Patudu nangkambelai batua
6
1 Humawee tauna to nawali batua kana mampekiri ane maradikara mahipato rabila, bona hanga Alatala pade patuduta nemo rapopore tauna. 2a Batua to nobago hi tauna to neparahaya hi Kristus nemo mampahauru maradikara naupa nahibali motora neparahaya hi Kristus. Kakonona melabiki laupi pojampangira maradikara apa maradikara to laijampangira ee ompira hangu kaparahayaa to laipotowera.Nangkambelai pomebili pade pampokono doi
2b Kana mupaguru pade mupatudura nangkambelai humaweena ei. 3 Ba hema-hema mepatudu hante patudu ntanina to moma nahibali hante patudu Pueta Yesus Kristus bo patudu to mangkenita matuwu mantuku dota Alatala, 4 tauna ee nahombo bo moma'i napa to laincanina. Bagona wuwu mampali toka pohihala pade pomehono nangkambelai batua baha-baha to mampopeumba daa rara, pomehalapaha, pomepakudaa, pomerai 5 pade pobungka to moma naria pentuuana. Batena to nadaadimi rara pekirira, momami naria to nakono. Iulira hira, mahugira ane mepuera.
6 Nakono ami nepue ee nampawaita rahi, ane lairasaita naganami napa to naria rara katuwuta. 7 Apa moma napa laikenita narata i dunia ei pade moma mui napa takeni mehuwu lako dunia ei. 8 Ane mariadimi pangkoni bo powaru, naganami. 9 Naupawee tauna to mingki mahugi nanawu i rara pehori pade natepehua rara nadea ngaa dota rara to moma naowo pade nepakahilaka. Humawee dota ee nepakaropu bo nepakahilaka. 10 Nampokono doi eemi lari nadea ngaa ingku to nadaa. Habana nodapa doi, bahangkua dua tauna nahalatara lako peparahayara pade nampakaheha wotora hante nadea ngaa to nampakadua rarara.
Peboha kahuduana
11 Naupawee, iko gagu Alatala. Nemo mpuu mupoingkuka humawee lauria. Pehimukui mobabei ingku to nakono, matigu mepue, meparahaya moto oa hi Kristus, matowe hi hingka manuhia, mohabara rara kahehaa pade kana maolu pangkenimu. 12 Pehimukui mpuu meparahaya dola hi Kristus bona mamalako mamparata katuwua to moma maria kahuduana. Apa eemile pade laikio-Nako Alatala tempomu nangaku i tingoo nadea tauna ane neparahayako hi Kristus. 13 I tingoo Alatala to nampawaika katuwua hi humawee to natuwu pade i tingoo Kristus Yesus to nanguli napa to iparahaya-Na i tingoo Pontius Pilatus, kuperapi hi iko 14 bona muturuhi parenta ei hante ingku to nagaha pade moma makahalaia duu karata nculi Pueta Yesus Kristus. 15 Eo karata-Na laipakatantu Alatala mantuku dota-Na moto. Alatala ee aga to noparenta, to mahipato raune, Magau lako humawee magau pade Pue lako humawee pue. 16 Alatala ee aga to natuwu duu kahae-haena pade to no'oha rara baa to moma hema namala nampamohuki. Moma naria haduaa manuhia to nampanaa-'I pade moma ami-'I mamala ranaa manuhia. Rapemabohemi Alatala pade moparentami duu kahae-haena. Amin.
17 Palingaira tauna to nahugi i dunia ei bona nemora mahombo pade nemora mampaharumaka to moma natantu, ewa kahugia. Alatala aga to raharumaka. Apa hante humawee kahugia-Na Alatala nampawaikata hangu hangaa to mampakasana katuwuta. 18 Palingaira bona mabelo ingkura, mabelo mpuu rarara, madoli mewai bo motira. 19 Ane wee, matepalimpuru gagu to mawali bokura to nabelo i eo ngkapurina mei bona raratara katuwua to mpuu-mpuuna.
20 Iko Timotius, jagai belo kaparahayaa to laiwaikako. Nemo mangepe jarita to moma naria bununa to moma narata lako Alatala pade nemo mampomebilii hangu hangaa to nahala, to laiulira tauna to netipande. 21 Apa naria bahangkua dua tauna nampemakono to laiulira tauna to netipande ee, alaana nahalatararamo lako kaparahayaa hi Kristus.
Mohambaya'a bona kabohe towe Alatala mampodohe komi.