Matuwu rara baa Kristus
5
1 Komi etu mai ana Alatala to laipotowe-Na. Etumo, tukumi ingku Alatala i rara katuwuami. 2 Pade matowe komi hi to ntanina ewa Kristus Yesus mui nampotoweta. Habana kita, laipopewai-Na woto-Na nawali kurban to nawongi pade nampakagoe rara Alatala.3 Komi etu todea Alatala. Etu pade ingku pogau hala, kaliugantaa pade ingku to moma natimotoa ntanina, nemo mibabei. Rauli aga, moma namala. 4 Nemo mojarita maholoka, nemo mojarita to moma natimotoa pade to moma nabelo. Apa etu mai moma nahipato miuli. Nabelopi mosukuru komi hi Alatala. 5 Bona mincani, hema to nogau hala, to moma natimotoa ingkuna, ba to naliu ganta, moma naria bagiara rara poparentaa Kristus pade Alatala. Apa tauna to noingku ewa ee mai kakonona nepue hi napa to laipomaihina ee. 6 Nemo komi rapahalatara humawee jarita to moma naowo, apa to ewa eemi to nampopeumba hodo Alatala hi tauna to moma neturuhi hi Hia. 7 Nemora mipodohe tauna to ewa ee.
8 Ilodo, komi etu natuwu i rara kalimauana, naupawee tempo ei komi natuwu i rara kabaana habana nohangu raramo komi hante Pue. Etu pade kana matuwu komi hante ingku to mahipato halaku tauna to natuwu i rara kabaana. 9 Apa ane matuwu i rara kabaana komi, mibabei oa mei ingku to nabelo, nanoro pade nakono i tingoo Pue. 10 Pehimukui mpuu bona mincani napa to mampakagoe rara Pue. 11 Nemo komi mantuku ingkura tauna to natuwu i rara kalimauana, to moma naria bununa. Naupawee popahiloi hi to ntanina ane humawee ingku ee nadaa. 12 Apa manguli ingku to laibabei mpelerura aga, nepakaea. 13 Naupawee, humawee ingkura to nadaa narawami i rara kabaana. Apa i rara kabaana, moma naria to moma laihilo. 14 Etu pade laiuli:
“Pematamoko to poturu,
katuwu nculimoko lako kamatea,
pade baa Kristus mei mampawantakiko.”
Pengkoru hi Kristus nawali koropoko i rara katuwu tauna to neparahaya
15 Aji, hilo belo bewa komi natuwu. Nemo matuwu ewa tauna to nadoyo, to moma incanina bewa ingku to nabelo. Katuwu komi ewa tauna to nadea timbana. 16 Pake belo humawee logami mobabei ingku to nabelo, apa tempo ei nadaa mpuumo ingku manuhia. 17 Nemo komi madoyo. Naupawee pehimukui bona mipaha napa to laipodota Pue mibabei. 18 Nemo komi malangu ue anggur, apa nalangu etu nampopeumba dota rara to nadaa. Kabelo-belona komi kana maponu hante Inoha to Nagaha. 19 Ane momepojaritaka komi, pojaritami mazmur bo ulia peune hi Pue. Pouliamo komi mampaune Pue hante kagoe rarami. 20 Mosukuru oa komi rarana hangu hangaa hi Alatala Tuamata i rara hanga Pueta Yesus Kristus.
21 Kana hore matundu komi hadua bo hadua habana pengkorumi hi Kristus.
22 Komi totua bangkele, kana matundu komi hi balailomi ewa katundumi hi Pue, 23 apa balailomi etumi woomi, ewa Kristus nawali woo jumaa. Hiami to nampakahalama jumaa to lairapaika woto-Na. 24 Apa ewa jumaa natundu hi Kristus, wetu moto mui totua bangkele kana matundu hi balailona rarana hangu hangaa.
25 Komi totua balailo, potowe bangkelemi ewa Kristus nampotowe jumaa pade nampopewai woto-Na rapatehi bona jumaa ee mahalama. 26 Kristus nobabei ewa ee mai bona magahata. Laipakagaha-Nata hante ue popadiu bo lolita-Na, 27 bona jumaa ee Napakawali meringkila i tingoo-Na ewa kagahi pongante bangkele i tingoo pongante balailo, hante moma naria hodia kakuraana bo kahalaana. 28 Wetu moto mui totua balailo kana mampotowe bangkelena ewa pampotowena wotona moto. Hema to nampotowe bangkelena, nampotowe wotona moto. 29 Apa moma naria tauna nampodaa wotona moto. Naupawee laijagaina bo laipiara belona moto oa wotona, ewa Kristus nampajagai bo nampiara jumaa-Na. 30 Laipiara-Nata Kristus, apa kita ei bagia lako woto-Na. 31 Ewa to laitulihi rara Buku to Nagaha, “Etu pade balailo kana mampalahi tuamana bo tinana pade mopahangu hante bangkelena, hampena roduara ee mawali hangu wotoradamo.” 32 Nandala mpuu batuana to laiuli ee. Naupawee patuju to iuliku ee nangkambelai katekaia Kristus hante jumaa. 33 Nau bewa mui, to iuli ee mai nambela mui hi komi: Butu duami totua balailo kana mipotowe bangkelemi ewa pampotowemi wotomi moto, pade totua bangkele kana mebila hi balailona.