Patudu Yesus nangkambelai pogaa to poncamoko
10
1 Yesus neongko lako ngata Kapernaum rau i Yudea pade rau i dipo Ue Yordan. I ria nadea tauna nahiromu i humpii-Na, pade ewa kabiahaa-Na laipatudu-Nara.2 Lauparia narataramo bahangkua dua to Farisi madota mopanawu Yesus pade nepekune, “Bewa popantarui-Mu? Mantuku atura agamata, mamaladihawo hadua balailo mampogaaka bangkelena?”
3 Nehono Yesus, “Napa to laiparentakana komi Musa?”
4 Nehonora, “Musa nampaliu hadua balailo mampogaaka bangkelena, naupawee kana nababei ncala hura pogaa.”
5 Napu ee Yesus nangulikara, “Musa notulihi parenta lauria hi komi, apa neliu gaga kakoo rarami. 6 Naupawee kakonona, hinungkai dunia laipajadi Alatala, laipajadi-Nara balailo pade bangkele. 7 ‘Etu pade balailo kana mampalahi tuamana bo tinana, pade mopahangu hante bangkelena, 8 hampena roduara ee mawali hangu wotoradamo.’ Aji, i tingoo Alatala, to poncamoko momaramo rongu woto, naupawee nawali hangu wotoradamo. 9 Etumo, napa to laipahangu Alatala moma mamala rapopogaa manuhia.”
10 Hangka i hourapa, ana-ana guru-Na nepekune hi Yesus nangkembalai to iuli-Na lauria. 11 Lauparia Yesus nangulikara, “Hema to mampogaaka bangkelena pade mobangkeleki, hia nogau hala pade nadoha hi bangkelena to puu. 12 Wee moto mui ane hadua bangkele mampogaaka balailona pade mobalailoki, hia nogau hala.”
Yesus nantiroi ngana-ngana
13 Napu ee, bahangkua dua tauna nangkeni ngana-ngana kodi hi Yesus bona Natiroira, naupawee ana-ana guru-Na nampakahodora tauna ee. 14 Nampanaa ingkura ana guru-Na ee, nahodo-'I Yesus pade iulika-Nara, “Paleleramo ngana etu marata hi Aku, nemora mitagi, habana tauna to ewa hirami to mawali todea i rara poparentaa Alatala. 15 Mpuu-mpuu Ku'ulika komi, hema-hema to moma nampaturuhi Alatala ewa ngana kodi, moma'i mawali todea Alatala.” 16 Napu ee, Yesus nampakapuira ngana ee mai pade laidama-Nara bo laitiroi-Na.
To nahugi nakoro mehua rara poparentaa Alatala
17 Tempo Yesus nopadola pomakoa-Na, naria hadua balailo nokumeno nampotomuka-'I pade notingkodu i tingoo-Na bo nepekune, “Guru to nabelo, napa to kana kubabei bona kurata katuwua to moma maria kahuduana?”
18 Nehono Yesus, “Napa pade iulimu nabelo-'A? Moma naria haduaa tauna to nabelo, wuwu Alatala aga to nabelo. 19 Laincanimu moto parenta Alatala to nanguli iwei, nemo mepatehi, nemo mogau hala, nemo mangio, nemo manguli to moma nakono i tingoo to pobotuhi, nemo mebagiu, bila tuamamu bo tinamu.”
20 Nehono tauna ee hi Yesus, “Guru, humaweena lauria laituruhikumi lako kanguraaku.”
21 Yesus nampenoto'i hante towe-Na pade iulika-Na'i, “Hangaapi to poma nagana hi iko. Koimoko, pobalumi humawee gagumu pade popewaimi doina hi to nakahiahi bona murata mei gagu i huruga. Napu ee karatamoko mantuku-'A.”
22 Pangepena to iuli Yesus lauria, nawali nahau rara tauna ee pade raumi hante juu rarana, apa nadea gaguna.
23 Napu ee Yesus nampanaara ana guru-Na to nahiromu i humpii-Na, pade iulika-Nara, “Nakoro mpuu to nahugi mehua i rara poparentaa Alatala.” 24 Ana-ana guru-Na nakonce nangepe to iuli Yesus lauria. Naupawee padola-Na Yesus nangulikara, “Ana-ana-Ku, nakoro mpuu mehua i rara poparentaa Alatala. 25 Nadolipi hamaa unta mehua rara wulou jaru lako hadua to nahugi mehua rara poparentaa Alatala.”
26 Lauparia natetambai kakoncera, pade noneulika hore hira, “Ane wee, hema to mamala rapakahalama?”
27 Yesus nampenotora pade iulika-Nara, “To moma naowo hi manuhia, naowo hi Alatala.”
Tomo tauna to nantuku Yesus
28 Petrus nangulika Yesus, “Pue, hangu hangaa laipalahi kamimi pade nantuku-Ko!”
29 Iuli-Na Yesus, “Mpuu-mpuu Ku'ulika komi, hema to nampalahi houna, ompina balailo ba ompina bangkele, tinana ba tuamana, ana-anana ba bonena'i habana nantuku-'A pade nangkarebai Kareba Belo, 30 natantumi tempo ei tauna ee kana mamparata nculi hatu ngkani hou, ompina balailo, ompina bangkele, tinana, ana-anana pade bonena, naupa madea ngkani'i rahehaki, pade eo ngkapurina mei narata katuwua to moma maria kahuduana. 31 Naupawee madea tauna to welau ei laibila, mawali tauna to moma rabila, pade tauna to welau ei moma laibila, mawali tauna to rabila.”
Pangkewo Yesus katolu ngkanina nangkambelai bewa-'I mei mamate
32 Yesus hante ana-ana guru-Na pade bahangkua dua tau ntanina nopadola pomakoara rau ngata Yerusalem. Yesus nomako noilodo. Ana-ana guru-Na nakaekata, pade tauna to netuku nehuwu ekara. Hangkanipi Yesus nangkiora hampulu rodua ana guru-Na nopatani lako todea pade laiulika-Nara napa mei to kana madupa hi Hia. 33 Iuli-Na, “Hilo, kita ei mai rara pomakoa rau i Yerusalem. I ria mei Ana Manuhia rapopewai hi imam-imam to i matana pade hi hira to nataualu buku Taurat, pade rabotuhira mei bona rahuku mate-'I. Napu ee rapopewaira-'I hi tau-tauna to moma Yahudi, 34 pade Hia mei rapopore, ratailuhi, racambu pade rapatehi. Naupawee eo katoluna mei matuwu nculi-'I lako kamatea-Na.”
Perapia Yakobus pade Yohanes
Moma meparenta aga mampalayani
35 Napu ee Yakobus pade Yohanes, ana-ana Zebedeus, nampamohuki Yesus pade nangulika-'I, “Guru kiharumaka bona madota-Ko mobabei napa to kiperapi!”
36 Nehono Yesus hi hira, “Napa to ipodotami Kubabei hi komi?”
37 Laihonoira-'I, “Kiperapi bona ane moparentapa-Ko mei halaku Magau, mamala kami moncuna moparenta hingkani-ngkani hante Iko. Hadua mali pangkana-Mu pade hadua mali pangkai-Mu.”
38 Naupawee Yesus nangulikara, “Moma incanimi napa to iperapimi. Mipakule mangkolo kahehaa to kana Kukolo, pade mahadia komi rahehaki ewa Aku?”
39 Nehonora hi Hia, “Kipakule.”
Yesus nangulikara, “Mikolo ami mei kahehaa-Ku, pade rahehaki ami komi mei ewa Aku. 40 Naupawee hema mei to moncuna mali pangkana-Ku ba mali pangkai-Ku, moma Aku to mampakatantu. Laipakatantu-Na amimi Alatala Tuama-Ku hemara to moncuna i poncunaa ee.”
41 Nangepe lauria, nahodoramo ana guru to hampulu dua hi Yakobus pade Yohanes. 42 Naupawee Yesus nangkio purara pade iuli-Na, “Laincanimi moto kahombora to poparenta to moma nangincani Alatala noparenta todeara. Tauna to naria pangkara noparenta todeara hante hekera. 43 Moma iwee ane komi. Hema lako hi komi mingki malangko pangkana, hia ee mai kana mampalayani komi ewa hadua batua. 44 Pade hema to mingki mawali to pangkenimi, hia kana mawali ewa hadua batua mopahadia napa to miparaluu. 45 Apa Ana Manuhia narata, moma bona ralayani, naupawee mampalayani pade mampopewai tuwu-Na mawali petolohi hi tauna to nadea.”
Yesus nampakauri Bartimeus
46 Naratami Yesus pade ana-ana guru-Na i ngata Yerikho. Pehuwu Yesus hante ana-ana guru-Na pade nadea tau ntanina lako Yerikho, naria hadua to naburo noncuna i wiwi dala nerapi-rapi, hangana Bartimeus ana Timeus. 47 Hangka laiepena Yesus to Nazaret noliu, nongare'i nekio, “Yesus muli Magau Daud, potowe'akuwo!”
48 Nadea tauna nampatagi'i pade nantudu'i malino. Naupawee pahimukukina laumi nongare, iulina “Muli Magau Daud, potowe'akuwo.”
49 Nangepe'i nongare, nentuumi Yesus pade iuli-Na, “Kio'i tumai tauna etu.”
Laikiorami to naburo ee mai pade iulikara'i, “Pakaroho raramu pade pokangkoremoko, laikio-Nako.”
50 To naburo ee mai noloncu waru pokarolapiina, pade dungku nokangkoremi rau hi Yesus.
51 Nepekunemi Yesus hi hia, “Napa to laipodotamu Kubabei hi iko?”
To naburo ee mai nehono, “Rabi, to laipodotaku bona mamala'a menaa!”
52 Lauparia Yesus nangulika'i, “Koimoko! Peparahayamu nampakahalamako.”
Tempo ee mui namalami nenaa, pade raumi nantuku Yesus rara pomakoa-Na.