Timotius nantuku Paulus pade Silas
16
1 Paulus nopadola pomakoana rau i Derbe pade napoladi rau i Listra. I Listra, naria hadua to neparahaya hi Yesus to laikahangai Timotius. Tinana to Yahudi pade neparahayami hi Yesus, naupawee tuamana to Yunani. 2 Ompi-ompi to hangu kaparahayaa i Listra bo i Ikonium nanguli ane Timotius ee tauna to nabelo. 3 Mingki'i Paulus bona Timotius mampodohe'i rara pomakoana. Etu pade laipopetinina Timotius bona ratarimara'i to Yahudi, apa humawee to Yahudi i ngata ee laincanira ane tuama Timotius ee to Yunani to momara nopatini anara.4 Butu ngata to laikarataira, laiparatara humawee atura to laibotuhira rasul pade penatua tempora nolibu i Yerusalem. Laipatudura tauna to neparahaya hi Yesus bona humawee atura ee raturuhira. 5 Iweemi hampena peparahayara jumaa i butu ngata narohoki. Pade butu eona nantambaiki kadeara to neparahaya hi Yesus.
Paulus nedipo rau i Makedonia
6 Paulus hante dohe-dohena nopadola pomakoara nantara Frigia pade Galatia, apa Inoha to Nagaha moma nampawaira loga mangkarebai lolita Pue i propinsi Asia. 7 Karatara i Misia, laipehobara nehua propinsi Bitinia, naupawee momara laipaliu Inoha to Nagaha lako Yesus. 8 Aji, laitarara Misia kapopola rau i Troas. 9 Ngkawengiana ee, naria pehiloa Paulus. Rara pehiloana, lainaana hadua tauna to Makedonia nokangkore i tingoona nerapi tulungi, iulina, “Pedipomo komi tumai Makedonia mantulungi kami.”
10 Napu Paulus nampanaa pehiloa ee, nahadiamo kami rau i Makedonia. Apa laincani kami mpuu ane kami laikio Alatala mangkarebai Kareba Belo hi hira to Makedonia. 11 Laipalahi kami Troas, nokapala tahi kami rau i lewuto Samotrake, kanailena nedipo kami rau Neapolis. 12 Lako i hee, rau kami i Filipi, ngata pamulana i Makedonia. Tauna to no'oha i ngata Filipi ee mai, todea Roma. Bahangkua eo kami no'oha i ngata ee.
Lidia neparahaya hi Yesus
13 I eo Pentuua to Yahudi, nehuwumo kami lako womo pehuaa rara ngata. Rau kami i wiwi ue, apa laipekiri kami i hee naria pohambayaara to Yahudi. Noncunamo kami pade nojarita hante bahangkua dua bangkele to nahiromu i hee. 14 I hee naria hadua bangkele to moma Yahudi lako ngata Tiatira, hangana Lidia. Bago Lidia ee mai nobalu kae to naungu to nahuli olina. Hia ee to nepue hi Alatala. Pue nobea rarana hampena laitarimana patudu Paulus. 15 Lidia hante humawee tauna to i rara houna laidiu. Napura laidiu, laibawaina kami rau houna, iulina, “Ane mpuu-mpuu iulimi aku ei to neparahaya hi Pue, kitamo rau i houku.” Laipewukuna mpuu kami hampena rau kami i houna.
Paulus pade Silas laitarungku i Filipi
16 Hangkani tempo, karau kami i pohambayaa i wiwi ue ee, laipotomu kami hadua batua bangkele. Hia ee laipehua anudaa hampe namala laitowana dala katuwu tauna. Hante bagona notowa ee, nadea mpuu kauntuara to nampobatua'i. 17 Bangkele ee nantuku dola Paulus hante kami pade nongare'i nanguli, “Tauna eira batua Alatala to i Lolona! Tumaira mangkewoka komi bewa dalana bona mahalama komi.” 18 Eo-eona'i nongare oa ewa ee. Alaana naohami Paulus nangepe'i, hampegoli hia, laipeilina bangkele ee pade iulikana anudaa to nampehuai bangkele ee, “Hante baraka Yesus Kristus ku'ulikako, pehuwuko lako bangkele ei.” Tempo ee mui nehuwumi anudaa ee lako bangkele ee.
19 Hangka laihilora to nampobatua bangkele ee napa to nadupa lauria, narontomi harumakaara mamparata doi. Raura nampahoko Paulus hante Silas pade laidiira rau i lentongo ngata mantingohi to poparenta. 20 Paulus pade Silas laikenira i tingoo to poparenta Roma to noparenta i ngata ee pade iulira, “Hira ei mai to Yahudi. Tumaira hei nampopogeho ngatata. 21 Laipatudura tauna mantuku ada to laipetagii ada ngatata. Kita ei todea Roma, momata mamala mantarima ba mantuku ada ewa ee.”
22 Todea to naria i hee mui nampadulu kadungkuira. To poparenta ngata ee nampahia waru Paulus bo Silas duuna naloncu pade nantudu tauna nampawebara. 23 Nadea ngkanirapa laiweba, laipahuaramo i rara tarungku. To poparenta ngata ee nantudu kapala to nampodoo tarungku bona rapodoo mpuura. 24 Nantuku parenta ee, kapala to nampodoo tarungku ee nopatuhura i rara kamara tarungku to lentongona, pade laibalangkuna.
25 Ba maria ntongo bengi, Paulus pade Silas nohambaya pade noulia nampaune Alatala. To laitarungku ntanina nangepera nohambaya pade noulia. 26 Ngkali naratami linu to neliu kabohena hampena pondasi tarungku ee nolengka. Humawee womo tarungku natebea pade rante to nampahilu tauna to laitarungku eera mai nadepa. 27 Natepemata'i kapala to nampodoo tarungku ee, pade laihilona womo tarungku ee natebea purami. Laiwutuna tonona madota mekahunca, apa pekirina to laitarungku ee netibo puraramo. 28 Naupawee Paulus nampangarehi'i, “Nemoko mekahunca! Ei moto pura kami!”
29 Laiperapina kapala to nampodoo tarungku ee poindo pade nokumeno'i rau i rarana. Nokaridi'i notingkodu i tingoo Paulus pade Silas. 30 Laikeninara rau i hawalikuna pade iulikanara, “Tuama-tuama, napa to kana kubabei bona mahalama'a?”
31 Nehonora Paulus pade Silas, “Peparahayamoko hi Pue Yesus bona mahalamako, iko pade humawee to i rara houmu!” 32 Lauparia, Paulus pade Silas nopandola lolita Pue hi kapala to nampodoo tarungku pade humawee to i rara houna. 33 Ntongo bengi ee mui, kapala to nampodoo tarungku ee nangkenira rau napakagahaka wehora. Pade tempo ee mui, hia pade humawee to i rara houna nampopewai wotora laidiu. 34 Napu ee, to nampodoo tarungku ee nangkeni Paulus pade Silas rau i houna pade laipahadiakanara pangkoni. Nagoe mpuu kapala to nampodoo tarungku pade humaweera to i rara houna ee, apa neparahayaramo hi Alatala.
35 Hampepulona, to poparenta i ngata ee nantudu ana buara rau i tarungku mangulika kapala to nampodoo tarungku, “Bakaharamo tauna etu.”
36 Kapala to nampodoo tarungku ee nangkewoka Paulus, iulina, “Naria parenta lako to poparenta ngata bona rabakahamo komi. Mamalamo komi mehuwu. Aji, peongko belomo komi.”
37 Naupawee Paulus nangulikara to laitudu ee, “Kami ei todea Roma. Poma kami laibotuhi, laiwebamo kami i tingoo todea pade laipahua rara tarungku. Welau ei rapopehuwu bongomo kami! Moma kami madota! Tudura to poparenta ngata etu tumai mobakaha kami.”
38 To laitudu eera mai noparata jarita Paulus lauria hi to poparenta ngata. Hangka laiepera ane Paulus pade Silas ee todea Roma, naekaramo natuntu nculi Paulus. 39 Alaana rauramo nangaku hala hi Paulus pade Silas, pade laibawaramo nehuwu lako tarungku pade laiperapira bona mehuwuramo Paulus pade Silas lako ngata ee.
40 Pehuwura Paulus pade Silas lako tarungku ee, rauramo i hou Lidia. I riara nampotomuka pade nampakaroho rarara ompi-ompi to hangu kaparahayaa. Napu ee neongkoramo Paulus pade Silas lako i ngata ee.