4
1 Etumo ompi-ompi to laipotoweku pade to laikalentoraiku, puu kagoeaku pade to laipolingaku, pakaroho mpuu peparahayami hi Pue.Popakaroho rara
2 Euodia pade Sintikhe, kuperapi mpuu hi komi bona mahintuwu komi halaku tauna to nohangu rara hante Pue. 3 Kuperapi mui hi iko Sunsugos, dohe hampobagoaku to natigu, tulungira bangkele etu bona mohingkabelo nculira. Apa bangkele etura hingkani-ngkani hante aku nampehimukui nangkarebai Kareba Belo lako Alatala. Wetu moto mui Klemens pade dohe hampobagoaku ntanina. Hira ee mai laitulihimi hangara rara buku potulihia hanga tauna to matuwu duu kahae-haena.
4 Magoe moto oa komi apa nohangu rara komi hante Pue! Hangkanipi ku'uli, kagoemo komi! 5 Kabelo rarami kana rancani humawee tauna. Apa momami mahae Pue marata! 6 Nemo mamere rarami nangkambelai hangu hangaa. Naupawee, ulimi humawee paraluumi hi Alatala rara perapia bo hambayami pade mosukuru moto oa komi hi Alatala. 7 Apa ane iwee, katuwu to nanone lako Alatala to moma laipaha manuhia mampajagai rarami bo pekirimi habana nohangu rara komi hante Kristus Yesus.
8 Kahuduana ompi-ompiku, humawee to nakono, humawee to mahipato rabila, humawee to moma nantomo hamika, humawee to moma nakahalaia, humawee to nahipato laipokono tauna, humawee to nabelo, pade ane maria to laiuli belo rara pade mahipato raune, pekirimi humaweena lauria. 9 Babeimi napa to laipeguruimi pade to laitarimami lako hi aku, to laiepemi lako jaritaku, pade to laihilomi lako ingkuku. Apa ane iwee, Alatala mampodohe komi pade mampawaika komi katuwu to nanone.
Goe rara Paulus nantarima to laipakatura jumaa Filipi
10 Nagoe mpuu raraku pade laiuneku Pue apa naria nculimi pampekirimi bo rarami nantulungi'a. Naria moto oa rarami mantulungi'a, aga poma naria logami. 11 Laiuliku ei moma habana nakakuraa'a, apa nabiaha'amo nampakagana kaparaluaku hante napa to naria hi aku. 12 Laincaniku bewa natuwu nakakuraa, laincaniku mui bewa natuwu nelabi. Apa ncanikumi bewa mantingohi humawee ka'adaa, belo tempo nabohu, belo mui tempo naoro. Belo tempo nelabi, belo mui tempo nakakuraa. 13 Humawee namala laikoloku hante baraka Yesus Kristus to nampakaroho'a. 14 Naupawee, laitulungimi'amo rara kahehaaku. Nabelo mpuu humawee to laibabeimi etu.
15 Ompi-ompiku to Filipi, ncanimi moto pamulana'a nangkarebai Kareba Belo hi komi, peongkoku lako Makedonia, wuwu komi aga jumaa to nantulungi'a. 16 Apa kariaku i Tesalonika, bahangkua ngkanimo komi nopakatuka'a napa to iparaluuku. 17 Iuliku lauria, moma kamingkiku mantarimaki to mipopewai, naupawee to laipodotaku matetambai rahi to mitarima. 18 Laitarimaku purami to laiparaluuku lako hi komi. Bo ee nelabimi lako kaparaluaku. Moma'amo nakakuraa habana laitarimakumi lako Epafroditus humawee to laipakatumi. To laipopewaimi ei, nawongi ewa wongi kurban hi Alatala pade laitarima Alatala hante goe rara-Na. 19 Alatalaku to nelabi kahugi-Nadimi mampakagana humawee kaparaluami apa nohangu rara komi hante Kristus Yesus. 20 Taunemi Alatala Tuamata duu kahae-haena! Amin.
Tabe kahuduana