2
1 To laipodotaku, bona mincani bewa'a nampehimukui nampobagoka komi pade hira to Laodikia pade humawee tauna, naupa poma'a naria laihilora. 2 Humawee ei mai laibabeiku bona maroho rarara, mahintuwu pade momepotowe. Bona mengkao mpuura pade rancanira napa to ilodo laipopalerui Alatala. To laipopalerui Alatala ee mai, Kristus. 3 Apa Kristus eemi to nampakarawa humawee gagu to laipopalerui Alatala lako ilodo. Gagu to laipopalerui ee mai, noto bo kataualu Alatala. 4 Laikewokaku komi lauria, bona nemo maria tauna to mampatiwoo komi hante kamomi pojaritara. 5 Apa nau na'awa'a lako hi komi, raraku ritu moto dohemi. Nagoe'a nangepe kareba ane nohangu rara bo natigu komi neparahaya hi Kristus.Katuwua to nabou hante Kristus
6 Habana laitarimamimi Kristus Yesus nawali Puemi, kana matuwu komi mohangu rara hante Hia. 7 Kana matuwu komi ewa kau to nandala polarina i rara Kristus pade ewa hou to naroho pokangkorena habana Kristus nawali pondasina. Kana mitambai karoho peparahayami hi Kristus ewa to laipatuduka komi, pade rarami maponu hante posukuru hi Pue. 8 Maingahawo bona nemo maria tauna to mampatiwoo komi hante kamomi pojaritana nantuku patudu manuhia pade dota anudaa dunia ei, moma nantuku patudu bo dota Kristus. 9 Habana humawee ingku bo baraka Alatala, naria i rara woto Kristus. 10 Wee moto mui hi komi, momami naria to nakura rara katuwumi habana natuwu nohangu rara hante Kristus komi. Apa nalangkopi poncunaa Kristus lako humawee to nabaraka pade to noparenta i huruga bo dunia. 11 Katuwumi nohangu rara hante Kristus, batuana laitinimo komi hante popatini Kristus, moma popatini to laibabei manuhia. Popatini Kristus ee mai nampabakaha komi lako baraka ingku daa to nampakadoha komi. 12 Habana, tempomi laidiu, etu nahibali hante laitanamo komi dohe Kristus, pade hante podiu ee mui laipakatuwu nculimo komi lako kamatea dohe Kristus apa laiparahayami baraka Alatala to nampakatuwu nculi Kristus lako kamatea-Na. 13 Ilodo, kapomami neparahaya hi Kristus, ewa to namatemo komi habana nadoha komi pade moma komi laitini nantuku atura agama to Yahudi. Naupawee tempo ei Alatala nampawaika komi katuwu to nabou hante Kristus. Laiampuni-Nami Alatala humawee dohata, 14 pade laipakaputa-Nami hura indata potulihia humawee doha to laibabeita nampaewa dota Alatala. Hura ee mai laipaku-Na i kau salibmi bona momatamo rapangaduka. 15 Hante salib ee mai Kristus nampadagi humawee anudaa to nabaraka bo noparenta pade lailali-Na barakara, bona humawee tauna mampahilo ane laidagi-Na puraramo.
Nemo mantuku patudu-patudu dunia ei
16 Etumo, nemo mipalele tauna mampahalai komi nangkambelai atura-atura agama ewa: Pangkoni bo panginu, eo bohe agama, wula bou ba eo Pentuua. 17 Humawee lauria wule nampagambara napa to laipopeata kana marata i eo ngkapurina. To laipopeata ee mai Kristus. 18 Aji, ane maria tauna mampahalai komi habana moma laitukumi popatuduna, wetumi mipairara jaritana bona nemo komi mahalatara pade momami mitarima napa to laitipa Alatala hi komi. Kakonona tauna etu mingki mampatiwoo komi, bona mituku ingkuna to ntumoni netikodi pade nepue hi malaeka-malaeka Alatala. Tauna ee mai nampolinga pehiloa-pehiloa to iratana. Nahombo'i habana pampekirina to wuwu nampomaihi dunia. 19 Tauna ee mai momami nentoe hi Kristus halaku woo jumaa. Bo Kristus ee mai to nopahangu pade nopou humawee bagia woto hante ua bo poumpua wuku hampena woto ee mai natuwu nantuku dota Alatala.
20 Kakonona namate hante Kristusmo komi pade laibakahamo komi lako baraka-baraka dunia ei. Naupawee katuwumi nahibali moto hante manuhia i dunia ei apa laituruhimi oadipi patudu-patudu ewa ei, 21 “Nemo mikakamu ei, nemo mipetami etu, nemo mitui ei.” 22 Humawee patudu lauria moma naria bununa. Apa patudu lauria nahibali hante parewa to hangkani rapake aga, mageromi. Habana humawee lauria nantuku parenta bo patudu to laibabei manuhia aga. 23 Patudu-patudu lauria hiloana aga nabelo, apa nantuduta maraji mepue mantuku atura-atura agama to laibabei manuhia, metikodi pade mopakaheha woto. Kakonona, humawee lauria moma naria bununa, apa moma namala nantulungita nampaewa dota rara to nadaa.