4
1 Komi maradika-maradika, waikara batuami napa to mahipato ratarimara pade manorohawo hi hira. Apa laincanimi motomi, naria Maradikami i huruga.Pohabi hi hira to poma neparahaya
2 Nemo mikaohai mohambaya, mainga moto oahawo, pade mosukuru dola komi hi Alatala. 3 Hambayani mui kami, bona Nabeaka moto kami Alatala dala mangkarebai Kareba nangkambelai Kristus to ilodo laipopalerui-Na hi manuhia. Habana nampotolele kareba eemile hampena laitarungku'a. 4 Hambayani'a bona mamala'a mopandola Kareba ee mai, ewa bewa kahipatona.
5 Tempomi laipodohera tauna to poma neparahaya, katuwumo komi halaku tauna to nadea timbana. Pakemi humawee logami mobabei ingku to nabelo hi hira. 6 Ane mojarita komi, pojarita komi hante towe, nemo matawoo, bona mincani bewa komi mampahonoi pepekuneara nangkambelai peparahayami.
Peboha bo tabe kahuduana
7 Humawee to nangkambelai aku, nakewo Tikhikusdimi hi komi. Tikhikus ei mai ompi to laipotoweta, batua Pue to natigu, to laipodohe kami nampobagoka Pue. 8 Patujuku nantudu'i tulau hi komi, bona mincani bewa kareba kami pade napakaroho rarami. 9 Laituduku'i Tikhikus tulau hingkani-ngkani hante Onesimus, ompita to natigu pade laipotoweta. Onesimus ei hadua jumaa lako ritu. Hiradimi to mangkewoka komi humawee to nadupa i hei. 10 Aristarkhus to laitarungku doheku nopakatu tabena hi komi. Markus harara hangkani Barnabas mui nopakatu tabena hi komi. Nangkambelai Markus ei, laitarimamimi pebohaku, bona ane tulau'i hi komi, mitarima belo'i. 11 Yesus to ikahangai Yustus mui nopakatu tabena hi komi. Lako humaweera to Yahudi to neparahaya hi Yesus, tolu duara ei aga to laipodoheku nobago nangkeni todea i rara poparentaa Alatala. Hira ei mai mpuu-mpuu nampakaroho raraku. 12 Tabe lako Epafras batua Kristus Yesus hi komi. Hia ei hadua jumaa lako ritu. Laipehimukuina mpuu nohambayani komi bona maroho peparahayami hi Kristus Yesus pade mpuu-mpuu komi mangincani bo manturuhi dota Alatala. 13 Laihilo mataku motomi bewa'i nobago ntomo nampomaihi komi pade tau-tauna to i Laodikia pade to i Hierapolis. 14 Dokutoro Lukas to laipotoweta pade Demas mui nopakatu tabera hi komi. 15 Ulika muira ompi-ompita to i Laodikia tabe lako hi kami. Wee mui hi Nimfa pade jumaa to nepue oa i houna. 16 Ane mahudupi hura ei rabahaka komi, kana rabaha mui hi jumaa i Laodikia. Wee moto mui komi, kana mibaha hura to laipakatuku hi jumaa i Laodikia. 17 Pade ulika'i Arkhipus, iwei, “Pobago belo bago to laiwaika-Nako Pue duu kahuduna.” 18 Tabe lako hi aku, Paulus. Tabe ei laitulihiku hante paleku moto. Linga moto'akuwo to bulaku laitarungku. Kabohe towe Alatala mampodohe komi.