Filipi 1

Hura Paulus rau hi Jumaa i Filipi

Tabe

1 Lako Paulus pade Timotius, batua Kristus Yesus. Hura ei laipakatu kami hi humawee todea Alatala to nohangu rara hante Kristus Yesus i Filipi, pade hi komi penatua bo diaken. 2 Mohambaya kami bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.

Posukuru pade hambaya

3 Ompi-ompi, nosukuru'a hi Alatalaku butu ngkanina lailingaku komi. 4 Pade butu ngkaniku nampahambayani komi, nohambaya'a hante goe raraku. 5 Nosukuru'a hi Alatala apa lako pamulana'a i Filipi, duu welau ei, laitulungimi'a nangkarebai Kareba Belo lako Alatala. 6 Nopamulami Alatala nobago i rarami, pade laiparahayaku mpuu ane Hia moto mui to mopadola bago ei hampe mahudu duu karata nculi Kristus Yesus. 7 Mahipato ami ane ewa ee pampekiriku nangkambelai komi, apa laipotoweku mpuu komi pade laitulungimi'a nampobago bago to laiwaika-Na'a Alatala habana kabohe towe-Na. Laitulungimi'amo, belo tempoku laitarungku, belo mui tempoku nampakanoto hi tauna ane Kareba Belo ee mpuu-mpuu nakono. 8 Hante towe lako Kristus Yesus nalentora mpuu'a hi komi. Laincani-Na moto Alatala ane napa to laiuliku ei nakono.

9 Ei hambayaku hi Alatala, bona mantambai dola towemi pade mantambai mui pampahami nangkambelai to nakono bo kanoto pampekirimi, 10 bona mamala komi mampelihi napa to nabelo ntoto, hampena magaha moto tuwumi pade moma maria kahalaami ane marata nculipi Kristus. 11 Pade pokaingkumi mpuu-mpuu mawali mabelo bo manoro habana Yesus Kristus nobago i rara katuwumi, hampena Alatala rapemabohe bo raune.

Pohabi Paulus i rara tarungku

12 Ompi-ompiku, dota raraku mincani ane napa to nadupa hi aku ei nampakadeaki tauna to nangepe pade namparahaya Kareba Belo, 13 hampena nanotomi hi humawee tantara to nampodoo hou magau pade hi humawee tau ntanina ane aku ei laitarungku habana nampobagoka Kristus. 14 Pade nadea ompita to neparahaya hi Pue narohoki peparahayara pade nabiaramo nampojarita lolita Alatala habana laincanira Alatala nantulungi'a i rara tarungku.

15 Naria tauna nangkarebai nangkambelai Kristus hante hiri rarara hi aku pade nobungka hante to ntanina. Naupawee, naria mui tauna nangkarebai nangkambelai Kristus hante patuju to nabelo. 16 Hira to nabelo patujura ee mai nangkarebai nangkambelai Kristus habana towe rarara hi aku. Apa laincanira mpuu ane aku ei laitarungku habana nampakanoto hi humawee tauna ane Kareba Belo ee mai mpuu-mpuu nakono. 17 Naupawee tauna to nohiri rarara ee mai nangkarebai nangkambelai Kristus hante patuju to moma nabelo. Hira ee mai nampomaihi wotora moto. Iulira hira, ane rababeira ewa ee, matetambai kahehaku i rara tarungku.

18 Moma nongkua. Ba rakarebai hante patuju to nabelo ba hante patuju to moma nabelo, to koropokona kareba nangkambelai Kristus laipotolele. Nangkambelai humaweena ee nagoe raraku, pade batena moto'a magoe 19 apa laincaniku, kahuduana mei rabakaha moto'a lako tarungku ei habana hambayami pade petulungi Inoha Yesus Kristus. 20 To laiparahayaku bo to laiharumakaku, rarana hangu hangaa moma'a maea i tingoo Alatala pade batena mabia moto'a ewa lodo. Matuwu ba mamate'a, Kristus moto rapemabohe rara wotoku. 21 Apa to hi aku, patuju tuwuku mampemabohe Kristus aga. Pade ane mamate'a, nauntu'amo. 22 Naupawee ane kana matuwu'a i dunia ei, batena moto kupobago to naria bununa. Matuwu ba mamate, uma to kana kupelihi momami ncaniku. 23 Rongaa to ipekiriku. Hangaa, mingki'a mampalahi dunia ei rau mo'oha dohe Kristus apa eemi to nelabi mpuu kabelona. 24 Naupawee karongaana, nelabipi pobununa hi komi ane aku mo'oha i dunia ei bona mantulungi komi. 25 Laiparahayaku mpuu lauria, etu pade laincaniku ane batena moto'a mo'oha dohemi pura bona mamala'a mantulungi komi hampena marohoki peparahayami hi Kristus pade mantambai kagoemi habana peparahayami ee. 26 Pade magoe mpuu rarami mampaune Kristus Yesus habana aku, apa mamala'adapa mei manculi mampodohe komi.

Patudu bona maroho mampotolele Kareba Belo

27 Koropokona, rara katuwumi komi kana mampoingkuka to mahipato halaku tauna to namparahaya Kareba Belo nangkambelai Kristus. Bona ane iwee, ba motomuta ba moma, kuepe mei kareba ane maroho moto kahintuwumi pade mohangu rara moto komi mampehimukui mobago bona madea tauna mamparahaya Kareba Belo. 28 Nemo komi maeka hi tauna to nampaewa komi. Apa ane iwee, komi mampakanoto hi hira ane hira ee mei Nahuku Alatala bo komi mei mahalama. Pade kahalamaami ee, lako Alatala moto. 29 Apa rara kabohe towe-Na, moma wuwu peparahaya hi Kristus to laiwaika-Na komi Alatala, laiwaika-Na mui komi loga mangkolo kahehaa habana peparahayami hi Kristus. 30 Welau ei komi mui namparasai laiewa tauna tempomi nampehimukui nampotolele Kareba Belo. Kahehaa to lairasaimi etu nahibali hante kahehaa to laihilomi ilodo nadupa hi aku, tempoku i ritu dohemi pade to laiepemi motomi ane duu ei lairasaikudipi.