Hura Paulus rau hi Jumaa i Kolose
Tabe
1
1 Lako Paulus, to laipelihi Alatala nawali rasul Kristus Yesus, pade lako Timotius ompita. 2 Hura ei laipakatu kami hi komi ompi-ompi humawee, todea Alatala to namparahaya Kristus i Kolose. Mohambaya kami bona kabohe towe pade katuwu to nanone lako Alatala Tuamata mampodohe komi.Posukuru pade hambaya
3 Nosukuru oa kami hi Alatala, Tuama Pueta Yesus Kristus, butu ngkanina kami nohambayani komi, 4 habana laiepe kamimi nangkambelai peparahayami hi Kristus Yesus pade nangkambelai towemi hi humawee todea Alatala. 5 Neparahaya komi pade nadea towemi hi todea Alatala habana laiharumakami napa to laipahadiakana komi Alatala i huruga. Laiepemimi nangkambelai humawee lauria hinungkai Kareba Belo to nakono laikewoka komi. 6 Kareba Belo ee mai notolele i humangkulili dunia, pade natetambai dola kadea tauna to neparahaya hampena ingkura nobali. Iwee moto mui hante komi, hinungkai pangepemi kabohe towe Alatala to mpuu-mpuu laipairarami, neparahayamo komi hi Yesus pade nobalimi ingkumi. 7 Humawee lauria laiepemimi lako Epafras, dohe hampobagoa kami to laipotowe kami. Epafras ei mai batua Kristus to natigu nobago nampakaroho peparahayami. 8 Lako hi hia eimi mai laiepe kami kareba ane nonepotowe komi habana baraka Inoha to Nagaha nobago i rarami.
9 Etu pade laihambayani kami dola komi hinungkai laiepe kami kareba nangkambelai komi. Laiperapi kami bona Alatala mampawaika komi humawee noto bo kataualua lako Inoha-Na bona mengkao mpuu komi napa dota Alatala. 10 Bona mamala komi matuwu hante ingku to mahipato i tingoo Pue, pade rarana hangu hangaa komi nampakagoe rara Pue, bo mipakule mobabei nadea ngaa ingku to nabelo pade matetambaimi pencanimi hi Alatala. 11 Nohambaya kami bona Alatala mampakaroho komi hante baraka-Na to nabohe, bona matigu bo mohabara moto komi mantingohi humawee kahehaa. 12 Pade mosukuru komi hante goe rara hi Alatala Tuama, habana Hiami to nampakahipato komi mantarima napa to laipahadiaka-Na todea-Na rara poparentaa-Na to nabaaa. 13 Hiami to nobakahata lako baraka to nalimau pade nopahuata i rara poparentaa Ana-Na to laipotowe-Na. 14 Ana-Na eemi to nampatolohita. Batuana, doha-dohata laiampunimi.
Kristus koropokona lako hangu hangaa
15 Kristus ee mai tari Alatala naupa Alatala ee mai moma-'I laihilo. Kristus eemi ana ulumbua, to neliu baraka-Na lako humawee to laipajadi Alatala. 16 Apa hante nampake Kristus, Alatala nampajadi humawee to naria i huruga bo i dunia, humawee to narawa bo to moma narawa, pade humawee inoha to nabaraka bo to noparenta. Hangu hangaa laipajadi nampake Kristus bona rapemabohe-'I. 17 Kristus ee nariami kapomana hangu hangaa naria. Hiami to noaturu bo nampodoo humawee to naria lauria. 18 Jumaa mamala rarapaika woto Kristus pade Kristusmi to nawali woo jumaa.b Kristus eemi to nampawaikata katuwua. Hiami to pamulana natuwu nculi lako kamatea bona Hia mawali koropokona lako hangu hangaa. 19 Alatala moto tumpu dota hampena humawee ingku bo baraka to naria hi Hia, naria mui hi Ana-Na, pade moma naria to nakura. 20 Mingki-'I Alatala bona hangu hangaa to naria i dunia bo i huruga mohingkabelo nculi hante Hia. Pohingkabeloa ee mai laibabei-Na hante raa Kristus to natudo i kau salib halaku kurban. 21 Wee mui komi, ilodo natuwu na'awa lako Alatala. Laipodaami Alatala rara pekirimi habana ingkumi to nadaa. 22 Naupawee, hante kamate Ana-Na, Alatala nampopohingkabelo nculi komi hante Hia, bona mamala komi rakeni i tingoo Alatala hante magaha, moma makahalaia pade momami naria doha. 23 Etumo, kana maroho moto peparahayami, batena moto komi matigu pade nemo molengka. Nemo hampe mibakaha peharumaka to laiwaika komi hinungkai pangepemi Kareba Belo. Kareba Belo ee mai notolelemi i humangkuli dunia, pade aku, Paulus, hadua to nampotolele Kareba Belo ee.
Bago bo kahehaa Paulus
24 Nagoe mpuu'a nangkolo kahehaa habana namala'a nobago nantulungi komi. Hante nangkolo kahehaa ei i rara wotoku, aku nopaganai kahehaa to laipakatantuka-Na'a Kristus rara bagoku nantulungi humawee jumaa-Na to lairapaika woto-Na. 25 Alatala namparahayaka'a bago mantulungi humawee jumaa-Na ee, bona mangkewo humawee lolita Alatala hi komi. 26 Rara lolita Alatala ee mai, naria patuju-Na to ncobu mpaenami laipopalerui-Na hi manuhia. Naupawee tempo ei laikewomi hi todea-Na. 27 Apa dota Alatala Nakewokaramo todea-Na ane neliu mpuu kabelo bo kabohe patuju-Na to ilodo laipopalerui-Na, bona tau-tauna to moma Yahudi mui mangincani to laipopalerui-Na ee. To laipopalerui ee mai nangkambelai Kristus to natuwu i rarami, batuana, Kristus eemi harumakaata mamparata bagia i rara pampemabohe Alatala. 28 Kristus eimi to laikarebai kami hi humawee tauna. Humaweera laipalingai bo laipatudu kami hante noto bona mamala kami mangkenira i tingoo Alatala hante moma maria kakuraara habana nohangu rarara hante Kristus. 29 Etu pade nobago ntomo'a bo laipehimukuiku nobago hante humawee roho to laiwaikana'a Kristus, to neliu mpuu karohona nobago i rara wotoku.