Hura Paulus to Pamulana rau hi Jumaa i Tesalonika
Popailodoa
Ngata Tesalonika owi, tina ngata propinsi Makedonia. Tempo ei nehua rara negara Turkimi. Todeana tempo ee maria roatu ncobu dua. Habagia todeana to moma Yahudi to namparahaya pue-pue to moma nakono, pade habagia mui todeana to Yahudi. Paulus, Timotius pade Silas nangkeni Kareba Belo hi hira to Tesalonika, hampena bahangkua dua lako hi hira namparahaya Yesus (Kis. 17:1-4). Poma nahae lako ee, Paulus pade dohe-dohena netibo lako Tesalonika, apa nariara tauna to moma neparahaya nobabei kagadoa pade nampalira bona rakadungkuira (Kis. 17:5-10). Bahangkua kahaena lako ee, Paulus nangkalentoraira ompi-ompina to neparahaya i Tesalonika pade mingki'i mampahilora. Naupawee poma naria logana mampotomukara. Etu pade Paulus nantudu Timotius rau mampotomukara bona nahilo naroho ba moma peparahayara (1Tes. 3:1-2). Panculina Timotius lako Tesalonika, Paulus notulihi hura ei.
Patuju Paulus notulihi hura ei nadea ngaa. Laipalingainara to Tesalonika bewa ingkuna tempona laipodoheradipi (2:1-12). Laipakasana pade laipakarohona rarara to laikadungkui habana peparahayara (2:13–3:13). Laipatudunara ingku to nahipato rababeira to neparahaya (4:1-10). Laiulikakanara bona nemo malohe rara pobagoara butu eona (4:11-12). Laiulikanara napa mei to madupa hi hira to neparahaya to namateramo pade hi to neparahaya to natuwuradapa tempo karata nculi Pue Yesus (4:13-17). Nangkambelai karata nculi Pue Yesus, laiuli i humawee pasal rara hura ei (1:9-10; 2:19-20; 3:14; 4:13-17; 5:1-2, 23-24).
Ihi buku ei
1. Tabe pamulana (1:1)
2. Paulus pade jumaa i Tesalonika (1:2–3:13)
3. Paulus nopatudura bona moingku mabelo ewa to laipodota Pue Yesus (4:1-12)
4. Paulus nangulikara napa mei to madupa tempo karata nculi Pue Yesus (4:13–5:11)
5. Paulus nopatudura bona matuwu mohingkabelo hante ompi-ompi to neparahaya (5:12-22)
6. Tabe kahuduana (5:23-28)