Pogehoa i Tesalonika
17
1 Paulus pade Silas nopadola pomakoara nantara Amfipolis pade Apolonia duu narata i Tesalonika. I hee naria hou pepuea to Yahudi. 2 Ewa biaha, raumi Paulus i hou pepuea ee. Tolu ngkani eo Pentuua nonetuku-tuku, laipojaritana ihi Buku to Nagaha hante tauna to naria i hee. 3 Hante ihi Buku to Nagaha, laipandolana pade laipakarawana ane Magau to Pepakahalama to laitipa Alatala kana maheha pade matuwu nculi-'I lako kamatea. Iulina, “Yesus to laikarebaiku eimile Magau to Pepakahalama to laitipa Alatala.” 4 Bahangkua duara to Yahudi neparahaya pade nantuku Paulus pade Silas. Wetu moto mui habagia bohe to moma Yahudi to nepue hi Alatala pade bangkele to laibila i rara ngata ee nadeara to neparahaya pade nantuku Paulus bo Silas.5 Naupawee, nohirira to Yahudi. Laikiora tauna to nadaa ingkura to nolalako i pasar, laipahiromura mampopogeho ngata ee. Laipopogehora ngata ee pade rau namperumata hou tauna to neparahaya to laikahangai Yason nampali Paulus pade Silas apa mingkira mangkeni Paulus pade Silas i tingoo todea bona rapareha. 6 Hangka moma laihumara Paulus pade Silas, laidiira Yason hante bahangkua dua ompi to hangu kaparahayaa rau i tingoora to poparenta i rara ngata ee. Nongarera nanguli, “Tauna to nampopogeho humangkulili dunia narataramo mampopogeho ngatata. 7 Laitarimanara Yason no'oha i houna. Laitibokira atura Magau Bohe Romaa apa iulira naria muidipi magau ntanina to laikahangai Yesus.” 8 Nangepe humawee lauria, nawali nokalihera todea bo to poparenta ngata ee. 9 To poparenta eera mai nampopowaya Yason pade dohe-dohena, napu ee pade laibakaharada.
Paulus pade Silas i Berea
10 Ngkawengia ee mui, ompi-ompi to hangu kaparahayaa i rara ngata ee nantudu Paulus pade Silas rau i ngata Berea. Karatara ria, rauramo Paulus hante Silas i hou pepuea to Yahudi. 11 Nabelopi pampekirira to Yahudi i Berea lako to Yahudi to i Tesalonika. Laitarimara lolita Pue hante goe rarara pade butu eonara nampegurui Buku to Nagaha bona rancanira mpuu kakono patudu Paulus. 12 Nadeara neparahaya hi Yesus. Moma mui hodi to moma Yahudi to laibila i rara ngata ee neparahaya, belo bangkele, belo mui balailo.
13 Hangka to Yahudi i Tesalonika nangepe kareba ane Paulus nangkarebai lolita Alatala i Berea, naratara nopaukei pade nampopokalihe tauna i ria. 14 Pari-parira bahangkua dua ompi to hangu kaparahayaa i Berea ee nampabawa Paulus rau i talinti. Bo Silas pade Timotius naboli i ngata ee motora. 15 Napurapa nampabawa Paulus rau Atena, nanculiramo tauna to neparahaya hi Yesus ee rau i Berea nangkeni peboha Paulus bona mahomira Silas pade Timotius mantuku'i.
Paulus i Atena
16 Hamalina Paulus nampopea Silas pade Timotius i Atena, najuu rarana nampahilo ngata ee naponu hante patung-patung to laipuera. 17 Etu pade i hou pepuea to Yahudi, Paulus nampotutura nangkambelai Yesus hante to Yahudi bo to moma Yahudi to nepue hi Alatala. Iwee moto mui i pasar, eo-eona'i nampotutura nangkambelai Yesus hante tau-tauna to naria i hee.
18 Guru-guru to nopatudu patudu Epikuros pade to nopatudu patudu Stoa nampomehonoka'i. Bahangkua duara nanguli, “Napa muihawo iuli tauna ei? Moma napa incanina, nadea muihawo jaritana.” To ntanina mui nanguli, “Hia ei hadua to nangkeni patudu dewa lako ngata ntanina.” Laipojaritara iwee apa Paulus nangkarebai nangkambelai Yesus pade katuwu nculi lako kamatea.
19 Lauparia, laikenira'i rau i tingoo polibua Areopagus. I ria iulikara'i, “Mingki kincani patudu bou to laikenimu. 20 Apa laipaepeimu kami hangu hangaa to moma nehua akala. Etu pade mingki kincani batuana.” 21 Apa humawee to Atena bo to rata i ngata ee, moma naria ntanina to laipokonora hamata mampojarita pade mangepe hangu hangaa to nabou.
22 Tempo ee Paulus nokangkore i tingoora todea to narata i polibua Areopagus ee. Nojaritami Paulus, iulina, “Epe komi to Atena! Laihiloku naroho mpuu petukuami. 23 Apa tempoku nomako-mako rara ngatami pade nampanaa rewa-rewa to laipepuemi, naria mui lairataku hangu pojujua kurban to laitulihi wei, ‘HI PUE TO MOMA LAINCANI.’ Bona mincani, Pue to laipepuemi bo moma laincanimi etumile to kukarebaika komi. 24 Hiamile Alatala to nopajadi dunia hante humawee ihina. Hiamile Pue langi bo tana. Hia ee moma-'I natida i rara hou pepuea to laibabei mpale manuhia, 25 pade moma paraluu-Na petulungia lako manuhia, apa Hiami to nampawaika humawee manuhia inoha pade katuwua hante hangu hangaa i dunia ei. 26 Lako hadua manuhia laibabei-Na humawee manuhia bona mampo'ohai humangkulili dunia ei. Hia moto mui to nopatantui lako pamulana bulauma pade rimara matuwu. 27 Alatala nobabei ewa ee bona rapalira-'I. Baka rahumara-'I ane rapalira-'I, naupa Alatala ee moma-'I na'awa lako kita butu-butu duana. 28 Ewa to iuli tauna iwei, ‘Natuwuta bo nokagenota pade nariata i dunia ei habana baraka-Na.’ Nahibali mui hante to itulihi bahangkua dua lako hi komi to nataualu notulihi ulia. Iulira, ‘Kita ei ana Alatala.’
29 Aji, apa kita ana Alatala, moma mamala Alatala ee tapahibali hante parewa to moma natuwu ewa bulawa ba halaka ba watu to laibabei nantuku kataualu manuhia. 30 Momami lailinga-Na Alatala kadoyoata to naliu. Naupawee laitudu-Na humawee manuhia i rima-rima mancoro lako dohara. 31 Apa laipakatantu-Nami loga mampabotuhi ingku humawee manuhia i dunia hante moma mantomo hamika. Pobotuhia ee mai Napobago hadua to laipelihi Alatala. Tauna ee laipakatuwu nculi Alatala lako kamatea-Na bona humawee tauna mamparahaya ane Hiami to laipelihi.”
32 Hangka laiepera tauna to naria i hee nangkambelai katuwu nculi hadua Tauna lako kamatea-Na, nariara to nampopore Paulus. Naria muira to ntanina nanguli, “Maria tempona, mingki kiepedapako mojarita nangkambelai lauria.” 33 Napu ee, palahinaramo Paulus. 34 Naupawee, nariara to nopahamika hi Paulus pade neparahaya hi Yesus. Hira ee mai Dionisius hadua lako polibua Areopagus pade hadua bangkele to laikahangai Damaris, pade naria muiradapa to ntanina.