Mainga mopea karata Pue
5
1 Ompi-ompi, nangkambelai bulauma tariina karata Pue, momamo komi kitulihika, 2 apa laincanimi amimi ane eo karata Pue ee ewa to pangio ngkawengia. 3 Ane maria mei tauna manguli, “Humaweena na'ama pade nanone moto,” ngkali madupa hi hira kapepaa bohe, ewa bangkele to nantodokaha noana to ngkali nadua taina. Natantu amimi moma hema haduaa mamala mahalama!4 Naupawee, komi ompi-ompi moma komi natuwu rara kalimaua. Aji moma komi makonce ane tempona ee mai marata ewa to pangio. 5 Apa humaweemi natuwu noingku belo pade nagaha ewa to natuwu rara kabaana. Momata natuwu noingku daa ewa to natuwu rara kalimauana. 6 Etumo, nemota moturu moto ewa tau ntanina. Naupawee kana mainga moto oata pade tapakanoto rarata. 7 Apa to poturu noturu ngkawengia. Wee mui to panginu nalangu ngkawengia. 8 Aji, kita to natuwu rara kabaana, tapakanoto rarata. Meparahaya dola motota hi Alatala pade mampotowe tau ntanina. Parahayami Napakahalama motota Alatala. Eimi kaliawota mampaewa Magau Heta. 9 Apa Alatala nampelihita moma bona rahukuta, naupawee laipelihi-Nata bona Napakahalamata Yesus Kristus Pueta. 10 Hia namate habana kita bona tempo-Na marata mei, ba matuwutadapa ba momamo, mamalata matuwu dohe-Na. 11 Etumo, momehuko moto komi pade momepakaroho rarami ewa to laipoingkukami amimi.
Patudu to kahuduana
12 Kiperapi hi komi ompi-ompi, mibilara tauna to nampobagoka komi, to nangkeni komi i rara dala Pue pade nopatudu komi. 13 Bila pade potowe mpuura habana bagora ee mai. Matuwu mohingkabelo komi hadua bo hadua. 14 Kiperapi mui hi komi ompi-ompi, bona miulika belora to nalohe nobago; pakaroho rarara to naeka; tulungira to mahipato ratulungi pade mohabara komi hi humawee tauna. 15 Hilo belo, nemo maria to mobalahi ingku to nadaa hante ingku to nadaa. Pehimukui oa mobabei to nabelo hi hadua bo hadua pade hi humawee tauna. 16 Magoe dola moto komi, 17 pade nemo mikaohai mohambaya. 18 Rara humawee ka'adaami, mosukuru moto oa komi, apa eemi to laipodota Alatala lako hi komi to nohangu rara hante Kristus Yesus. 19 Nemo milawa bago Inoha to Nagaha, 20 pade nemo mihauru humawee peboha Alatala to laiparatara nabi. 21 Naupawee, hangu hangaana kana mitimba belo, to nabelo aga mituku. 22 Pade nemo komi mobabei ingku to nadaa.
Tabe kahuduana
23 Mohambaya kami bona Alatala puu katuwu to nanone mampakagaha komi hampena mpuu-mpuu komi mawali todea Alatala to nagaha. Pade mohambaya mui kami bona Alatala mampodoo inohami, tuwumi bo wotomi, bona moma komi makahalaia tempo karata nculi Yesus Kristus Pueta. 24 Alatala to nangkio komi ee mamala raparahaya. Kana Nababei napa to laitipaka-Na komi. 25 Kiperapi hi komi ompi-ompi, hambayani kami. 26 Ulikara ompi-ompita, tabe lako hi kami hante towe kami. 27 Rara hanga Pue, mpuu-mpuu kuperapi bona hura ei mai rabahakara humawee ompita to hangu kaparahayaa. 28 Mohambaya'a bona hante kabohe towe-Na, Napodohe moto dola komi Pueta Yesus Kristus.