Ingku manuhia i eo-eo lau kahudua dunia
3
1 Timotius, bona muncani, i eo-eo lau kahudua dunia, marata mei tempo to nakoro. 2 Manuhia mei mampomaihi wotona motodimi pade mampokono doi. Mokawonga pade mahombo, pokonora mampopore tauna, me'ewara hi totua, moma rancanira mobalahi ingku belo tauna, momara mampomaihi petukua, 3 moma maria towera, momara moampuni tauna, pokonorapi mopakudaa tauna, momara mamala mantanee dotara, maheke, moma pokonora to nabelo, 4 pokonora mepanawu, moma malanga pekirira, mahombo rarara pade pokonorapi kasanaa dunia lako mampotowe Alatala. 5 Laihilota natigura nepue, naupawee laihapuakara baraka pepuea ee to mamala mobaliki rarara. Nemora mupodohe tauna to ewa ee. 6 Apa nariara tauna to ewa ee mai, rau nehua hou doo nampatiwoo bangkele to nalente peparahayara, to nadea dohara pade to laipehuai nadea ngaa dota rara. 7 Bangkele eera mai mingki oara rapaguru, naupawee moma oa namala laincanira napa patudu to nakono. 8 Nahibali hante Yanes pade Yambresa nampaewa Musa, iwee moto muira tauna etu nampaewa patudu to nakono. Nageromi pekirira pade natetukumi peparahayara. 9 Natantu amimi momara mamala mopadola ingkura to nadaa, apa rahilomi mei kadoyora hi humawee tauna ewa to nadupa hi Yanes pade Yambres.Patudu bona matigu mantuku patudu to nakono
10 Naupawee iko Timotius, laitukumumi patuduku, dala katuwuaku, patuju katuwuaku, peparahayaku hi Yesus Kristus, pohabaraku, toweku hi hingka manuhia pade katiguku nobago i lentongo pehehakia. 11 Laihilomu'a laiduahi pade laipakaheha. Ncanimu pura napa to nadupa hi aku i Antiokhia, i Ikonium pade i Listra, bewa'a laiduahi. Naupawee Pue nampakahalama'a lako humaweena ee. 12 Butu tauna to natigu nepue halaku to pantuku Kristus Yesus, natantu amimi rapakaheha. 13 Bo tauna to nadaa ingkuna pade to pebagiu mantambai kadaa ingkura. Hira ee mepakahalatara pade hira mui rapakahalatara. 14 Naupawee, iko kana matuwu mantuku patudu to laitarimamu pade to mpuu-mpuu laiparahayamu, hante mampalingara tauna to nampaguruko. 15 Linga mui ane lako kakodiamu laincanimumi Buku to Nagaha to nampawaikako noto hampena lairatamu kahalamaa habana peparahayamu hi Kristus Yesus. 16 Humawee ihi Buku to Nagaha laitulihi hante baraka Alatala pade naria bununa mopatudu, mangkamaro ingku to nahala, mampakabeloki ingku pade mopatudu tauna bona matuwu mantuku dala katuwua to nanoro. 17 Hante Buku to Nagaha ee, tauna to nampobagoka Alatala rabokui hante magana mpuu bona mamala'i mampobago humawee bago to nabelo.