Hura Paulus to Pamulana rau hi Jumaa i Tesalonika
Tabe
1
1 Lako Paulus, Silwanus pade Timotius. Hura ei laipakatu kami hi komi jumaa i Tesalonika to nawali todea Alatala Tuama bo Pue Yesus Kristus. Mohambaya kami bona kabohe towe pade katuwu to nanone lako Alatala mampodohe komi.Ingku pade peparahaya to Tesalonika hi Yesus Kristus
2 Ompi-ompi humawee, nosukuru oa kami hi Alatala habana komi. Butu ngkanina kami nohambaya lailinga kami moto oa nampahambayani komi. 3 Rara hambaya kami hi Alatala Tuamata lailinga kami bewa ingkumi to nampahiloi peparahayami hi Kristus, bewa komi nampotowe tau ntanina, pade bewa karoho peharumakami hi Pueta Yesus Kristus. 4 Ompi-ompi, laincani kami ane Alatala nampotowe pade nampelihi komi nawali jumaa-Na. 5 Apa Kareba Belo to laiparata kami hi komi, moma laiparata kami hante jarita mara, naupawee hante baraka Inoha to Nagaha. Pade laiparahaya kami mpuu ane Kareba Belo ee mai nakono. Laincanimimi bewa kami nobago nampomaihi komi. 6 Ingkumi nantuku ingku kami bo ingku Pue. Naupa napepa iepemi, laitarimami hante goe rarami moto Kareba Belo to laiparata kami hi komi. Kagoemi etu mai bago Inoha to Nagaha. 7 Ingkumi laitukurami humawee to neparahaya i Makedonia pade i Akhaya. 8 Apa lako hi komimi tauna to i Makedonia bo Akhaya nangepe kareba nangkambelai Pue. Moma wuwu ee, kareba nangkambelai peparahayami hi Alatala notolelemi i rima-rima. Aji, momami napa to kiuli nangkambelai peparahayami. 9 Habana hira motomi to notutura hi kami, bewa ingkumi nantarima karata kami hi komi. Laituturara bewa komi nampalahira pue ntanimi pade negoli nepue hi Alatala to natuwu bo nakono. 10 Laituturara mui kabohe peharumakami hi karata Yesus lako huruga, Ana Alatala to laipakatuwu nculi-Na lako kamatea-Na. Hiami to mampakahalamata lako hodo Alatala to marata mei.