Hura Paulus rau hi Jumaa i Efesus
Tabe
1
1 Lako Paulus, to laipelihi Alatala nawali rasul Kristus Yesus. Hura ei laipakatuku hi todea Alatala i Efesus to neparahaya hi Kristus Yesus. 2 Mohambaya'a bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.Rahi tauna to laipelihi Alatala
3 Laiunemi Alatala, Tuama Pueta Yesus Kristus, to nampawaikata humawee rahi to nabelo i huruga apa nohangu rarata hante Kristus. 4 Kapomana dunia laipajadi, laipelihi-Natamo Alatala nawali todea-Na apa nohangu rarata hante Kristus. Laipelihi-Nata nawali todea-Na bona magahata pade momata makahalaia i tingoo-Na. 5 Habana towe-Na hi kita, lako lomona laipakatantu-Na amitamo Naongko mawali ana-ana-Na, habana nohangu rarata hante Yesus Kristus. Laiongko-Nata Alatala nawali ana-ana-Na, apa ee ami to laipodota-Na pade to laipokono-Na. 6 Mahipato taune Alatala apa nelabi mpuu kabohe towe-Na to laiwai mara-Na motota habana nohangu rarata hante Ana-Na to laipotowe-Na. 7 Habana hante kamate Kristus laitolohi-Natamo Alatala. Batuana, laiampuni-Nami Alatala doha-dohata, apa nelabi mpuu kabohe towe-Na 8 to laiwaika-Nata hante humawee noto bo kataualua-Na. 9 Apa laipakarawaka-Natamo patuju rara-Na to ilodo laipopalerui-Na hi manuhia. Nagoe rara Alatala pade mingki-'I mampakarawa patuju rara-Na ee. Laipakatantu-Na ami ane patuju rara-Na ee Napakadupa Kristus. 10 Eimile patuju rara-Na bona ane marata tempona, hangu hangaa to naria i huruga bo to naria i dunia Napahangu i rara Kristus to nawali woo lako humaweena ee.
11 Alatala nobabei hangu hangaa nantuku dota-Na pade pobotuhi-Na moto. Lako pamulana laipelihi-Na amitamo apa to ipodota-Na kita mawali todea-Na habana nohangu rarata hante Kristus. 12 Bona kami to Yahudi to noilodomo kami nampaharumaka Kristus, mampaune Alatala to laipemabohe. 13 Komi mui nawali todea Alatalamo komi apa laiepemimi Kareba Belo to nakono, hampena neparahayamo komi hi Yesus Kristus pade laipakahalama-Namo komi. Etu pade komi mui laiwaika Alatala Inoha to Nagaha to laitipa-Na halaku tanda ane komi etu todea-Na. 14 Alatala nampawaikata Inoha to Nagaha nampakaroho tipa-Na hi kita bona mamala taparahaya mpuu napa to laitipaka-Nata kana tatarima, duuna marata tempona Alatala mampatolohi todea-Na. Etumo, maitamo mampaune Alatala to laipemabohe.
Hambaya bona rawaika noto mangincani Alatala
15 Etumo, hangka laiepeku peparahayami hi Pue Yesus pade towemi hi humawee todea Alatala, 16 moma'a nentuu nosukuru hi Alatala. Lailingaku moto oa komi i rara hambayaku. 17 Laiperapiku hi Alatala Tuama to laipemabohe, to laisombaa Pueta Yesus Kristus, bona Nawaika komi Inoha to Nagaha to mampawaika komi noto pade mampakarawa Alatala hi komi bona mincani mpuu-'I. 18 Laiperapiku mui, Napakabaa rarami bona mincani napa to mamala miharumaka hi Alatala to nangkio komi, mincani mui ane neliu mpuu kadea rahi to nabelo to laipahadia Alatala hi todea-Na, 19 pade mincani mui ane nabohe mpuu baraka-Na to laipake-Na hi kita to neparahaya. Baraka ee mai roho Alatala to moma naria hibalina. 20 Hante baraka eemi Alatala nampakatuwu nculi Yesus lako lentongora to mate pade nampoponcuna-'I mali pangkana-Na i huruga. 21 Baraka Kristus ee mai nelabipi kabohena lako humawee baraka to poparenta, baraka pue ntanina, baraka to laipue manuhia, bo baraka to laipokaeka manuhia, moma wuwu i dunia ei, i dunia to marata mui mei. 22 Humaweena laipakatundu Alatala hi Kristus, pade Kristus laiongko-Na nawali woo jumaa bo to noparenta humaweena. 23 Jumaa eemi woto Kristus to laipakagana-Na. Hia muimi to nampakagana hangu hangaa to naria i langi bo i dunia.