Manuhia Bou
3
1 Ompi-ompi, laipakatuwu nculimo komi dohe Kristus. Etumo, pehimukuimi mampali napa to naria i huruga, i poparentaa Kristus to noncuna mali pangkana Alatala. 2 Pekirimi napa to naria i huruga, nemo mipekiri napa to naria i dunia ei. 3 Apa kakonona ewa to namatemo komi pade tempo ei natuwumo komi hingkani-ngkani hante Kristus i tingoo Alatala. Katuwumi ee mai, poma'i namala laihilo. 4 Naupawee ane maratapi tempona Kristus to nawali puu katuwuata Napakarawa Alatala, komi to neparahaya mui mei rapakarawa hingkani-ngkani hante Hia rara baa baraka-Na.5 Etumo, kana mipatehi humawee dota rarami to nadaa, ewa dota rara mogau hala, katuwu to narumu, dota rara mogau hante to moma balailona ba bangkelena moto, dota rara to nadaa pade hipa to naliu ganta to nahibali hante nepue ntani. 6 Apa dota rara-dota rara to ewa eemi to nampopeumba hodo Alatala [hi hira tauna to ne'ewa]. 7 Ilodo laituruhimi dota rara-dota rara to nadaa ee, tempomi laipobatua dota rara-dota rara ee mai. 8 Naupawee tempo ei, tadimi humaweena lauria. Nemopa magigi rara, nemopa mahodo, nemopa madaa ingku, nemopa mepakudaa pade nemopa metarahu. 9 Nemopa komi momekalowoni, habana lailoncumimi tuwu to nahae hante ingkuna, 10 pade laitarimamimi katuwu to nabou. Komi etu mai manuhia to nabou to laipakabou-Na dola katuwumi bona mincani mpuu Alatala to nopajadi komi pade ingkumi mahibali hante ingku-Na moto. 11 Apa nawali manuhia to naboutamo, momami naria pontaniana to Yunani pade to Yahudi, to laitini pade to moma laitini, tauna to natolare pade to moma naria adara, batua pade to moma laipobatua, apa koropokona lako humawee lauria Kristus. Hiami to natuwu i rarata pura to neparahaya.
12 Etumo, halaku tau-tauna to laipelihi Alatala, to laipakagaha bo laipotowe-Na, kana ma'ahi rarami hi doo, mabelo rara, madole, mohabara pade nemo mahombo. 13 Kana hore mohabara komi pade momeampuni ane maria komi to mahodo. Apa laiampuni-Nami Pue dohami, wee moto mui komi, kana miampuni tauna to nahala hi komi. 14 Pelabina lako ee, kana momepotowe komi, apa towe ee namala mopahangu komi bona mpuu-mpuu komi mahintuwu.
15 Palelemi kanonea lako Kristus mobago i rarami, bona mohingkabelo moto oa komi hadua bo hadua, apa eemi patujuna hampe laikio komi mawali bagia lako hangu woto. Pade batena mosukuru moto oa komi. 16 Mipairara mpuu patudu-patudu Kristus hampena mpuu-mpuu mobunu i rara katuwumi, bona mamala komi momepatudu bo momepalingai hante humawee noto rarami. Pouliami mazmur bo ulia peune hi Alatala, hante rara to nosukuru. 17 Humawee to mibabei bo miuli, kana mibabei bo miuli ewa to mahipato nababei to pantuku Pue Yesus, hante rara to nosukuru hi Alatala, Tuamata, habana humawee to laibabei Yesus hi komi.
Patudu matuwu mohancou
18 Komi totua bangkele, matunduhawo hi balailomi, ewa to mahipato nababei bangkele to neparahaya hi Pue.
19 Komi totua balailo, potowe bangkelemi. Nemora mikasarani.
20 Komi ngana, turuhira totuami rara hangu hangaa, apa iweemi ingku to laipokono Pue.
21 Komi to tuama, nemo mipakadua rara anami, bona nemo malente rarara.
22 Komi batua-batua, turuhira maradikami i dunia ei rara hangu hangaa, nemo wuwu i tingoora moto bona magoe rarara, naupawee turuhira hante rarami mpuu habana nengkoru komi hi Pue. 23 Humawee to mibabei, babeimi hante rarami mpuu, ewa laibabeikami hi Pue, moma laibabeikami hi manuhia. 24 Apa laincanimimi ane mitarima mei tomo lako Pue to laipahadia-Na amimi. Kristus eemi maradikami, komimi batua-Na. 25 Hema-hema to mahala, natarima moto mei pebalahia lako Alatala tempo eo pobotuhia, apa Alatala moma-'I nampelihi tauna.