Patudu nangkambelai ompi-ompi to hangu kaparahayaa
5
1 Nemoko mojarita hante hodomu hi totua, naupawee ulika belora ewa tuamamu moto. Ulika belora to nangura ewa ompimu moto, 2 bangkele-bangkele to natuaramo ewa tinamu moto, pade bangkele-bangkele to nangura ewa tuaimu moto, humaweena lauria mubabei hante kagaha raramu.Patudu nangkambelai bangkele to nabalu
3 Bila bangkele to nabalu to mpuu-mpuu natuwu haduduanadimi. 4 Naupawee ane bangkele to nabalu ee naria anana ba tumpuna, hira ee olu rapatudu mampauruhi bangkele to nabalu ee, mampabalahi belo totuara bo tumpura, apa eemi to laipomambela Alatala. 5 Naupawee koropokona to rahilora jumaa, kaparalua bangkele to nabalu to mpuu-mpuu natuwu haduduanadimi pade momami hema nampauruhi'i, wuwu nampaharumaka Alataladimi. Eona bo bengina'i nohambaya nerapi tulungi hi Alatala. 6 Naupawee, ane maria bangkele to nabalu natuwu nagoe-goe hante kasanaa dunia, tauna ee kakonona namatemi naupa natuwudipi. 7 Palingaira nangkambelai patudu lauria bona nemora matuwu makahalaia. 8 Naupawee, ane maria tauna to moma mampauruhira ompina, neparauli hira hancou, tauna ee momami neparahaya pade neliupi kadaana lako tauna to moma amira neparahaya.
9 Bangkele to nabalu to mamala ratulihi hangara rara buku bangkele to nabalu, umurura momami makura lako ono mpulu mpae pade hangkanira aga nobalailo. 10 Ilodo, laincani doo nabelo ingkura, ewa nampiara ngana, nantarima tauna narata i houra, nampajampangi ompira to neparahayaa, nantulungi tauna to naheha. Laipakera mpuu loga nobabei hangu hangaa to nabelo.
11 Nemo mitulihi hangara bangkele to nabalu to nanguraradapa. Apa ane marata mei dotara, mobalailoki nculiramo pade rapalahirami Kristus. 12 Alaana rahukuramo mei apa mantiboki tipara hi Hia. 13 Hangaa mui, rapabiahara mei malohe pade mehua-huwu hou doo aga bagora. Momara wuwu malohe, rapabiahara muipi mampotutura tauna, moumpui uruhia doo pade mampojarita to moma mahipato rauli. 14 Etu pade dotaku bangkele to nabalu to nanguraradapa kabelo-belona mobalailoki nculi, moana pade mampauruhi ihi houra bona nemo maria loga bali'ta mampakadaa hangata. 15 Apa bahangkua duaramo bangkele to nabalu nahalatara nantuku Magau Heta.
16 Ane maria hadua bangkele to neparahaya pade naria ompina to nabalu, kana natulungi bangkele to nabalu ee bona nemo mampakantomo jumaa, bona jumaa mamala mantulungira bangkele to nabalu to mpuu-mpuu natuwu haduduana.
Patudu-patudu ntanina
17 Penatua to nabelo pangkenina, mahipato'i rabila pade ratomoi, pelabina hira to nampehimukui nangkarebai lolita Alatala bo nepatudu. 18 Apa Buku to Nagaha nanguli, “Nemo migowu ngudu japi to hamalina laipopobago nantodu wuli gando,” pade “Hadua to pobago mahipato mantarima tomona.” 19 Nemo mutarima perai hi penatua ane moma rapakarohora rodua ba tolu dua habi. 20 Kana mukamaro penatua to nobabei doha i tingoo humawee tauna bona to ntanina maeka. 21 I tingoo Alatala, Kristus Yesus pade malaeka-Na to laipelihi-Na, kuboha mpuuko: Poingkuka humawee patudu ei hante moma mopahamika, pade babeimi hangu hangaa hante moma nampelihi tauna.
22 Nemo mahomi gaga mampaongko hadua tauna mawali batua Pue. Nemo mantuku to nobabei doha. Jagai wotomu bona nemo makahalaia.
23 Nemopa wuwu ue mara rainu, tambai hodi ue anggur. Apa naharo nadua taimu pade naharoko nohaki.