Bago Paulus i Tesalonika
2
1 Ompi-ompi, laincanimi moto ane moma kami tulau mara hi komi. 2 Laincanimi ane kapoma kami tulau hi komi, laikadungkui bo laipopore kami i Filipi. Naupawee, Alatala nantulungi kami hampena nabia moto kami noparata Kareba Belo lako Alatala hi komi, naupa nadea tauna to nampaewa kami. 3 Patudu to iuli kami moma patudu kalowo hante patuju to moma nanoro bo to mepakadoyo. 4 Moma kami nojarita bona mampakagoe rara manuhia, aga mampakagoe rara Alatala to nopareha rarata. Apa laihilo Alatala mahipato kami mampotolele Kareba Belo. 5 Laincanimi moto ane moma kami naria nojarita namomi ba nampopalerui patuju to nampali kauntunga. Alatala habina. 6 Moma mui kami nampali bona raune manuhia, belo lako hi komi ba tau ntanina, naupa kakonona mamala moto mui kami iwee, apa rasul Kristus kami. 7 Naupawee, tempo kami i ritu, nadole moto kami ipodohemi ewa hadua to tina nampodoo anana, 8 habana natowe mpuu kami hi komi. Moma wuwu Kareba Belo lako Alatala laiwaika kami hi komi, naupawee tuwu kami muipi, apa laipotowe kami mpuu komi. 9 Ompi-ompi, lailingami moto bewa kami nampehimukui nobago hante kalenge kami. Eona bo bengina kami nobago bona nemo kami mampakaheha nau hadua lako hi komi, tempo kami noparata Kareba Belo lako Alatala hi komi.10 Komimi habi kami, wee mui Alatala, ane katuwua kami nagaha, nanoro pade moma nakahalaia hi komi to namparahaya Kristus. 11 Laincanimi ane poingku kami hi komi, ewa poingku hadua to tuama hi ana-anana. 12 Kami nopatudu komi, nampakaroho rarami hadua bo hadua, pade laiperapi kami mpuu hi komi, bona matuwu komi mantuku dota Alatala to nangkio komi mawali todea i rara poparentaa-Na pade mamparasai laipemabohe hingkani-ngkani hante Alatala.
13 Etumi habana pade nosukuru oa kami hi Alatala, apa laitarima belomi lolita Alatala to laiparata kami hi komi, moma laitarimami ewa kareba lako manuhia, naupawee mpuu-mpuu laitarimami halaku kareba lako Alatala. Lolita Alatala eemi to nobago i rarami to namparahaya Kristus. 14 Ompi-ompi, laikolomimi kahehaa to nahibali hante jumaa Alatala i Yudea to namparahaya Kristus Yesus. Komi laipodaara ompi-ompi to hangatami moto, ewa hira to i Yudea laipodaa ompi-ompira to Yahudi. 15 To Yahudi ee muiramo to nampatehi Pue Yesus bo nabi-nabi owi pade nampaduahi kami. Hira ee mai momara laipokagoe Alatala, pade humawee tauna laipodaara. 16 Laipehimukuira nampalawa kami bona nemo kikarebai hi tau ntanina to moma Yahudi Kareba Belo lako Alatala to mampakahalamara. Weeramo to Yahudi ee notambai dola dohara duuna nagana. Etu pade nahodomi Alatala hi hira.
Paulus mingki rauki i Tesalonika
17 Ompi-ompi, hinungkai kami nategaa hante komi, nalentora mpuu kami hi komi pade pehimukui kami bona mamala kami marataki hi komi. Naupa nohingka'awata, nohingkamohu moto rarata. 18 Noliwomo kami tulau mantako komi. Aku Paulus, bahangkua ngkanimi pehobaku, naupawee Magau Heta nampalawa kami. 19 Mingki mpuu'a mantako komi, habana komimi harumakaa kami pade to mampakabohe rara kami bo mampakagoe kami ane maratapi Pue Yesus. 20 Batena komimi to ipobohe rara kami bo kagoea kami.