Tuwu to nampakagoe rara Alatala
4
1 Kahuduana ompi-ompi, laiperapi kami bo laipatudu kami amimo komi bewa komi matuwu mampakagoe rara Alatala. Nakono laituruhimimi humaweena, naupawee halaku batua Pue Yesus kiperapi bona mipehimukuipi matuwu mampakagoe rara Alatala. 2 Apa laincanimimi humawee patudu to laiparata kami hi komi ewa to laipatudu Pue Yesus.3 Eimi to laipodota Alatala: bona matuwu magaha komi, pade nemo mogau hala. 4 Butu balailo kana mincani bewa moingku to nabelo hi bangkelemi hante ingku to mahipato i tingoo Alatala pade hingka manuhia. 5 Nemo komi mantuku dota rarami mampogau bangkele ewa to ibabeira tauna to moma nangincani Alatala. 6 Nangkambelai ingku ee mai, nemo maria tauna mobabei to nahala ba mampakadoyo ompina to hangu kaparahayaa. Apa humawee tauna to mobabei hala Nahuku Pue. Humawee lauria iulika kami amimo komi. 7 Alatala nampokiota, bona matuwu magahata. Momata laikio-Na bona mobabei to nadaa rara katuwuta. 8 Hema to moma nantarima patudu nangkambelai ingku to ewa ee, moma'i namporau manuhia, naupawee namporau Alatala to nampawaika komi Inoha-Na to Nagaha.
9 Momamo komi kitulihika bewa momepotowe mo'ompi, apa laipatudu-Namo komi Alatala nangkambelai pomepotowe no'ompi. 10 Nangkambelai humawee lauria laipoingkukamimi hi humawee ompi hangu kaparahayaa i Makedonia. Naupawee kiperapi hi komi pura bona mitambaikipi pomepotowemi no'ompi. 11 Nemo mampali pobungka rara katuwua pade nemo moumpui uruhia doo. Pobagomo komi mampali kaparaluami moto, ewa to iulika kami amimo komi. 12 Ane iwee ingkumi, momamo komi mampaharumaka doo mampawaika komi kaparaluami, pade mahipato komi rabilara tauna to poma neparahaya hi Yesus.
Karata Pue
13 Dota kami ompi-ompi, mincani mpuu bewara to namate, bona nemo majuu gaga rarami ewa tau ntanina to moma naria harumakaara. 14 Apa ane laiparahayata Yesus ee mai namate pade natuwu nculi, laiparahayata mui ane Alatala mei mampakatuwu nculira tauna to namate to neparahaya hi Yesus, bona matuwura dohe Yesus. 15 Nangkambelai humawee lauria, eimi patudu Pue to mingki kiparata hi komi: Kita to natuwutadapa tempo karata Pue, momata mampelodoira to namateramo ilodo. 16 Habana, malaeka Alatala mei mongare pade tarompe Alatala rapopomoni halaku pepaingai. Tempo ee Pue moto mehompo lako huruga, pade tauna to neparahaya hi Kristus to namateramo, hirami to pamulana ntoto rapakatuwu nculi lako kamateara. 17 Napu ee kita to natuwutadapa tempo ee mai raongko hingkani-ngkani hante hira rara gawu mampotomuka Pue i roelawa, pade mo'oha hante Pue duu kahae-haena. 18 Etumo, pomepakaroho rarami hante patudu nangkambelai katuwua nculi ei mai.