Hura Paulus Karongkanina rau hi Timotius
Tabe
1
1 Lako Paulus, to laipelihi Alatala nawali rasul Kristus Yesus bona mangkarebai katuwua to laitipa Alatala hi tauna nohangu rarata hante Kristus Yesus. 2 Hura ei laipakatuku hi iko Timotius to laipotoweku to laipowaliku anaku. Mohambaya'a bona kabohe towe, ahi rara pade katuwu to nanone lako Alatala Tuama pade Kristus Yesus Pueta mampodoheko.Posukuru pade patudu bona matigu
3 Timotius, habana iko mosukuru'a hi Alatala to laipobagokaku hante kagaha raraku ewa to laibabeira tumpulokoku. Lailingaku moto oako rara hambayaku hi Alatala, eona bo bengina. 4 Ane kulinga ue matamu to natudo, mingki'a mampotomukako bona masana raraku. 5 Apa lailingaku kabuloli peparahayamu, ewa kabuloli peparahaya Lois tumpumu bangkele pade Eunike tinamu. Laiparahayaku mpuu ane peparahayamu nahibali hante hira.
6 Etumi pade kupalingaiko bona mupake mpuu pade mutambai dola pampakulea to laiwaika-Nako Alatala tempoku nodama tanuanamu. 7 Apa Inoha to laiwaika-Nata moma inoha to mampakaekata naupawee Inoha to mampakarohota, mampakadea toweta pade mampatanee dotata.
8 Etumo, nemoko maea mampotutura nangkambelai Pueta, pade nemo muiko maea habana aku ei to laitarungku apa nampobagoka-'I. Rara roho to laiwaka-Nako Alatala, tuku'amo rara kahehaa mangkarebai Kareba Belo. 9 Hiami to nampakahalamata pade nangkiota mawali todea-Na to mpuu-mpuu mepue hi Hia. Laipakahalama-Nata pade laikio-Nata moma habana nabelo ingkuta, naupawee habana dota-Na pade kabohe towe-Na moto. Laiwaika-Nata towe-Na to nabohe ee kapomana dunia ei laipajadi, habana laipahanguta hante Kristus Yesus. 10 Tempo ei, laipoperawa-Na kabohe towe-Na hi kita hante karata Kristus Yesus to Pepakahalamata. Hante Kareba Belo, Yesus nampadagi baraka kamatea pade nangkeni katuwua to moma maria kahuduana.
11 Laiongko-Na'a Alatala nawali rasul pade guru bona mangkarebai Kareba Belo ee. 12 Habana humawee lauria hampena naheha ewa ei'a. Naupawee moma'a naea. Apa laincaniku mpuu hi hema'a neparahaya. Laincaniku mui, mamala-'I nampajagai napa to laiparahayaka-Na'a duu kahudua dunia.
13 Tuku mpuu humawee patudu belo to laiwaikakuko. Pakaroho peparahayamu pade potowe hingka manuhiamu habana nohangu rarako hante Kristus Yesus. 14 Piara belo patudu to laiparahayaka-Nako hante petulungia Inoha to Nagaha to natida i rarata.
15 Laincanimu ane ke nono humawee to Karahitee i propinsi Asia nampalahi'a ewa Figelus pade Hermogenes mui nampalahi'a.
16 Mohambaya'a bona Pue moto mampawaikara Onesiforus hancou ahi rara-Na, apa nadea ngkanimi nampakasana raraku pade moma'i naea nampotomuka'a i rara tarungku. 17 Karatana i Roma, laipehimukuina mpuu nampali'a duuna laipotomukana'a. 18 Pade laincanimu ane nadea ngkani'i nantulungi'a i Efesus. Mohambaya'a bona Pue moto mampawaika'i ahi rara-Na ane maratapi kahudua dunia.