Paulus pade Barnabas i ngata Ikonium, Listra pade Derbe
14
1 Napa to laibabeira Paulus hante Barnabas i ngata Antiokhia laibabeira mui ewa ee i ngata Ikonium. Nehuara rara hou pepuea to Yahudi pade nopatudu hampena nadea to Yahudi bo to moma Yahudi nawali neparahaya hi Yesus. 2 Naupawee tau-tauna to Yahudi to moma nantarima napa to laiulira rasul ee, nampaukeira tauna to moma Yahudi to moma neparahaya hampena hira ee mai nampodaara to neparahaya hi Yesus. 3 Nahaera Paulus pade Barnabas no'oha i Ikonium pade momara naeka nopatudu nangkambelai Pue. Pue nampawaikara rasul ee baraka nobabei tanda-tanda pade to nepakahera, nampopahiloi ane kareba nangkambelai kabohe towe-Na mpuu-mpuu nakono. 4 Alaana todea i ngata Ikonium ee mai natebagi. Nariara to nopahamika hi to Yahudi, naria muira to nopahamika hi rodua rasul ee. 5 Lauparia tauna to moma Yahudi hante to Yahudi pade to pangkeni-to pangkenira nampoliwoi mampaduahi rasul-rasul ee mai pade mampawunura hante watu. 6 Naupawee laincanira rasul ee mai napa to laipoliwoira. Alaana rasul eera netibo rau ngata-ngata i Likaonia. Karatara i ria, raura i ngata Listra, Derbe pade ngata-ngata ntanina to nonehumpii. 7 I butu ngata eera nangkarebai Kareba Belo.8 I ngata Listra naria hadua balailo to noncuna aga apa nalente paana pade napungku hinungkaina laiote. Poma'i naria nomako. 9 Tauna ee nangepe Paulus nopatudu. Paulus nampenoto'i pade laihilona tauna ee mai mamala'i rapakauri apa neparahaya'i. 10 Napu ee Paulus nangulika'i hante nahimuku, “Pokangkoreko, pakanoro!” Tauna ee mai nekawantu nokangkore pade nopamulami nomako.
11 Todea to nampahilo napa to laibabei Paulus ee mai nongare rara baha Likaonia, iulira, “Nehomporamo dewa ewa tari manuhia!” 12 Barnabas laiulira dewa Zeus pade Paulus laiulira dewa Hermes apa hia koro to pojarita.a 13 Moma na'awa lako ngata Listra ee mai naria hou pepuea hi dewa Zeus. To pangkeni i hou pepuea hi dewa Zeus ee mai narata nangkeni bahangkua maa japi tuama pade bunga-bunga rau i womo pehuaa rara ngata. To pangkeni ee mai hante todea to i hee mingki mohamale japi tuama to laikenira ee halaku pepuera hi Barnabas pade Paulus.
14 Pangepera Barnabas pade Paulus napa to rababeira todea rara ngata ee mai, laihiara warura nampahiloi ane momara nahituju hante dotara todea ee, pade nokumenoramo rau lentongo todea ee mai, nongare iulira, 15 “Tuama-tuama, napa pade iwei babeimi? Kami ei manuhia biaha moto, nahibali hante komi. Narata kami i hei nangkeni Kareba Belo hi komi, bona mipalahimi kabiahaami to moma naria bununa ee pade megolimo komi mepue hi Alatala to natuwu, to nopajadi langi bo dunia, tahi hante humawee ihina. 16 Owi, Alatala nampalele manuhia i butu ngata i humangkulili dunia mantuku dotara moto. 17 Naupawee moma-'I naria nentuu nampopewai tanda ane mpuu-mpuu naria-'I. Tanda to laipopahiloi-Na ee mai, ingku belo-Na. Laiwaika-Na komi uda lako langi pade wua kau tempo powuaana. Laiwaika-Na komi pangkonimi pade laipakagoe-Na rarami.” 18 Naupa laiulira iwee, ke nono moma rabukura rasul ee mampatanee todea mampopewai kurban hi hira.
19 Poma nahae lako ee narataramo to Yahudi lako Antiokhia pade lako Ikonium nampalanaira todea i hee mantukura. Napu ee Paulus laiwunura hante watu pade laibinincairami rau hawaliku ngata apa laiulira namatemi. 20 Naupawee bulara tauna to neparahaya hi Yesus nokangkore nampalilikohi'i, nematami Paulus pade rau nehua rara ngata. Kanailena neongkomi Paulus nodohe hante Barnabas rau i Derbe.
Paulus pade Barnabas nanculi i ngata Antiokhia i Siria
21 Paulus pade Barnabas nangkarebai Kareba Belo i Derbe hampena nadea tauna neparahaya hi Yesus. Napu ee nanculikiramo rau i Listra, rau i Ikonium, kahuduana raura i Antiokhia. 22 I butu ngata ee mai Paulus pade Barnabas nampakaroho rarara to neparahaya hi Yesus pade nopatudura bona maroho moto peparahayara. Paulus pade Barnabas mui nangulikara iwei, “Ane mingkita mehua rara poparentaa Alatala, kana takolo olu madea kahehaa.” 23 I butu jumaa, rasul-rasul ee mai nampaongko penatua-penatua. Nohambaya pade nopuahara rasul ee nerapi hi Pue bona Napodohe motora penatua ee, apa Pue moto to laiparahayara. 24 Napu ee Paulus pade Barnabas nopadola pomakoara rau i humangkulili Pisidia duuna naratara i Pamfilia. 25 I ngata Perga to i Pamfilia, Paulus pade Barnabas nangkarebai lolita Pue. Napu ee rauramo i ngata Atalia to i wiwi tahi.
26 Lako Atalia, neongkora rau Antiokhia nencawi kapala tahi. I Antiokhia eeramo wengi Barnabas pade Paulus pamulana laihambayani jumaa bona Napotowe bo Napodohera Alatala mampobago bago mangkeni Kareba Belo to nahudumi laipobagora. 27 Karatara Paulus pade Barnabas i Antiokhia, laikiora humawee jumaa mahiromu, pade laituturara humawee to laibabei Alatala rara pomakoara. Laituturara mui ane Alatala nobeakara to moma Yahudi dala, bona mamalara meparahaya hi Yesus. 28 Nahaera Paulus pade Barnabas no'oha dohera jumaa i Antiokhia ee mai.