Yesus nampakauri to napungku i Kapernaum
2
1 Bahangkua eo lako hee, Yesus nanculiki rau i ngata Kapernaum. Pade notolelemi kareba ane Yesus naria i rara hou po'ohaa-Nami. 2 Lauparia nadearamo tauna narata nahiromu i hou ee, alaana momami naria kakaloaana, nabihi duu rata womo. Bula Yesus noparata Kareba Belo lako Alatala hi tau-tauna, 3 narata opo dua tauna nokowa hadua to napungku rau hi Hia. 4 Naupawee momara namala nangkeni to napungku ee rau hi Hia, apa nadea gaga tauna nahiromu i humpii Yesus. Alaana laihungkara ata hou hintoto kariaa Yesus, pade laiulurami to napungku ee hante alina. 5 Pangkahilo-Na Yesus peparahayara, iulika-Nami to napungku ee mai, “Ana-Ku, doha-dohamu laiampunimi.” 6 Bahangkua dua to nataualu buku Taurat to noncuna i hee nanguli rara bongora, 7 “Bewa pade iwee iuli-Na Hia ei mai? Hia ei nampahauru Alatala. Moma hema ntanina to mamala moampuni doha, wuwu Alatala aga.”
8 Laincani-Na Yesus napa to i rara bongora, pade laiulika-Nara, “Napa pade iwee pampekirimi? 9 Uma to nadoli Ku'uli hi to napungku ei, dohamu laiampunimi, ba pokangkoremoko, ongkomi alimu pade pomakomoko? 10 Bona mincani, i rara dunia ei mai, Ana Manuhia nabaraka moampuni doha.” Napu ee Yesus nangulika tauna to napungku ee, 11 “Ku'ulikako! Pokangkoremoko, ongkomi alimu pade panculimoko rau houmu!”
12 Nokangkore mpuumi to napungku ee mai, laiongkonami alina pade nomakomi nehuwu lako hou ee laidulu naa tauna. Humawee tauna to nampanaa'i nahera pade nampaune Alatala, iulira, “Poma naria laihilota to ewa ei.”
Lewi to peduhu paja nantuku Yesus
13 Napu ee, rau nculimi Yesus i wiwi Rano Galilea. Nadea tauna narata hi Hia, pade laipatudu-Nara. 14 Bula Yesus nomako, laihilo-Na Lewi ana Alfeus noncuna i hou popahirurua paja, pade laiulika-Na'i, “Tuku-'Amo.” Neongko mpuumi Lewi rau nantuku-'I.
15 Tempo Yesus nangkoni i hou Lewi, nadea to peduhu paja hante tau-tauna to nadoha nangkoni dohe Yesus pade ana-ana guru-Na, apa nadea tauna nantuku-'I. 16 Hangka bahangkua dua to Farisi to nataualu buku Taurat nampahilo Yesus nangkoni nodohe hante to peduhu paja pade tauna to nadoha, nepekuneramo hi ana-ana guru Yesus, “Napa pade Gurumi nangkoni dohera to peduhu paja pade to nadoha?”
17 Laiepe-Na Yesus napa to laiulira lauria pade laiulika-Nara iwei, “Tauna to naseha moma namparaluu dokutoro. Tauna to nadua aga to namparaluu dokutoro. Aku narata i dunia moma-'A mangkio tauna to nanoro, naupawee narata-'A mangkio tauna to nadoha.”
Patudu Yesus moma mamala rapomegalo hante ada kabiahaa
18 Hangkani tempo, bulara ana guru Yohanes to Pediu pade tau-tauna to Farisi nopuaha, naratara tauna nepekune hi Yesus, “Napa pade ana-ana guru Yohanes pade ana-ana guru to Farisi naharo nopuaha nantuku ada kabiahaata, bo hira ana guru-Mu moma?”
19 Yesus nampahonoira, “Moma nahipato bale-bale pongante balailo mopuaha ane laipodohera i heedipi pongante balailo ee. Ane pongante balailo rapodoheradipi, momara mamala mopuaha. 20 Naupawee, marata moto mei tempona pongante balailo ee ra'ala lako hi hira. Tempo ee mei pade mopuaharada.a 21 Moma hema haduaa tauna motampala waru to nauha hante potaia kae to nabou, apa ane rapowee'i, kae bou to laipake notampala ee mei, mampadii kae to nauha ee mai, alaana mabohekimi kabentaa waru ee. 22 Wee moto mui ue anggur to nabou, moma'i laikahini rara kuhita kuliba to nauha. Apa ane wee, mabentami kuhita kuliba ee hampena mabubumi anggur ee pade kuhita kuliba ee mai marotami. Ue anggur to nabou kana rakahini i rara kuhita kuliba to nabou.”
Ana-ana guru Yesus nopuputi wuli gando tempo eo Pentuua to Yahudi
23 Hangkani tempo, i eo Pentuua to Yahudi, Yesus hante ana-ana guru-Na noliu i bone gando. Bulara nomako, ana-ana guru Yesus nopuputi wuli gando. 24 Bahangkua dua to Farisi nepekune hi Yesus, “Hilo, napa pade ana-ana guru-Mu nobabei to laipetagii tempo eo Pentuua?”
25 Yesus nampahonoira, “Apa poma ibahami napa to laibabei Magau Daud ilodo? Tempo ee hia hante dohe-dohena nakaopua pangkonira pade naoro taira. 26 Tempo Abyatar nawali Imam Bohe, Magau Daud nehua i rara Kemah Alatala, pade nangkoni roti pewaia to laijuju hi Alatala, pade laiwaikana muira to nantuku'i. Kakonona momara mamala mangkoni roti ee. To mamala mangkoni roti ee imam-imam aga.”