Libu i Yerusalem
15
1 Naria bahangkua dua to Yahudi lako Yudea to neparahaya hi Yesus rau i Antiokhia. To Yahudi eera mai nopatudu ompi-ompi to hangu kaparahayaa i Antiokhia iwei, “Ane moma komi ratini mantuku patudu Musa, moma komi rapakahalama.” 2 Naupawee, Paulus hante Barnabas moma laiodera nampaewa bo nampabili patudura ee mai. Lauparia jumaa nantudora Paulus hante Barnabas pade bahangkua dua to ntanina lako Antiokhia rau mampojarita humawee lauria hi humawee rasul pade penatua to i Yerusalem. 3 Jumaa nampabawara duu hawaliku ngata. Lauparia, rauramo nantara ngata-ngata i Fenisia pade i Samaria. I ria, laipotuturarami hi ompi-ompi to hangu kaparahayaa bewara tauna to moma Yahudi negoli lako kaparahayaara to moma nakono nawali neparahaya hi Yesus. Kareba ee mai nampakagoe rarara humawee ompi to hangu kaparahayaa i hee.4 Karatara i Yerusalem, hira ee laipotomu jumaa hante humawee rasul bo penatua. Laipotuturarami bewa Alatala nampakera nobabei hangu hangaa.
5 Naupawee, nokangkoreramo bahangkua dua to Farisi to neparahayaramo pade nanguli, “Tauna to moma Yahudi etu kana ratini pade kana ratukura patudu Taurat to laitulihi Musa.”
6 Lauparia, noliburamo rasul bo penatua mampojarita lauria. 7 Nahae mpuura nonehula pekiri. Kahuduana, nokangkoremi Petrus pade nanguli, “Ompi-ompiku, ncanimi moto ane lako ilodo Alatala nampelihi'a lako hi komi mangkarebai Kareba Belo hi tauna to moma Yahudi bona raepera muihawo Kareba Belo pade raparahayara. 8 Alatala to nangincani rara manuhia, nantarimara tauna to moma Yahudi. Laincanita lauria apa laiwai-Naramo Inoha to Nagaha nahibali hante to laiwaika-Nata. 9 Momata laipopontani-Na hante hira. Laipakagaha-Na rarara apa neparahayara hi Kristus. 10 Napa pade moma laitarimami dota Alatala pade laipahurumira tauna to neparahaya hi Yesus ee mantuku patudu Taurat to nampakahehara? Bo tumpulokota pade kita moto moma bukuta nampoingkuka patudu Taurat ee mai. 11 Kakonona moma iwee! Laiparahayata ane kita ei laipakahalama habana kabohe towe Pue Yesus. Wetu moto mui hira.”
12 Nalino pura tauna to nolibu ee nangepe Barnabas hante Paulus nampotutura nculi nangkambelai humawee tanda pade to nepakahera to laibabei Alatala nampakera Barnabas pade Paulus bulara nangkarebai Kareba Belo hi tauna to moma Yahudi. 13 Nahudurapa nojarita, Yakobus nanguli, “Ompi-ompiku, epe'a olu. 14 Laiepetami napa to iuli Simon bewa pamulana Alatala nampopahiloi towe-Na hi tauna to moma Yahudi. Laipelihi-Na tauna to Napajadi todea-Na lako lentongora tauna to moma Yahudi. 15 Etu mai nahibali hante peboha Alatala to laitulihira nabi iwei,
16 ‘Napu ee marata nculi-'A
mopatuna nculi poparentaa Magau Daud to ewa hou to nagero,
kageroana ee Kupakabeloki
pade Kupakarohoki nculi,
17 bona humawee tauna to naboli ee mampali Pue,
hante humawee tauna to moma Yahudi to laikio-Ku mawali todea-Ku.’
Laumiria to laiuli Pue to nobabei humaweena lauria,
18 to laikewoka-Natamo lako owi.
19 Aji, mantuku pekiriku, nemo tapakahehara tauna to moma Yahudi to negoli hi Alatala. 20 Naupawee kana tatulihikara hura pade tapatudura bona nemora mangkoni pangkoni to laijuju hi pue ntanina. Nemora mogau hala. Nemora mangkoni ihi binata to namate laibaga. Nemora mangkoni raa. 21 Apa lako lodomi patudu Taurat to laitulihi Musa laiepera laikarebai i butu ngata, pade laibaha butu eo Pentuua i butu hou pepuea to Yahudi.”
Hura rau hi tauna to moma Yahudi
22 Nahudupi Yakobus nojarita, rasul bo penatua pade humawee jumaa nobotuhi bona rapelihi bahangkua dua tauna ratudu rau i Antiokhia mampodohe Paulus pade Barnabas. Lauparia, laipelihirami Silas pade Yudas to laikahangai mui Barsabas. Hira ei tauna to laibilara ompi-ompi to hangu kaparahayaa i Yerusalem. 23 Hira ee laiwaika hura to monina iwei,
“Lako hi kami ompi-ompimi rasul pade penatua.
Tabe hi komi ompi-ompi kami to moma Yahudi to no'oha i Antiokhia, i Siria pade i Kilikia.
24 Laiepe kami naria bahangkua dua dohe kami tulau nampakaheha bo nampakaingu rarami hante patudura, bo momara laitudu kami. 25 Etu pade nolibumo kami pade nahintuwu kami nampelihi bahangkua dua tauna pade nantudura tulau hi komi rapodohera ompita to laipotowe kami Barnabas pade Paulus. 26 Hira ei mai tauna to moma nampotowe tuwura. Nau rapatehira, batena motora nampobagoka Pueta Yesus Kristus. 27 Laitudu kamiramo Yudas pade Silas tulau mangulika komi nangkambelai kareba to laitulihi i rara hura ei. 28 Laibotuhi-Nami Inoha to Nagaha, bo kami mui nobotuhi, bona nemo komi rawaika atura-atura to nantomo gaga, wuwu bahangkua ngaa ei aga: 29 Nemo mangkoni napa to laikeni nepue hi pue ntanina, nemo mangkoni raa, nemo mangkoni ihi binata to namate laibaga, pade nemo mogau hala. Ane mipoingkukadimi patudu ei, nakonomi. Hudu heimi olu hura kami ei.”
30 Napu nehabi, neongkoramo to laitudu ee rau i Antiokhia. Karatara i ria, laipahiromurami humawee jumaa pade laipopewairami hura ee. 31 Hangka laibaharapi jumaa hura ee, nagoe mpuura habana hura ee nampakasana rarara. 32 Yudas pade Silas ee nabi. Nadea ngaa to laiulira hi ompi-ompi to hangu kaparahayaa i Antiokhia, nampakaroho peparahayara pade nampakasana rarara. 33 Maria bahangkuapi kahaera no'oha i Antiokhia. Napu ee, ompi-ompi to hangu kaparahayaa i Antiokhia ee nampopeongko belora manculi rau hi hira to nantudura. [ 34 Naupawee Silas mingki mo'oha i heedipi.]
Pomehalapaha Paulus pade Barnabas
35 Nahaeradapa Paulus hante Barnabas no'oha i Antiokhia. Hira hante nadea dohera to ntanina nopatudu bo nangkarebai lolita Pue.
36 Napu ee, Paulus nangulika Barnabas, “Kitamo manculiki rau hi ompi-ompi to hangu kaparahayaa i humawee ngata pokarebaiata lolita Pue bona tahilo bewa ka'adaara.” 37 Barnabas mingki mampabawai i Yohanes to laikio mui Markus. 38 Naupawee, Paulus moma'i nadota mampabawai Markus apa laipalahinara wei i Pamfilia pade moma'i nadota nobago dohera. 39 Lako hee nonehonoramo Paulus hante Barnabas. Alaana nogaaramo. Barnabas nampabawai Markus nencawi kapala tahi rau Siprus, 40 bo Paulus nampelihi Silas laipodohena. Ompi-ompi to hangu kaparahayaa i Antiokhia nampahambayanira bona kabohe towe Alatala mampodohera rara pomakoara. 41 Napu ee neongkoramo Paulus pade Silas nampehaniki ngata-ngata i propinsi Siria pade Kilikia, nampakaroho peparahayara humawee jumaa.