami to laipatujuku panguliku iwei, ‘Mapu aku, marata mei hadua Tauna to neliupi pobunu-Na lako aku, apa Tauna ee naria amimi kapomaku laiote.’ 31 Aku moto, pamulana moma-'I laincaniku ane Hia ee mai Magau to Pepakahalama to laitipa Alatala. Naupawee patujuku narata pade nediu hante ue, bona to Israel mangincani-'I.”
32 Pade Yohanes mui nanguli, “Laihilokumi Inoha to Nagaha lako Alatala nehompo lako langi ewa tonci bangkebodo, nentuu hi Yesus. 33 Pamulana, poma muikuwo laincaniku ane Hiami Magau to Pepakahalama, naupawee Alatala to nampahuro'a mediu hante ue nololitami hi aku, iwei, ‘Ane muhilo Inoha to Nagaha mehompo lako Alatala pade mentuu hi hadua Tauna, Tauna eemi mei to mediu hante Inoha to Nagaha.’ 34 Aji, laihilo matakumi humawee lauria nadupa, etu pade ku'ulika komi ane Hiami Ana Alatala.”
Ana-ana guru Yesus to pamulana
35 Kanailena, nokangkore muimi Yohanes hante rodua ana guruna i hee. 36 Hangka laihilona Yesus noliu, iulinami Yohanes, “Hilo! Laumiria Ana Bimba Alatala!”
37 Pangepera ana guruna to rodua ee mai napa to iuli Yohanes, rauramo nantuku Yesus. 38 Yesus neili pade laihilo-Nara nantuku-'I. Iulika-Nara, “Napa to ipalimi?”
Nehonora hi Hia, “Rabi, i rima-Ko no'oha?” (Rabi ee mai batuana: Guru).
39 Yesus nangulikara, “Maimo komi bona mihilo.” Rauramo nantuku Yesus pade laihilorami po'ohaa-Na. Eo ee mai no'oharamo i hee dohe-Na. Tempo ee mai ba maria tinti opo ngkinuwia.
40 Hadua lako rodua ana guru Yohanes to nantuku Yesus ee mai, hangana Andreas, tuai Simon Petrus. 41 Napu ee raumi Andreas nampotomuka Simon tuakana, pade iulikana'i, “Notomumo kami hante Magau to Pepakahalama to laitipa Alatala.” (Magau to Pepakahalama rara baha Yunani laiuli Kristus.) 42 Lauparia Andreas nangkeni Simon hi Yesus. Karatara ria, Yesus nampenoto Simon, pade iulika-Na'i, “Iko Simon, ana Yohanes, iko mei rakio Kefas.” Kefas ei mai rara baha Yunani laiuli Petrus, batuana: Bulu Watu.
43 Kanailena Yesus mingki meongko rau i Galilea. Laipotomu-Na Filipus, pade iulika-Na'i, “Tuku-'Amo!” 44 Filipus ee mai to Betsaida, ngatara Andreas pade Petrus. 45 Filipus rau nampotomuka Natanael, pade iulikana'i, “Notomumo kami hante Tauna to laitutura Musa rara buku Taurat pade to laituturara nabi. Tauna ee mai Yesus, ana Yusuf lako Nazaret.”
46 Natanael nangulika Filipus, “Moma parahayaku ane maria to mabelo marata lako Nazaret!”
47 Iuli Filipus hi hia, “Maimoko pade hilo motomi!”
Yesus nangkahilo Natanael narata hi Hia, pade iuli-Na nangkambelai Natanael, “Hilo, hia ei mai mpuu-mpuu to Israel, moma'ihana naria nebagiu!”
48 Natanael nepekune hi Yesus, “Bewa pade laincani-Mu'a?”
Nehono Yesus hi hia, “Kapomanako laikio Filipus, laihilo-Kumoko i une hampuu kau ara.”
49 Nangepe to iuli Yesus lauria, Natanael nangulika-'I, “Rabi, Iko mpuumi Ana Alatala. Ikomi Magau to Israel!”
50 Yesus nangulika Natanael, “Neparahayako hi Aku, habana iuliKu, laihilo-Kuko i une kau ara? Madeadipi mei kajadia to muhilo to meliupi kabohena.” 51 Padola-Na mui Yesus nangulika'i, “Mpuu-mpuu Ku'ulikako, kana muhilo mei langi matebea pade malaeka-malaeka Alatala manau bo manake rau hi Ana Manuhia.”