Kareba to nampakagoe rara to laiparata Timotius
3
1 Momami laibuku kami nantaha lentora kami hi komi. Etu pade ipekiri kami agina kamidimi i Atena, 2 pade Timotius ompita kitudu tulau hi komi. Hia ee mai to nampodohe kami nampobago bago Alatala nampotolele Kareba Belo nangkambelai Kristus. Laitudu kami'i tulau mampakaroho rarami pade mopatudu komi nangkambelai peparahayami, 3 bona nemo maria to malente peparahayana habana kahehaa-kahehaa ei. Ncanimi motomi ane humawee lauria dota Alatala rara katuwuata. 4 Tempota nodohedapa, iuli kami amimi ane mamparata kahehaata. Ewa to incanimi, humawee lauria nadupa mpuumi. 5 Etu pade laituduku Timotius, apa momami laitahaku mingki kuncani bewa karoho peparahayami hi Kristus. Habana namere raraku, nemo-nemo laipehori Magau Hetamo komi, alaana humawee bago kami momami naria bununa.6 Naupawee tempo ei nanculimi Timotius, laiparatana kareba to nampakagoe rara nangkambelai peparahayami hi Kristus pade bewa komi natuwu nonepotowe. Iulina mui bewa kagoemi nampalinga humawee to nabelo nangkambelai kami, pade kalentorami mingki mampotomu kami ewa kalentora kami hi komi. 7 Etumo ompi-ompi, naupa naheha rara kami bo napepa iepe kami, hangka laiepe kami kareba to laiparata Timotius ee mai, nagoe rara kami apa naroho moto peparahayami. 8 Mpuu-mpuu lairasai kami nobunu katuwu kami, ane batena moto komi matigu meparahaya hi Pue. 9 Nosukuru mpuu kami hi Alatala habana humawee goe rara to irata kami i tingoo-Na habana komi. 10 Butu eona bo bengina kami hante mpuu-mpuuna nerapi hi Pue bona mamala kami mampotomuka komi, bona mopaganai napa to iparaluumi mampakaroho peparahayami hi Kristus.
11 Kiperapi hi Alatala, Tuamata, pade hi Pue Yesus bona Nabeaka kami dala mampotomuka komi. 12 Kiperapi bona Pue motambai pomepotowemi hadua bo hadua pade towemi hi humawee tauna, ewa kami nampotowe komi. 13 Kiperapi mui bona Hia mampakaroho rarami, bona moma komi makahalaia pade magaha moto komi i tingoo Alatala Tuamata tempo karata Yesus Pueta hante humawee todea-Na to nagahaa.