Guru to moma nakono
4
1 Nandolami iuli Inoha to Nagaha ane mamohupi tempo kahudua dunia, mariara mei tauna to megoli lako kaparahayaa hi Kristus. Hira ee mantuku inoha to nepahalatara pade patudu-patudu anudaa, 2 to raparatara tauna to nabelo wongko bo to nokalowo. Rarara tauna ee nalimaumi. 3 Laitagira tauna mobangkele pade mobalailo. Laipetagiira mui mangkoni bahangkua ngaa to mamala rakoni, bo pangkoni ee laipajadi Alatala bona to neparahaya bo nangincani patudu to nakono mangkoni hante mosukuru hi Alatala. 4 Humawee to laipajadi Alatala ee nabelo pade moma naria to narumu ane ratarima hante mosukuru hi Alatala. 5 Apa humaweena ee laipakagaha lolita Alatala pade hambayata.Paulus nampakaroho wuku Timotius bona mabelo moto oa pobagona
6 Patudura humawee ompi-ompita to hangu kaparahayaa nangkambelai humawee lauria, bona iko mei mawali to pobago Kristus Yesus to nabelo pade nataualu i rara hangu hangaa nangkambelai kaparahayaata pade patudu to nabelo to laitukumu duu ei. 7 Nemo mutarima humawee tutura to moma nakono to moma narata lako Alatala. Pabiaha wotomu mepue hi Alatala. 8 Molati wotota bona maroho moma nadea gaga bununa. Naupawee mopabiaha wotota mepue hi Alatala ee nadea bununa, apa nampawaikata harumakaa mamparata rahi rara katuwuta tempo ei pade katuwuta to ngkapurina mei. 9 Jarita lauria nakono mpuu pade mahipato ratarima bo raparahaya. 10 Etu pade moma iodeta nampehimukui lauria apa laiharumakata mpuu Alatala to natuwu. Hiami to Pepakahalama manuhia, pelabina hi hira to neparahaya.
11 Patudura tauna hante humawee lauria pade tudura manturuhi. 12 Nemo maria haduaa tauna mampahauruko habana nanguradapako. Pahiloi ingkumu pade pojaritamu to nabelo hi tauna to neparahaya, bewa katowemu hi hingka manuhia, pade peparahayamu hi Kristus rara katuwuamu to moma nakahalaia. 13 Hamali ee, duuku marata ritu mei, matiguko mobahakara tauna Buku to Nagaha, mampakaroho peparahayara pade mopatudura. 14 Nemo mukalingani mampake pampakulea to laiwaika-Nako Alatala, tempora penatua noboli palera i tanuanamu pade nabi-nabi noparata peboha Alatala nangkambelai iko hi jumaa.