Bewa mampelihi penatua
3
1 Nakono mpuu to iuli ei, “Tauna to mingki mawali penatua, mingki'i mampobago to nabelo.” 2 Etu pade penatua ee tauna to moma nakahalaia, hadua aga bangkelena, namala'i nantanee dotana, nanoto rarana, nabelo ingkuna, nagoe'i nantarima to rata i houna pade nataualu'i nopatudu tauna. 3 Nemo'i tauna to nalangu-langu pade to nadoli nahodo naupawee tauna to nadole, to nampokono kanonea. Nemo'i tauna to wule nampokono doi. 4 Hia ee mai hadua tauna to laincanina nouruhi to i rara houna, laipengkorui pade laibilara anana. 5 Apa ane moma laincanina nouruhi to i rara houna, bewa'i mei mouruhi jumaa Alatala? 6 Nemo'i tauna to lako neparahaya hi Kristus, bona nemo'i mei mahombo pade rahuku ewa Magau Heta. 7 Hia ee mai tauna to nabelo hangana i lentongora tauna to poma neparahaya hi Yesus. Apa ane moma wee, nahalai tauna'i mei hampena manawu'i rara pehori Magau Heta.Bewa mampelihi diaken
8 Wetu moto mui hira to mawali diakena. Hira ee kana tauna to laibila, to nanoro rarara, nemora to nalangu-langu, nemora to nampokono doi, 9 naupawee hante rarara to nagaha narohora nangkakamu patudu peparahaya to laipakarawa Alatala. 10 Rahilo ncala olu ingkura. Ane momara nakahalaia, mamalara raongko mawali diaken.
11 Wetu moto mui bangkelerab, kana to nahipato rabila, moma to nepakudaa, namalara nantanee dota rarara pade namalara raparahaya nangkambelai hangu hangaa. 12 Diaken ee hadua aga bangkelena pade nabelo pouruhina anana bo to i rara houna.
13 Tau-tauna to nabelo pobagora i rara jumaa, kana rabila pade matetambai kabiara mampojarita nangkambelai peparahayara hi Kristus Yesus.
Patudu petukuata to laipakarawa Alatala
14 Humawee ei laitulihikakuko naupa laiharumakaku moma'amo mahae tulau mampotomukako. 15 Ane malera'a tulau, laincanimumi bewara tauna to neparahaya matuwu nohancou hante Alatala, etumi jumaa Alatala to natuwu. Jumaa eimile pohuko bo to nampajagai patudu to nakono lako Alatala ewa pondasi pade tinca nampahuko hangu hou. 16 Kakonona, neliu mpuu kabelo humawee patudu petukuata. Patudu to ilodo laipopalerui Alatala hi manuhia, laipakarawami hi kita iwei,
“Nerawa-'I rara tari manuhia,
laipemakono Inoha to Nagaha,
laihilora malaeka,
laikarebai i ngata-ngata,
laiparahaya i rara dunia,
pade laiongko rau huruga.”