Laipakahalamata habana kabohe towe Alatala
2
1 Ilodo, ewa to namatemo komi apa moma laituruhimi parenta Alatala pade nadea dohami. 2 Laitukumi humawee kabiahaa dunia ei. Laitukumi mui dota to poparenta humawee anudaa to neworo i roelawa, to nobago i rarara tauna to moma neturuhi hi Alatala. 3 Ilodo, nahibali purata hante hira ee. Laitukuta dota rarata halaku manuhia pade laibabeita napa to nampakasana wotota pade pekirita. Kakonona, kita ei mai mahipato mantarima hodo Alatala nahibali ewa hira to ntanina. 4 Naupawee, nabohe mpuu ahi rara Alatala! Laipotowe-Na mpuuta. 5 Tempota ewa to namatetamo habana momata nepangala, laipakatuwu-Na nculita hingkani-ngkani hante Kristus. Aji, kabohe towe Alatala aga pade laipakahalama-Na komi. 6 Laipakatuwu-Na nculita Alatala pade laiongko-Nata moparenta hingkani-ngkani hante Kristus i rara huruga, apa nohangu rarata hante Kristus Yesus. 7 Laibabei-Na Alatala ewa ee, bona eo ngkapurina mei Napahiloi ane neliu mpuu kabohe towe-Na to moma naria hibalina. Towe ee laipakarawa Alatala hante belo rara-Na hi kita to nohangu rara hante Kristus Yesus. 8 Apa, hante kabohe towe Alatala laipakahalama-Na komi ane neparahaya komi hi Kristus. Humaweena etu laipopewai mara Alatala, moma lako napa to laipehimukuimi. 9 Laipakahalama-Nata Alatala, moma lako pampehimukuita. Nemo maria tauna mampolinga wotona moto pade manguli ane nahalama'i habana pampehimukuina moto. 10 Kita ei laipajadi Alatala nawali manuhia to nabou to nohangu rara hante Kristus Yesus, bona mobabei ingku to nabelo. Ingku to nabelo ee naria amimi laipahadia Alatala lako ilodo bona mamala tababei tempo ei.To moma Yahudi pade to Yahudi laipahangu Kristus
11 Aji ompi-ompi, kana milinga katuwumi to ilodo. Komi etu moma komi to Yahudi. To Yahudi mui nanguli ane komi etu mai tauna to moma laitini. Hira aga to laitini pade mahipato mawali todea Alatala. Bo potini to laitarimara ee mai, ada kabiahaa to laipobago mpale manuhia motodi. 12 Tempo ee mai, poma laincanimi Kristus. Komi etu mai to hawalikuna, moma komi muli to Israel. Aji, moma komi mamparata bagia lako napa to laitipa Alatala hi todea-Na. Komi natuwu i wongko dunia ei moma incanimi Alatala pade moma naria to laiharumakami. 13 Naupawee tempo ei, apa nohangu raramo komi hante Kristus, komi to ilodo na'awa lako Alatala, namohumo komi habana raa Kristus to nabubu i kau salib.
14 Apa Kristus eemile to nampopohingkabelota to neparahaya. Hiami to nopahangu komi to moma Yahudi hante to Yahudi pade to nampakaronto pomekawunto to nampopogaa tauna. 15 Ilodo, to Yahudi nantuku patudu Taurat bona mohingkabelora hante Alatala. Naupawee tempo kamate Kristus halaku manuhia, patudu Taurat ee mai momami mamala rapakera bona mohingkabelora hante Alatala. Kristus nobabei ewa ee bona to moma Yahudi hante to Yahudi rapahangu mawali manuhia bou to nohangu rara hante Kristus. Weemi Kristus nobabei pohingkabeloa. 16 Hante kamate-Na i kau salib, Kristus nampakaronto pomekawunto, nopahangura to moma Yahudi hante to Yahudi pade nampopohingkabelora hante Alatala. 17 Kristus narata nangkarebai kareba pohingkabeloa hi komi to na'awa pade kareba pohingkabeloa hi hira to namohu. 18 Habana Kristusmi, kita to moma Yahudi hante to Yahudi mamala mangincani Tuamata Alatala hante petulungi hangu Inoha, etumi Inoha to Nagaha.
19 Lauparia, komi to moma Yahudi, momamo komi to ntanina bo to rata, apa nopahangumo komi hante todea Alatala pade nohancoumo komi hante Alatala. 20 Kita to neparahaya hi Kristus lairapaika hou to laipatuna pade rasul bo nabi eeramo pondasina. Hou ee mai naroho habana Yesus Kristus to nawali koro watu pondasi. 21 Kita to nohangu rara hante Kristus ewa hou to laipatuna, nabelo pomeuncuna duu nawali hangu hou to laibabeika muntu hi Pue. 22 Apa nohangu rara komi hante Kristus, komi mui bulami laipatuna hingkani-ngkani hante tau ntanina to neparahaya hi Kristus, bona mawali hou to Nakatidai Inoha Alatala.