Kahintuwu jumaa halaku woto Kristus
4
1 Etu pade aku to laitarungku habana nampobagoka Pue, merapi mpuu hi komi bona tuwumi mahipato halaku tauna to laikio Alatala mawali todea-Na. 2 Madole hi doo, mohabara, pade nemo mahombo. Nemo madoli mahodo habana kahalaa tau ntanina. Kana momepotowe komi hadua bo hadua. 3 Pehimukui mpuu matuwu mohingkabelo bona kahintuwumi to laipajadi Inoha to Nagaha etu matepiara moto oa'i. 4 Kita ei lairapaika woto Kristus, etu pade humaweeta to neparahaya, hangu woto motota i rara Kristus, pade hangu moto mui Inoha to Nagaha to natida i rarata. Wee moto mui harumakaata hangu aga, lako Alatala to nangkiota. 5 Hadua aga Pue, hangu kaparahayaa, pade hangu popadiu apa nahibalitamo laidiu rara hanga Pue Yesus. 6 Hadua moto aga Alatala, Tuama humawee tauna. Hia eemi Pue humaweena, to nampobago humaweena, pade to noparenta humaweena.7 Naupawee, nau nadea kahibaliata, hore laiwaika-Natamo Kristus pampakulea to moma nahibali mantuku dota-Na moto. 8 Etu pade laitulihi rara Buku to Nagaha iwei,
“Pengkahe-Na rau i kalangkoana,
laikeni-Na humawee tauna to laidagi-Na rara pohiwalia
pade laipopewai-Na rahi hi manuhia.”
9 To laitulihi “Pengkahe-Na” etu batuana pamula-mulana nehompo-'I rau karedeana ntoto i dunia ei. 10 Hia to nehompo ee, Hia moto mui to nengkahe rau i kalangkoana ntoto to nelabi kalangkona lako langi, hampena Hia naria i rima-rima, belo i langi belo mui i dunia. 11 Hiamile to nampawaika rahi hi manuhia. Batuana, nariara to laiongko-Na nawali rasul-rasul bo nabi-nabi, nariara to nampotolele Kareba Belo pade naria muira nawali to poewu jumaa bo to nopaguru jumaa. 12 Kristus nampawaikara pampakulea ee bona mamalara mantulungi jumaa Alatala mampobagoka Pue. Ane wee, humawee jumaa ee mamalara meumba halaku woto Kristus. 13 Bona mohangu rarata meparahaya pade mangincani Ana Alatala, maroho peparahayata pade kahaa-haea momami maria kakuraata, magana mpuutamo ewa Kristus. 14 Lauparia, nemotapa ewa ngana to rau rumai laipakaingu nadea ngaa patudu lako tauna to napande nepakahalatara hante kalowora. 15 Kana maroho pangkakamuta patudu to nakono hante rarata to natowe. Ane iwee mai, meumbata rara hangu hangaa duuna mahibali hante Kristus woo jumaa, 16 apa Hiami woo pade kita eimi woto-Na. Hiami to noaturu humawee woto hampena nabelo pomeuncuna pade popahanguna. Ane humawee jumaa ee mobago mantuku pampakulea to laipopewai Pue, natantu amimi mabelo peumbara jumaa ee habana pomepakarohora pade pomepotowera.
Manuhia to nabou
17 Hante baraka Pue ku'ulika mpuu komi: Nemopa komi matuwu ewa tauna to moma nangincani Alatala hante pampekirira to moma nobunu. 18 Momara nengkao napa-napa pade momara namparata katuwua to laipopewai Alatala, habana moma ncanira patudu to nakono lako Alatala apa nakoo rarara. 19 Momami naria eara. Etu pade laitukura humawee dota rarara pade moma naria kaohaara nobabei hangu hangaa to moma natimotoa. 20 Moma ingku to ewa ee to laipeguruimi lako patudu Kareba Belo nangkambelai Kristus.
21 Laiepemimi nangkambelai Yesus, pade laipatudukiimo komi hante patudu to nakono nangkambelai Hia apa nohangu raramo komi hante Hia. 22 Laipatudumo komi bona mibakahami dala katuwumi to nahae hante ingkumi to nadaa kapomami neparahaya hi Yesus. Dota rarami to nadaa tempo ee nampakahalatara bo nampakagero katuwumi. 23 Laipatudu mui komi bona rarami bo pekirimi Napakabou Alatala. 24 Komi kana matuwu halaku manuhia to nabou to laipajadi Alatala nantuku tari-Na moto bona mpuu-mpuu ingkumi manoro pade magaha.
25 Etumo, nemopa mokalowo. “Ulimi to nakono hi to ntanina,” apa humaweeta ei woto Kristus. 26 “Ane mahodo komi, nemo hampe kahodomi etu mampakadoha komi.” Nemo mahodo duu maholo eo, 27 bona moma maria loga Magau Heta mampehori komi. 28 To pangio, nemopi mangio. Nabelopi tauna ee mampehimukui mampobago to nabelo, bona maria to natirakara tauna to nakakuraa. 29 Nemo maria jarita to nadaa mehuwu lako ngudumi. Ulimi jarita to mampakaroho wuku tauna to mahipato natarima mantuku kaparaluana, bona jaritami ee mangkeni kabeloa hi tauna to mangepe. 30 Nemo komi mampakadua rara Inoha to Nagaha Alatala. Inoha to Nagaha etu mai to nampatandai komi ane komi mei Natolohi Kristus i eo karata nculi-Na. 31 Tadimi humawee dua rara, gigi rara, hodo rara, pomehono bo pomepakudaa. Nemopa maria daa rara pade pekiri ntanina to nadaa. 32 Kana mabelo rarami hi to ntanina, momepotowe komi hadua bo hadua pade momeampuni komi ewa Alatala nampa'ampuni komi habana nohangu rara komi hante Kristus.