Kareba Belo to Laitulihi Lukas
Patuju buku ei
1
1 Teofilus to ipemabohe,Nadea tauna nampehimukui notulihi tutura nangkambelai to nadupa i lentongota, 2 ewa to laiparatara to lako pamulana nampahilo mata pade nampotolele kareba lauria. 3 Lauparia, hangka laipeguruiku mpuu napa to nadupa lako pamulana, laibotuhiku motulihikako hante katempalahana mantuku pomeduncu tuturana, 4 bona muncani ane humawee to laipatudukako mpuu-mpuu nakono.
Pangkewo nangkambelai pangotea Yohanes to Pediu
5 Tempo Herodes nawali magau i Yudea, naria hadua imam to laikahangai Zakharia. Hia ei hadua lako kolompo Abia. Bangkelena mui muli Imam Harun. Hangana Elisabet. 6 Hira ei mai tauna to nanoro i tingoo Alatala, pade natigu mpuura nanturuhi humawee parenta pade katantua Pue. 7 Naupawee momara noana habana Elisabet nalalo pade natua muiramo.
8 Hangkani tempona kolompo Abia to kana mobago halaku imam. Etu pade Zakharia mui nobago halaku imam i tingoo Alatala apa hia hadua lako hi hira. 9 Ewa kabiahaara, imam-imam nocabu lot mampelihi hema to mehua i rara Hou Pue mantunu dupa. Tempo ee Zakharia to natepelihi. 10 Tempo dupa laitunu, humawee tauna i hawalikuna nohambaya. 11 Lauparia, ngkali nerawami hadua malaeka Pue hi Zakharia. Malaeka ee nokangkore i mali kana meja pantunua dupa.
12 Pampahilona malaeka ee, nakonce pade naeka mpuumi Zakharia. 13 Naupawee malaeka ee nangulika'i, “Nemoko maeka Zakharia, hambayamu laiepemi. Elisabet bangkelemu mei moana hadua ngana balailo pade kana mukahangai'i Yohanes. 14 Iko mei magoe mpuuko pade madea tauna magoe ane raotepi ngana ee mai, 15 habana hia mei mawali tauna to neliu pobununa i tingoo Pue. Moma'i manginu anggur bo inua to nepakalangu. Maponu'i mei hante Inoha to Nagaha hinungkai lako rara ntai tinana. 16 Madea mei tauna to Israel nakeni nculi hi Pue, Alatalara. 17 Pade momako'i mampoilodoka Pue mampahadiaka dala-Na rara roho pade baraka to nahibali hante Nabi Elia, bona rarara to tuama mabelo nculi hi ana-anara pade tauna to moma nanturuhi Alatala megoli mantuku dala to nakono. Humawee lauria nababei Yohanes bona mampahadiaka hi Pue todea to mahadia mantarima-'I.”
18 Lauparia, iulina Zakharia hi malaeka ee, “Bewa bona kuncani humaweena etu mai? Aku ei mai natua'amo. Bangkeleku mui natua gagami moana.”
19 Nehono'i malaeka ee, “Aku ei Gabriel, hadua lako batua Alatala. Hia nantudu'a mojarita hi iko pade mangkewokako kareba belo ei. 20 Humawee to iulikakuko kana madupa i tempo to laipakatantu-Na amimi Alatala. Naupawee moma'i parahayamu to iuliku, aji mawali maboboko pade momako mamala mojarita duuna anamu raote.”
21 Hamali ee todea to nampopea Zakharia nahera, apa nahae gaga'i i rara Hou Alatala. 22 Hangka nehuwu Zakharia lako Hou Alatala momami namala nojarita hi hira. Lauparia, nengkaoramo ane naria to laihilona rara Hou Alatala, apa noraodimi moma'imi namala nojarita.
23 Nahudupi bagona, nanculimi rau i houna. 24 Poma nahae lako hee, notianami Elisabet bangkelena. Alima mula kahaena moma'i naria Elisabet nehuwu lako houna. Elisabet nanguli, 25 “Eimi to laibabeika-Na'a Pue. Laitiroi-Na'a pade laipakaronto-Na ea mataku i tingoo todea habana nalalo'a.”
Pangkewo nangkambelai pangotea Yesus
26 Kaganana ono mula Elisabet notiana, Alatala nantudu malaeka Gabriel rau i hangu ngata i Galilea to ikahangai Nazaret, 27 mampotomuka hadua toronaa to laikarohoi balailo to ikahangai Yusuf muli Magau Daud. Hanga toronaa ee mai Maria. 28 Malaeka ee mai narata hi Maria pade nanguli, “Tabe, iko to laitiroi Alatala! Pue mampodoheko!”
29 Nakonce mpuu'i Maria nangepe to iuli malaeka ee pade rara bongona nepekune, “Napa batuana petabe ee rau?”
30 Nampahilo Maria nakonce, nojaritami malaeka ee, “Nemoko maeka, Maria! Apa Alatala nantiroiko. 31 Epe, motianako mei pade moana hadua ngana balailo, pade kana mukahangai-'I Yesus. 32 Hia mei mawali to mabohe pade rakahangai Ana Alatala to i Lolona. Pade Pue Alatala mampawai-'I poncunaa Magau Daud, tumpuloko-Na. 33 Hia mei mawali magau to Yahudia duu kahae-haena, pade poparentaa-Na moma maria kahuduana.”
34 Pangepena napa to iuli malaeka ee, nepekunemi Maria, “Bewami madupa to iulimu etu, bo poma'a nobalailo?”
35 Nehono malaeka ee, “Inoha to Nagaha marata hi iko pade baraka Alatala to i Lolona mampodooko. Etu habana Anamu mei rauli to Nagaha, Ana Alatala. 36 Hilo, ompimu Elisabet mui bulana nampotianaka hadua ngana balailo naupa natuami. Wula ei Elisabet to laiulira nalalo ee kaono mulanami notiana. 37 Apa moma naria to moma naowo hi Alatala.”
38 Iulina Maria, “Kakonona aku ei batua Pue. Madupami hi aku ewa to iulimu etu!” Napu ee raumi malaeka ee nampalahi'i.
Maria nantako Elisabet
39 Poma nahae lako ee, neongkomi Maria rau hangu ngata to i buluna i Yudeab. 40 Karatana i ria nehuami i hou Zakharia pade netabe hi Elisabet. 41 Pangepe Elisabet petabe Maria, ngana i rara ntaina nokageno pade Elisabet naponu Inoha to Nagaha, 42 hampena nahimuku pojaritana, iulina, “Alatala nampatiroiko lako humawee bangkele. Pade Ngana to laipotianakamu mui laitiroi Alatala. 43 Napa pade nadupa wei hi aku hampena tina Pueku narata nantako'a? 44 Hilo, hangka laiepeku petabemu, ngana rara ntaiku nokageno nagoe. 45 Norahimoko habana laiparahayamu ane napa to laiuli Pue hi iko kana madupa.”
Ulia peune Maria
46 Iulina Maria,
“Inohaku nampaune Pue,
47 pade raraku nagoe, habana Alatala nampakahalama'a.
48 Apa laihilo-Nami tariku, batua-Na to netowei.
Kakonona mopamula welau ei, humawee tauna mangulika'a to norahi.
49 Habana Alatala to Nabaraka nobabei to nabohe hi aku. Nagahami hanga-Na.
50 Alatala nampotowe tauna to nengkoru hi Hia duuna hi muli-mulira.
51 Laibabei-Na to nepakahera hante baraka-Na
pade laipopogaa-Nara to nahombo.
52 Magau-magau laipopanau-Na lako poncunaara
pade to netowei laipemabohe-Na.
53 To naoro laipakabohu-Na hante pangkoni to nabelo,
naupawee to nahugi laitudu-Na rau hante pale ngkaloa.
54 Batua-Na Israel laitulungi-Na
habana nampalinga potipa-Na
55 hi tumpulokota Abraham pade mulina,
duu kahae-haena.”
56 Napu'i nampaune Alatala, tolu mulapi kahaena Maria no'oha dohe Elisabet pade nanculidi rau i ngatana.
Pangotea Yohanes to Pediu
57 Naratami wula poanaa Elisabet. Hia noana hadua ngana balailo. 58 Pangepera tongkina bo ompina ane Pue nampahiloi towe-Na hi hia, nagoe purara hingkani-ngkani hante hia. 59 Kawalu eona, narataramo i hou Zakharia mopatini ngana ee mai, pade mingkira mangkahangai ngana ee Zakharia, mantuku hanga tuamana. 60 Naupawee tina ngana ee nanguli, “Nemo, hia kana rakahangai Yohanes.”
61 Nangepe lauria, iulikara'i, “Moma komi naria no'ompi to nohanga ewa ee.”
62 Lauparia, laiporaokara'i tuama ngana ee nampekune'i rakahangai hema'i anana ee. 63 Zakharia namperapi watu tulihi pade laitulihina, “Hangana Yohanes.” Nahera purara. 64 Tempo ee mui namalami Zakharia nojarita, pade nopamulami nampaune Alatala.
65 Nampahilo lauria, humawee tongkira naeka, pade humawee to nadupa lauria laipotutura nahobo i ngata-ngata to i buluna i Yudea. 66 Humawee tauna to nangepe lauria nopairara bongo pade nanguli, “Mawali napa mei ngana ei?” Apa laihilora baraka Pue nampodohe'i.
Ulia peune Zakharia
67 Zakharia tuama Yohanes naponu hante Inoha to Nagaha pade laiparatana peboha Alatala, iulina,
68 “Laiunemi Pue Alatala Israel,
habana Hia nantako todea-Na pade nampatolohira.
69 Hia nampahadiakata to Pepakahalama to naroho
lako muli Magau Daud batua-Na,
70 ewa to laitipa-Na lako owi
hante ngudu nabi-nabi-Na to laipelihi-Na.
71 Notipa-'I mampabakahata lako bali-balita,
pade lako pale humawee tauna to nampodaata,
72 bona Napahiloi towe-Na hi tumpulokota,
pade potipa-Na to nagaha ee mai Napakadupami.
73 Eemi potipa to laisumpaka-Na hi tumpulokota Abraham,
74 bona matebakahata lako pale bali-balita,
pade mamalata mepue hi Hia hante moma maeka.
75 Hia notipa iwee, bona rara katuwuta i dunia ei mepueta hi Hia pade manoro ingkuta i tingoo-Na.
76 Bo iko anaku, iko mei rauli nabi Alatala to i Lolona,
habana iko mei mampoilodoka Pue mopahadia dala-Na.
77 Iko mei mampawaika noto hi todea-Na nangkambelai kahalamaa
hante poampunia dohara.
78 Habana ahi rara Alatalata to naponu towe nantakota
ewa eo newanta hi kita lako huruga
79 bona mampakabaa tauna to natuwu i rara kalimaua pade to nampokaeka kamatea,
bona mopanuntuta i rara katuwu to nanone.”
80 Ana Zakharia ee mai kaboo-boheami pade nantambai karoho petukuna hi Alatala, pade hia no'oha i tongo mpada to nabai duuna narata tempona laipamulana bagona noparata lolita Alatala hi to Israel.