Patudu bona matigu moparata lolita Alatala
4
1 Kuperapi mpuu hi iko i tingoo Alatala pade Kristus Yesus to marata nculi i dunia ei mampabotuhi tauna to natuwu bo to namate pade moparenta halaku Magau. Perapiaku iwei, 2 karebaimi lolita Alatala hi jumaa. Mabelo ba moma mabelo logamu, kana mahadiako. Pahiloi napa to nahala, kamarora, pakaroho wukura pade patudura hante kabohe pohabaramu. 3 Apa marata mei tempona, momaramo madota tauna mangepe patudu to nakono, wule mangkio ruru gururadamo mantuku dota rarara, bona guru eera mai mopatudura mantuku napa to naraha raepera. 4 Momaramo madota mangepe patudu to nakono. To rapodotara, mangepe tutura to moma naowo aga. 5 Naupawee, nau napa to madupa, pakanoto raramu. Mohabarahawo rara kahehaa, babeimi bagomu halaku to nampotolele Kareba Belo pade pobagomi humawee bago to laiparahayakako.6 Nangkambelai wotoku, para'amo mamate halaku kurban hi Alatala. Momami mahae kupalahimi dunia ei. 7 Laipahudu belokumi polombaa. Narata'amo i garihi kahuduana. Duu ei, natigu moto oa'a neparahaya hi Kristus. 8 Aji, i eo kahudua dunia nahadiami tomoku to Nawaika'a mei Pue, to Pobotuhi to nanoro. Moma wuwu aku, naupawee hante humawee tauna to nangkalentorai karata Pue.
Peboha kahuduana
9 Pehimukui bona mahomiko tumai, 10 apa laipalahina'amo Demas habana nampomaihi dunia ei pade raumi i Tesalonika. Kreskes rau i Galatia pade Titus rau i Dalmatia. 11 Wuwu Lukasdimi to naboli doheku. Potomuka'i Markus pade keni'i tumai dohemu apa laiparaluuku'i rara bagoku ei. 12 Laitudukumi Tikhikus rau i Efesus. 13 Ane tumaiko, keni waruku to laiboliku i Troas i hou Karpus pade humawee bukuku, koropokona buku to laibabei lako kuliba binata.
14 Aleksander to potampa tambaga etu mai, nadeami ingku daa to laibabeikana'a. Pue moto mei mampabalahi'i mantuku ingkuna ee. 15 Iko moto, kana maingako hi hia, apa laiewana mpuu patuduta.
16 Pamulana'a nantingohi pobotuhia, potolawaiku moto wotoku. Moma hema nampodohe'a, apa humawee tauna nampalahi'a. Kuperapi hi Alatala, bona nemo ingkura lauria rapohalara. 17 Naupawee, Pue nampodohe'a. Laiwaika-Na'a roho hampena namala'a nangkarebai humawee Kareba Belo ee, bona humawee tauna to moma Yahudi mangepe kareba lauria. Laipakahalama-Na mui'a lako kamatea. 18 Pue mei mampabakaha'a lako humawee ingku tauna to nadaa pade mampakahalama'a bo mangkeni'a rau poparentaa-Na i huruga. Hiami to rapemabohe duu kahae-haena. Amin.
Tabe kahuduana
19 Ulika tabeku hi Priskila bo Akwila pade hi Onesiforus humancoura.
20 Erastus no'oha i Korintus, pade Trofimus laipalahiku hamalina nadua i Miletus. 21 Mupehimukui tumai kapomana marata tempo lengi.
Tabe lako Ebulus, Pudes, Linus, Klaudia pade lako humawee ompita hangu kaparahayaa.
22 Mohambaya'a bona Pue mampodoheko. Kabohe towe-Na mampodohe komi.