Patudu bona mampekiri bo mokaingku ewa Kristus
2
1 Naroho komi, apa nohangu raramo komi hante Kristus. Nasana rarami, apa Kristus nampotowe komi. Laipanuntu-Na komi Inoha to Nagaha. Nonepotowe komi hadua bo hadua pade na'ahi rarami hi to ntanina. 2 Aji, pakagana kagoe raraku hante ei: Mohangu rara moto oa komi, momepotowe moto komi hadua bo hadua, mohangu pekiri pade mohangu patuju. 3 Nemo mobabei hangu hangaa to mampomaihi wotomi moto, nemo mahombo, pade bilara to ntanina nelabi lako pampabilami wotomi moto. 4 Nemo kaparaluami moto mipekiri, linga mui kaparalua doo. 5 Pampekirimi pade ingkumi kana mahibali hante pampekiri bo ingku Kristus.6 Naupa nahibali-'I hante Alatala,
momahana naria laipekiri-Na ane kahibali-Na hante Alatala ee kana Napetahai,
7 molelau laibakaha-Na pura humawee lauria, natuwu-'I nawali manuhia,
pade nahibali hante batua.
8 Rara katuwu-Na halaku manuhia,
Hia nampemakodi woto-Na moto pade neturuhi-'I hi Alatala duu-Na namate laipaku i kau salib ewa hadua to powao.
9 Etu pade Alatala nampawaika-'I poncunaa to neliu kalangkona i huruga,
pade laiwaika-Na mui-'I baraka to neliu kabohena lako humawee baraka to ntanina,
10 bona humawee to natuwu i huruga, to natuwu i dunia pade to natuwu i une tana
matundu bo mepue hi Yesus,
11 pade humaweera mangaku ane Yesus Kristus eemi Pue.
Ane weedimi, Alatala Tuama rapemabohe.
Patudu bona meturuhi hi Alatala
12 Etumo ompi-ompiku to laipotoweku, bewa peturuhimi hi Alatala tempoku ritudipi dohemi, pelabinapi tempo ei moma'amo ritu dohemi, kana meturuhi moto oa komi. Laipakahalama-Namo komi Alatala. Aji, pehimukui mpuu matuwu ewa bewa kahipatona tauna to laipakahalama Alatala, hante mengkoru bo matundu hi Alatala. 13 Apa Alatala moto nobago i rarami bona maria rarami mobabei to laipodota-Na pade mibuku mobabei to laipokono-Na.
14 Napa-napa to mibabei nemo komi mongudu ba momebili. 15 Ane ewa ee ingkumi i lentongora to nabengko rarara pade to nahalatara tempo ei, laipahiloimimi ane komi etu ana Alatala to moma nakahalaia, natuwu nanoro pade moma naria to nadaa i rarami. Ane wee mewanta baami i lentongora ewa betue nampawanta dunia, 16 apa laipotolelemi moto oa lolita Alatala to mamala mampawaira katuwua to moma maria kahuduana. Ane iwee katuwumi, magoe mpuu raraku i eo karata Kristus habana moma'a nobago mara apa naria moto wuana lako bago to laipehimukuiku. 17 Neparahaya mpuu komi hi Hia hampena laipopewaimi katuwumi halaku kurban hi Alatala. Aji, naupa rapatehi'a pade raaku ratoli mawali kurban habana peparahayami, nagoe moto oa'a. Pade nagoe moto mui'a habana pepuemi hi Alatala. 18 Wee moto mui komi, kana magoe komi hante napa to nadupa rara katuwumi pade napa to nadupa hi aku.
Timotius pade Epafroditus
19 Laiharumakaku ane hante petulungi Pue Yesus, mahomimi kutudu Timotius tulau hi komi, bona masana raraku mangepe karebami. 20 Habana wuwu Timotiusdimi to nohangu pekiri hante aku nampekiri ka'adaami. 21 To ntanina ee rau nampomaihi bagora motoradamo. Momara nampomaihi bago Yesus Kristus. 22 Hilomi motomi, ane Timotius ee nokehi mpuu'i nobago. Laitulungina'a nangkarebai Kareba Belo lako Alatala, ewa hadua ngana nantulungi tuamana. 23 Ane kuncanidimi bewa mei kabotua uruhiaku ei, laiharumakaku mamalami Timotius dungku kutudu tulau hi komi. 24 Pade parahayaku mpuu, ane Napodota Pue, moma mui'amokuwo mahae tulau hi komi.
25 Nangkambelai ompita Epafroditus to laitudumi tumai nampatulungi'a, laipekiriku nabelopi ane kutudu manculi tulaumi olu. Laipodohena'amo rara pobagoaku pade hingkani-ngkani kami nampehimukui nampotolele Kareba Belo. 26 Nalentora mpuu'i hi komi pade nokalihe rarana habana iepemimi kareba ane nadua'i wei i hei. 27 Nakono mpuu'i nadua pade ke nono mamate. Naupawee laipotowe-Na'i Alatala. Moma wuwu hia to laipotowe Alatala, aku mui laipotowe Alatala bona nemo matetambai dua raraku. 28 Etu pade hante goe raraku dungku kutudumi tulau, bona magoe komi mampahilo'i pade masanami hodi raraku. 29 Aji, potomu belo'i hante goe rarami halaku ompimi hangu kaparahayaa, pade bilara tauna to ewa hia etu. 30 Apa ke nono mamate'i habana nampobago bago Kristus. Momami taparina tuwuna nampahambei komi nantulungi'a i hei.