2 Timotius i

Hura Paulus Karongkanina rau hi Timotius

Popailodoa

Hura ei laitulihi Paulus tempona rara tarungku i Roma (1:8, 16-18; 2:9). Laincanina ane momami mahae rahuku mate. Etu pade laitulihina hura ei pade laipakatuna hi Timotius. Timotius ee hadua tauna to nahaemi nawali bale himputuna rara pobagoana. Hia mui penatua to Kristen i ngata Efesus.

Hura ei peboha Paulus hi Timotius. Laipetuduina Timotius bona marata mampelongi'i (4:9, 21), habana nalentora'i hi Timotius (1:3-5). Laipakarohona rara Timotius bona mampobago bago Alatala hante rarana mpuu (1:6-7). Laiulikana Timotius bona mopatudu hante patudu to nakono (1:13; 2:2; 3:14) pade natagira tauna to nopatudu hante patudu to moma nakono (2:14, 16-18). Pade laipakarohona rara Timotius bona nemo'i malente mampotolele Kareba Belo pade mampobago bago Pue (4:1-2).

I rara hura ei, Paulus nanguli ane naria tauna to nangkeni patudu to moma nakono. Iwei patudura, “Naliumi tempona Alatala nampakatuwu nculi to mate” (2:17-18). Batuana, napumi Alatala nampakatuwu nculita to nepaharahaya hi Kristus, pade ane mamateta mei, momatamo Napakatuwu nculi i dunia to nabou. Paulus nanguli, patudura ee moma nakono, habana eo ngkapurina mei Alatala mampakatuwu nculi humawee tauna to namate. (Hilo mui 1Kor. 15:12, 19-23; 1Tes. 4:16-17.)

Ihi buku ei

1. Tabe pamulana (1:1-2)

2. Paulus nampakaroho rara Timotius bona mampobago bago Pue hante kabelo-belona (1:3–4:8)

3. Paulus nampetudui bona mahomi'i Timotius marata mampelongi'i (4:9-15)

4. Naupa Paulus laitarungku pade kana rapatehi, naroho moto peparahayana hi Alatala (4:16-18)

6. Tabe kahuduana (4:19-22)