Kolose i

Hura Paulus rau hi Jumaa i Kolose

Popailodoa

Kolose ee mai hangu ngata i Frigia rara propinsi Asia to ilodo laiparenta Magau Bohe Roma. Ngata Kolose ee mai moma'i nabohe gaga ane rapahibali hante ngata Korintus bo ngata Efesus. Tempo Paulus notulihi hura ei, Kolose ee laikatidaira to Frigia, to Yunani pade to Yahudi. Tempo ei Kolose ee mai nehua rara negara Turkimi, naupawee momami laikatidai tauna.

Rara buku Kisah Para Rasul naria laitulihi ane i Paulus nobago nampotolele Kareba Belo i ngata Efesus rompae labi kahaena (Kis. 19:1-10). Tempo ee mai naria hadua to neparahaya hi Yesus, hangana Epafras, rau nampotolele Kareba Belo hi dohe-dohena i ngata Kolose hampena naria muira to Kolose to neparahaya hi Pue Yesus (Kol. 1:7). Bahangkua mpae lako hee, bulana Paulus laitarungku habana nampotolele Kareba Belo, laitulihina hura ei pade laipakatuna rau hi jumaa i Kolose, apa laiepena naria tauna to nangkeni mui patudu to nahala i Kolose.

Koro ihi hura ei nangkambelai patudu ane Yesus Kristus aga to mamala mampakahalamata, bo patudu ntanina wule mampaka'awata lako Kristus. Hante nampake Kristus, Alatala nopajadi dunia ei pade hante nampake Kristus mui Alatala nampakahalama dunia ei. Ane mohangu rarata hante Kristus maria harumakaata rapakahalama.

Rara hura ei mui, Paulus nampaingaira to Kolose nangkambelai tauna to nangkeni patudu to nahala. Ihi patudura iwei: Ane mingki rapakahalama, moma'i nagana ane wuwu meparahaya hi Yesus, kana mepue muira hi baraka langi bo dunia, rapana ewa meparahaya hi malaeka pade kana ratini mantuku ada petukua to Yahudi pade kana ratukura mui humawee to laipopalia. Paulus nampalingaira tauna to i Kolose bona nemo ratukura patudu to nahala ee. Laiulikanara, ane neparahayaradamo hi Yesus, naganami. Apa Yesus aga to mamala mampakahalama manuhia.

Paulus mui nopatudu pade nampakanoto bewa ingku to mahipato halaku tauna to neparahaya hi Pue Yesus (3:1–4:6).

Ihi buku ei

1. Tabe pade hambaya Paulus (1:1-14)

2. Kristus koropokona lako hangu hangaa (1:15-23)

3. Bago Paulus nampotolele Kareba Belo (1:24–2:5)

4. Kana matuwu mohangu rara hante Kristus (2:6-15)

5. Nemo mantuku patudu to moma nakono (2:16-23)

6. Kana rabakaha ingku to nadaa pade moingku to nabelo halaku manuhia to nabou (3:1-17)

7. Patudu hi to pohancou (3:18–4:1)

8. Pohabi hi hira to poma neparahaya hi Yesus (4:2-6)

9. Peboha pade tabe kahuduana (4:7-18)