6
1 Komi ngana, halaku to neparahaya hi Pue, kana mituruhira totuami, apa ewa eemi ingku to mahipato tababei. 2 “Bilara tuama bo tinamu.” Ei mai parenta to pamulana to naria tipa Alatala rarana. Iwei tipa-Na, 3 “Bona masana katuwumu pade malanga umurumu i dunia ei.”4 Komi to tuama, nemo komi mampopeumba hodora anami. Naupawee, pakabohera pade pagurura hante patudu lako Pue.
5 Komi batua, kana mituruhi maradikami i dunia ei. Babeimi etu hante pebila bo pengkorumi pade hante rarami mpuu, nahibali ewa peturuhimi hi Kristus. 6 Nemo wuwu i tingoora moto mibabei ewa ee bona mampakasana rarara. Naupawee pobagomo komi halaku batua Kristus to hante rarami mpuu nanturuhi dota Alatala. 7 Pobagomo komi hante goe rara ewa nampobagoka Pue, moma nampobagoka manuhia. 8 Laincanimi ane butu tauna, belo batua ba maradika, ane nababeidimi ingku to nabelo, kana natarima mei balahiana lako hi Pue.
9 Komi maradika, kana mibabei ewa ee moto mui hi hira batuami. Nemorapa mipararai. Linga komi, Puera pade Puemi hadua aga, etumi Pue to natida i rara huruga. Pue ee mai moma-'I nampelihi tauna.
Parewa pohiwali lako Alatala
10 Kahuduana, kana maroho komi hante roho to laitarimami lako baraka Pue apa nohangu rara komi hante Hia. 11 Pakemi humawee parewa pohiwali lako Alatala, bona maroho pentidami mampaewa pepatiwoo Magau Heta. 12 Apa kita ei mai momata nohiwali nampaewa manuhia, kita nohiwali nampaewa baraka-baraka bo Magau Heta hante to pantukuna to nangkakamu baraka dunia ei, nampaewa malaeka dunia to nalimau, pade nampaewa humawee anudaa i roelawa. 13 Etumo, pakemi humawee parewa pohiwali Alatala bona ane marata'i baraka to nadaa ee mamperumata komi, mamala komi mampaewa'i, pade maroho moto pentidami duuna mahudu pohiwali ee mai. 14 Aji, pakaroho pentidami pade pohulepe patudu to nakono. Pakanoro ingkumi, apa eemi waru ahemi. 15 Kana mahadia komi mangkarebai Kareba Belo nangkambelai katuwu to nanone lako Alatala. Kahadiami eemi hapatumi. 16 Rarana hangu hangaa, kana maroho peparahayami hi Alatala. Peparahayami eemi kaliawomi to nampalawa wotomi. Apa hante peparahayami ee mamala komi mopatehi mata pana to na'apua lako Magau Heta. 17 Kana maroho komi mampaharumaka kahalamaa lako Alatala, etumi hongko ahemi. Pade kana mipake lolita Alatala apa etumi tono lampa to laiwaika-Na komi Inoha to Nagaha. 18 Babeimi humawee lauria hante mohambaya merapi tulungi hi Alatala. Nemo komi maputu mohambaya mantuku panuntu Inoha to Nagaha, pade mainga moto oa komi i rara hambayami ee. Hambayanira humawee todea Alatala.
19 Hambayani mui'akuwo bona Alatala mangkewoka'a napa to kana ku'uli, pade mabia'a mangkarebai Kareba Belo to ilodo laipopalerui hi manuhia. 20 Apa aku ei mai huro Alatala to nangkarebai Kareba Belo, naupa tempo ei laitarungku'a. Pohambaya komi bona mabia'a mangkarebai Kareba Belo, pade moma'a maeka mojarita.
Tabe kahuduana
21 Ompi-ompi, bona mincani bewa karebaku i hei, laituduku Tikhikus ompita to laipotoweku, to natigu mpuu nampobagoka Pue, tulau mangkewo humaweena hi komi. 22 Patujuku nantudu'i tulau, bona mincani kareba nangkambelai ka'adaa kami i hei pade napakaroho rarami. 23 Katuwu to nanone pade towe rara lako Alatala Tuama pade Pue Yesus Kristus mampodohe komi humawee ompiku hangu kaparahayaa pade mampakaroho peparahayami. 24 Kabohe towe Alatala mampodohe humawee tauna to nampotowe Pueta Yesus Kristus, hante towe to moma maria kaoraana.