Bago Paulus nangkarebai Kareba Belo hi to moma Yahudi
3
1 Aji, aku ei, Paulus, laitarungku habana nampotolele Kareba Belo nangkambelai Kristus Yesus hi komi to moma Yahudi. 2 Tantu laiepemimi ane Alatala nampawaika'a bago nampotolele Kareba Belo hi komi. Bago ei laiwaika-Na'a habana kabohe towe-Na. 3 Alatala moto nangkewoka'a patuju-Na to ilodo laipopalerui-Na hi manuhia, ewa to laitulihikumi hodi i rara hura ei. 4 Ane mibahadimi, mincanimi bewa pampahaku nangkambelai patuju to ilodo laipopalerui Alatala ee, to laipakadupa Kristus. 5 Ilodo, patuju Alatala ee poma'i laikewo hi manuhia. Naupawee, tempo ei laikewo-Nami Inoha to Nagaha hi rasul-rasul bo nabi-nabi to laipelihi Alatala. 6 Eimile patuju Alatala, ane raparahayara Kareba Belo, tauna to moma Yahudi hingkani-ngkani hante to Yahudi mantarima humawee rahi to laipahadiaka-Nara Alatala, mawali bagia lako hangu woto pade mantarima napa to laitipa Alatala apa nohangu rararamo hante Kristus Yesus.7 Hante kabohe towe-Na Alatala nampawaika'a rahi bohe mangkarebai Kareba Belo ee, pade baraka Alatala moto to nampawaika'a pampakulea nampobago bago ei. 8 Lako humawee todea Alatala, akumi to moma ntoto nobunu. Naupawee Alatala nampawaika'a rahi bohe mangkarebai Kareba Belo hi tauna to moma Yahudi nangkambelai kabelo Kristus to neliu mpuu to momami namala laireke. 9 Alatala to nopajadi dunia bo langi nampawai mui'a bago mampakanoto hi humawee tauna bewa-'I nampakadupa patuju-Na to ilodo laipopalerui-Na hi manuhia. 10 Patuju Alatala, bona tempo ei, humawee to laiwaika baraka noparenta i huruga bo i langi mangincani ane nagana mpuu timba Alatala rarana hangu hangaa. Humawee etu rancanira lako hangu hangaa to laibabei Alatala hi jumaa Kristus. 11 Alatala nobabei humawee ee nantuku patuju-Na to naria amimi lako pamulana duu kahae-haena, to laipakadupa-Nami i rara Kristus Yesus Pueta. 12 Habana neparahayatamo pade nohangu raratamo hante Kristus, momami matongko rarata mampamohuki Alatala apa laincanitami ane Natarimata. 13 Etu pade kuperapi hi komi, nemo mahuha rarami nampahilo kahehaaku habana nampobago to nabelo hi komi to moma Yahudi. Kakonona kana mabohe rarami habana kahehaaku ei.
Hambaya Paulus
14 Aji ompi-ompi, hangka lailingaku humawee belo Alatala hi kita, notingkodu'a nohambaya hi Tuamata Alatala. 15 Hiami Tuama humawee tauna to naria i huruga bo i dunia ei. 16 Nohambaya'a, bona Alatala to neliu kabaraka-Na mampakaroho rarami hante Inoha-Na to Nagaha 17 bona Kristus matida i rarami habana peparahayami, pade maroho polarimi bo pentidami i rara towe. 18 Nohambaya'a bona hingkani-ngkani komi hante humawee todea Alatala mamparasai ane naluo mpuu, nalanga mpuu, nalangko mpuu pade nandala mpuu towe Kristus 19 to moma mpuu'i namala laipaha akala manuhia. Nohambaya'a bona mincani towe Kristus ee hampena maponu komi hante hipa Alatala to nelabi kaganana.