Hura Paulus rau hi Jumaa i Filipi
Popailodoa
Hura ei laitulihi Paulus rau hi jumaa i ngata Filipi. Ngata Filipi ee mai, hangu ngata bohe i propinsi Makedonia to ilodo laiparenta Magau Bohe Roma. Tempo ei ngata Filipi ee nehua bagia tana Yunanimi.
Hinungkaina Paulus nokarebai Kareba Belo i propinsi Makedonia ee, ngata Filipi eemi to pamula-mulana laikaraui Paulus. Tempo Paulus pade Silas pamulana nangkeni Kareba Belo hi to Filipi, hira laipakaheha tauna to Filipi ee pade laipahuara i rara tarungku (Kis. 16). Naupawee nadea tauna to Filipi ee nangepe Kareba Belo to laiparatara pade nawali neparahaya hi Pue Yesus. Hura ei laitulihi Paulus hi to namparahaya Yesus i Filipi tempona laitarungku.
Hangka laiepera tauna to neparahaya i Filipi ee ane Paulus laitarungku, laitudura Epafroditus nangkeni doi halaku petulungira hi Paulus. Karata Epafroditus i Roma, no'ohami i hee bahangkua mula kahaena pade nantulungi Paulus (Flp. 2:25-30; 4:10, 18). Epafroditus eemi pangepei Paulus kareba ane i Filipi ee nadea tauna to nopatudu patudu to nepahalatara. Habana nangepe kareba eemile pade Paulus notulihi hura ei hi to namparahaya Pue Yesus i Filipi. Nahudupi hura ei laitulihina, Paulus nantudu Epafroditus bona manculikimi rau Filipi mangkeni hurana ei. Hura Paulus ei laitulihina hante goe rarana habana neparahaya mpuu'i hi Kristus. Laiharumakana mpuu ane to laitulihina ei mampakaroho wukura tauna to mobaha.
Rara hurana ei, pamula-mulana Paulus nanguli nadea belona hi jumaa i Filipi habana hangu hangaa to laiwaikara'i tempona naheha (1:3-8; 4:10-19). Rara hura ei mui, laipakarohona wukura bona mabiara pade mohabarara mantingohi kahehaa (1:12-30). Laiperapina mpuu hi hira bona nemo mahombo nahibali ewa Yesus moma nahombo pade nemora mampomaihi wotora moto (2:1-11). Laipalingaina muira, ane habana kabohe towe Alatala aga pade namalara nohangu rara hante Kristus apa neparahayara hi Hia, moma habana natigura nanturuhi atura rara patudu agama Yahudi (3:1–4:1). Kapolaana, Paulus mui notulihi nangkambelai goe rara to laipopewai Alatala hi tauna to nohangu rara hante Kristus (4:4-9).
Aji, hura ei nampojarita nangkambelai goe rara, karoho peparahaya pade bewa matuwu halaku to Karahitee. Hura ei mui nampahiloi ane natowe mpuu'i Paulus hi jumaa i Filipi ee.
Ihi Buku Ei
1. Tabe pade hambaya Paulus (1:1-11)
2. Pohabi Paulus i rara tarungku (1:12-26)
3. Patudu bewa matuwu halaku to Karahitee (1:27–2:18)
4. Nangkambelai Timotius pade Epafroditus (2:19-30)
5. Pepalingai bona mainga hante patudu to nepahalatara (3:1–4:1)
6. Patudu bona mahintuwu pade maroho peparahaya hi Pue (4:2-9)
7. Posukuru Paulus habana laitarimanami to laipakatura to Filipi (4:10-20)
8. Tabe kahuduana (4:21-23)