Alatala nampemakonota habana peparahayata hi Kristus Yesus
3
1 Kahuduana ompi-ompiku, kagoemo komi habana nohangu raramo komi hante Pue. Moma nantomo iepeku notulihi nculi to nariami wengi laitulihikaku komi, bona nemo maria tauna to mampakahalatara komi hante patudura to moma nakono. 2 Mainga komi hi tauna to nopatudu ane tauna kana ratini bona mawali todea Alatala. Hira ee mai nahibali ewa dike to naheke, apa nadaa ingkura. 3 Kita eimile to mpuu-mpuu laitini. Moma hira. Nepueta hi Alatala hante petulungi Inoha Alatala moto. Laipolingata wotota apa nohangu rarata hante Kristus Yesus. Momata nampaharumaka ada to laibabei manuhia.4 Ane ke namala'i ada to Yahudi ee mampemakono'a i tingoo Alatala, mahipato moto'a mampaharumaka ada ee. Apa ane maria tauna manguli nelabi pampaharumakana ada, neliu muipi aku. 5 Walu eodipi umuruku, laitini'amo. Aku ei to Israel, lako muli Benyamin. Aku ei koro to Ibrani. Ilodo natigu mpuu'a nantuku patudu Taurat, apa to Farisi'a. 6 Tempo ee naroho mpuu'a nantuku patudu agama Yahudi hampena laiduahikura to pantuku Yesus. Ane rahilo lako pampoingkukaku patudu Taurat, moma'a nakahalaia.
7 Naupawee, to ilodo laipekiriku nadea bununa hi aku, tempo ei laipekiriku momami naria bununa habana Kristus. 8 Moma wuwu ee, molelau humaweena laipekiriku momami naria bununa, apa neliupi kabelona laincanikumi Pueku Kristus Yesus. Humaweena laibakahakumi apa laipekiriku humaweena lauria nahibali hante rumpu to moma naria bununa. Patujuku nobabei lauria bona kurata Kristus 9 pade mohangu rara hante Hia. Alatala nampemakono'a moma habana natigu'a nantuku patudu Taurat, naupawee habana peparahayaku hi Kristus. Aku nawali nakono i tingoo Alatala moma lako pokaingkuku naupawee Alatala moto to nampemakono'a habana peparahayaku. 10 Hangaa aga to laipodotaku, kuncani belo-'I Kristus pade kurasai baraka to nampakatuwu nculi-'I lako kamatea-Na. Mingki kurasai kahehaa to lairasai-Na pade matundu duu mamate nahibali hante Hia, 11 apa laiharumakaku rapakatuwu nculi mui'akuwo lako kamatea.
12 Moma iuliku ane humawee lauria nadupami rara katuwuku. Moma mui iuliku ane naganami pantukuku Kristus. Naupawee, laipehimukuiku oadipi nampadapa napa to laipahadiaka-Na'a, apa laiala-Na'amo Kristus Yesus pade laipakawali-Na todea-Na. 13 Ompi-ompiku, moma iuliku ane lairatakumi napa to laidapaku, naupawee naria hangaa to laibabeiku: Laikalinganikumi to naliu pade laipehumukuiku mpuu mamparata napa to naria i tingooku. 14 Etu pade moma'a nentuu nohilumba bona kurata hadia to laipahadia Alatala, etumi katuwua i huruga. Apa eemi patuju Alatala nangkiota nohangu rara hante Kristus Yesus. 15 Kita to narohomi peparahayata hi Kristus, kana mahibali ewa to laiuliku lauria pampekirita. Bo ane maria komi to nontani pampekirimi, Alataladimi mopandolaka komi. 16 Naupawee koropokona, kana batena motota matuwu mantuku patudu to laitukutami duu tempo ei.
Nemo mantuku ingku to nadaa
17 Ompi-ompiku, tukumi humawee ingkuku. Laipahiloikamimi napa to kana rababei. Tuku ingkura tauna to nantuku ingku kami. 18 Naharomo komi iulikaku. Welau ei ku'ulika muipa komi hante keoku ane nadeamo tauna to nadaa ingkura. Hante Ingkura ee laihapuakara patuju kamate Kristus i kau salib. 19 Tauna to ewa eera kana rahuku duu kahae-haena. Ihi ntaira moto to laipuera. Laipolingara ingkura to nepakaea, apa katuwua i dunia ei aga to laipekirira. 20 Naupawee, kita ei mai todea huruga. Lako i huruga ee muimi marata Magau to Pepakahalamata Pue Yesus Kristus. Hiami to laipopeata hante kalentorata. 21 Wotota to nalente pade mamala mamate ei Nabaliki Kristus mawali ewa woto-Na to moma mamate. Humaweena ee mamala Nababei, apa naria baraka-Na mampakatundu hangu hangaa.