Mohabara rara kahehaa
2
1 Etumo Timotius anaku, pakaroho raramu hante petulungi to laiwaika-Nako Alatala habana kabohe towe-Na hi kita to nohangu rara hante Kristus Yesus. 2 Napa to laiepemu lako hi aku i tingoo nadea habi, parahayakami etu hi tau-tauna to mamala raparahaya pade nataualu mopatudu to ntanina. 3 Tukumi kahehaa ewa hadua tantara Kristus Yesus to nabelo. 4 Hadua tantara to hamalina nohiwali moma'i nampomaihi uruhia ntanina apa mingki'i mampakasana komandaana. 5 Hadua to nantuku polombaa moma ami'i mopabeta ane moma'i mantuku humawee kahintuwua i polombaa ee. 6 To popampa to mpuu-mpuu nobago, hiami to pamulana mahipato mantarima lengena. 7 Pairara belo to laiulikakuko, apa Pue moto to mampawaikako pampaha nangkambelai humawee lauria.8 Mulinga oa-'I Yesus Kristus, muli Magau Daud to laipakatuwu nculi lako kamatea. Etumile Kareba Belo to laikarebaiku. 9 Habana nangkarebai Kareba Belo eimile naheha'a, hampena laihilu'a hante rante ewa to nadaa ingkuna. Naupawee lolita Alatala moma'i namala rahilu. 10 Etu pade nohabara'a nantarima humawee ei apa nampekiri tauna to laipelihi Alatala, bona raratara kahalamaa to laipopewai Kristus Yesus pade matuwura dohe Alatala duu kahae-haena.
11 Nakono mpuu to iuli ei:
“Ane namateta hante Hia,
kita mei matuwu nculi dohe-Na.
12 Ane matiguta,
kita mui mei moparenta dohe-Na.
Ane tapehapuka-'I,
Hia mui mei mampehapukata.
13 Ane momata matigu,
Hia natigu moto oa-'I,
apa moma-'I mamala nampehapuka woto-Na moto.”
To pobago to nahipato i tingoo Alatala
14 Palingaira jumaa humawee patudu lauria pade boha mpuura i tingoo Alatala, bona nemora momehono nangkambelai batua baha-baha, apa etu moma naria bununa, wule mampakahilaka to nangepe. 15 Pehimukui mpuu bona Napangakuko Alatala halaku to pobago to nahipato i tingoo-Na. Pehimukui mawali batua to moma maea apa nabelo pobagomu, pade pakatopa mpuu popatudumu nangkambelai patudu Alatala to nakono. 16 Nemo muepe jarita to moma naria bununa to moma narata lako Alatala, apa jarita to ewa ee nampakadaaki ingku tauna. 17 Jarita ewa ee nengkanele ewa haki kanker. Hira Himeneus pade Filetus ee mui to nampotolele jarita ewa ee. 18 Hira ee nahalatararamo lako patudu to nakono. Laiulira naliumi tempona Alatala nampakatuwu nculi to mate. Hante jarita ee laipakagerora peparahaya habagia tauna to neparahaya. 19 Naupawee patudu to nakono lako Alatala ewa pondasi to moma namala ralengka. I lolo pondasi ee laitulihi, “Laincani-Na Pue todea-Na,” pade “Humawee tauna to nangaku nantuku Pue kana mobakaha ingku to nadaa.”
20 I rara hou to nabohe, nadea ngaa parewa. Naria to laibabei lako bulawa pade halaka, naria mui to laibabei lako kau pade tana pulu. Parewa to laibabei lako bulawa pade halaka laipake nampabila to rata. Naupawee parewa to laibabei lako kau pade tana pulu laipake butu eona. 21 Ane hadua tauna mampakagaha ingkuna lako humawee to nadaa, tauna ee rapake rara hangu hangaa to nelabi kabelona. Hia mawali gagu to laipatani pade naria bununa hi Alatala. Laipakahadia'i mampobago bago to nabelo.
22 Etumo, nemo mutuku ingku to nadaa to laipodotara to nangura. Pehimukui mantuku dota Alatala, meparahaya moto oa hi Kristus, potowe hingka manuhia pade matuwu mohingkabelo. Katuwumo ewa ee dohera to nerapi tulungi hi Pue hante rara to nagaha. 23 Nemo mu'umpui pomebili tauna to moma nengkao pade moma napa incanira. Laincanimu ane humaweena etu nampopeumba pobungka. 24 Hadua batua Pue moma mamala mobungka, naupawee kana madole hi humawee tauna. Kana mohabara'i pade mataualu'i mopaguru. 25 Moma'i makasara mopagurura tauna to ne'ewa. Baka Alatala mei mampawaika tauna ee loga bona mancorora lako dohara hampena rancanira patudu to nakono. 26 Ane wee, manoto nculimi rarara pade matebakaha lako baraka Magau Heta to nampapoura pade nopahurura nantuku dotana.